កណ្ដាល៖ ឯកឧត្តម គង់ សោភ័ណ្ឌ ប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល កាលពីម្សិលមិញ បានចុះសាកសួរសុខទុក្ខ សំណេះសំណាល និងនាំយក​អំណោយ​មនុស្សធម៌​ចែក​ជូន​ដល់​ប្រជាពលរដ្ឋមានជីវភាពខ្វះខាត ដែលបានរងគ្រោះបាត់បង់ផ្ទះសម្បែង ដោយ​សារបាក់​ច្រាំងព្រែក​ត្នោត ចំនួន៥៨គ្រួសារ ស្ថិតក្នុងសង្កាត់ដើមមៀន ក្រុងតាខ្មៅ។

ឯកឧត្តម គង់ សោភ័ណ្ឌ បានថ្លែងនូវការសោកស្ដាយចំពោះការខូចខាតផ្ទះសម្បែង និង​ទ្រព្យសម្បត្តិ​របស់​គ្រួសារ​រងគ្រោះ ដែលនេះជាគ្រោះមហន្តរាយបង្កដោយធម្មជាតិ គ្មាននរណាម្នាក់ចង់ជួបប្រទះឡើយ ជាពិសេស ឯកឧត្តម ក៏បាននាំមកនូវការផ្តាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរ ចំពោះសុខ​ទុក្ខ​ប្រជា​ព​ល​រដ្ឋ​គ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា និន្នាការនយោបាយណាមួយឡើយ។​ឯកឧត្តម បានបន្តថា ថ្វីត្បិតតែអំណោយមនុស្សធម៌ ដែលបាននាំយកមកចែកជូននាពេលនេះ មាន​ចំនួន​តិចតួច​ក្ដី មិនសមល្មមនឹងការខាតបង់ តែក៏អាចជួយសម្រាលទុក្ខបាកបានមួយកម្រិត ហើយ​ក៏​ជា​ការ​បង្ហាញ​នូវការយកចិត្តទុកដាក់ ចំពោះប្រជាពលរដ្ឋគ្រប់រូប ពីសំណាក់ថ្នាក់ដឹកនាំ ពិសេស គឺ​កាក​បាទ​ក្រហ​មកម្ពុជា ដែលមានសម្ដេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ជាប្រធាន ពោល គឺ​ទី​ណា​មាន​ទុក​លំ​បាក ទីនោះមានកាកបាទក្រហមកម្ពុជាចុះជួយ ដោយមិនមានការរើសអើង​នោះ​ឡើយ គ្រប់​ទីក​ន្លែង គ្រប់ពេលវេលា ក្នុងសកម្មភាពមនុស្សធម៌៕ អត្ថបទ៖ សោ យ៉ាម៉ង់