ហុងគ្រី៖ ក្រុមហ៊ុនប្រេងរដ្ឋប្រទេសហុងគ្រី និងក្រុមហ៊ុនផ្គត់ផ្គង់ធំនៃស្ថានីយប្រេងឥន្ធនៈរបស់ប្រទេសនេះបានអំពាវនាវដល់សាធារណជន ដោយសុំឱ្យអតិថិជនកាត់បន្ថយការទិញប្រេងឥន្ធនៈរបស់ពួកគេ។
ការព្រួយបារម្ភការខ្វះខាតក្នុងការផ្គត់ផ្គង់ប្រេងឥន្ធនៈ បានកើតមានឡើងបន្ទាប់ពីប្រតិបត្តិករបំពង់បង្ហូរប្រេងរដ្ឋ Transneft របស់រុស្ស៊ីបាននិយាយកាលពីថ្ងៃអង្គារថា ខ្លួនបានបញ្ឈប់ការបញ្ជូនប្រេងតាមរយៈសាខាភាគខាងត្បូងនៃបំពង់បង្ហូរប្រេង Druzhba ដែលបង្ហូរកាត់ប្រទេសអ៊ុយក្រែនទៅកាន់សាធារណរដ្ឋឆេក ស្លូវ៉ាគី និងប្រទេសហុងគ្រី។ ប្រតិបត្តិករប្រេងរដ្ឋ Transneft បានលើកឡើងពីភាពស្មុគស្មាញ ដោយសារការដាក់ទណ្ឌកម្មរបស់សហភាពអឺរ៉ុបសម្រាប់សកម្មភាពរបស់ខ្លួន ដោយនិយាយថា ការទូទាត់ប្រាក់របស់ខ្លួនទៅឱ្យសមភាគីអ៊ុយក្រែនរបស់ក្រុមហ៊ុនត្រូវបានបដិសេធ។ ទោះបីជាការបញ្ជូនប្រេងចាប់ផ្តើមឡើងវិញក៏ដោយ ប្រតិបត្តិករស្ថានីយប្រេងឥន្ធនៈប្រទេសហុងគ្រីមានភាពប្រាកដប្រជា អំពីកង្វះខាតប្រេងឥន្ធនៈនៅក្នុងទីផ្សារប្រទេសហុងគ្រី ក្នុងរយៈពេលប៉ុន្មានថ្ងៃខាងមុខនេះ។
អ្នកបើកបររថយន្តម្នាក់និយាយថា គាត់កំពុងព្យាយាមចាក់បំពេញធុងប្រេងរថយន្ត ដើម្បីជៀសវាងការអស់ប្រេង។ កាលពីខែវិច្ឆិកាឆ្នាំមុន រដ្ឋាភិបាលហុងគ្រីបានប្រកាសកំណត់តម្លៃប្រេងសាំង និងម៉ាស៊ូត ក្នុងពេលដែលតម្លៃប្រេងឥន្ធនៈហក់ឡើងខ្លាំង។ បណ្តាមេដឹកនាំសហភាពអឺរ៉ុបបានព្រមព្រៀងគ្នាកាលពីខែឧសភា ដើម្បីដាក់បម្រាមលើការនាំចូលប្រេងពីរុស្ស៊ីភាគច្រើននៅចុងឆ្នាំនេះ ជាផ្នែកមួយនៃការដាក់ទណ្ឌកម្មរបស់ប្លុកនេះ ជុំវិញការវាយលុករបស់ទីក្រុងមូស្គូលើអ៊ុយក្រែន។ បម្រាមនេះគ្របដណ្តប់លើប្រេងរបស់រុស្ស៊ីដែលនាំមកតាមសមុទ្រ ប៉ុន្តែបានអនុញ្ញាតឱ្យបញ្ជូនតាមបំពង់ប្រេង Druzhba បណ្ដោះអាសន្នទៅកាន់ប្រទេសហុងគ្រី និងប្រទេសមួយចំនួនទៀតដែលគ្មានផ្លូវគោកនៅអឺរ៉ុបកណ្តាល ដូចជាប្រទេសស្លូវ៉ាគី និងសាធារណរដ្ឋឆេក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
