ភ្នំពេញ: កម្ពុជាត្រូវបានអបអរសាទរ និងកោតសរសើរចំពោះការធ្វើជាម្ចាស់ផ្ទះរៀបចំប្រកបដោយជោគជ័យនូវកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ (55th AMM) និងកិច្ចប្រជុំពាក់ព័ន្ធ ពីថ្ងៃទី២៩ ខែកក្កដា ដល់ថ្ងៃទី០៥ ខែសីហា ឆ្នាំ២០២២ នៅរាជធានីភ្នំពេញ។ នេះបើតាមក្រសួងការបរទេស និងសហប្រតិ បត្តិការអន្តរជាតិ ចេញផ្សាយនៅថ្ងៃទី១១ ខែសីហា ឆ្នាំ២០២២។

ប្រភពដដែលបញ្ជាក់បន្ថែមថា ការសាទរ និងកោតសរសើរនេះ ត្រូវបានធ្វើឡើងតាមរយៈអត្ថបទ, ការវិភាគ ទស្សនៈយោបល់ ដែលបានចុះផ្សាយក្នុងប្រព័ន្ធផ្សព្វផ្សាយអន្តរជាតិ និងជាតិជាច្រើន ក្នុងនោះបទវិចារណកថា របស់ Jakarta Post នៅថ្ងៃទី៨ ខែសីហា ឆ្នាំ២០២២ បានសរសេរថា ថ្លែងក្នុងនាមប្រ ធានអាស៊ាន រដ្ឋមន្រ្តីការបរទេសកម្ពុជា ឯកឧត្តម ប្រាក់ សុខុន បានរម្លឹកដល់រដ្ឋមន្រ្តីការបរទេសទាំងអស់ដែលកំពុងចូលរួមក្នុងកិច្ចប្រជុំវេទិកាតំបន់អាស៊ាន(ARF) នៅថ្ងៃសុក្រ(០៥ សីហា)ថា រដ្ឋមន្រ្តីការបរទេសទាំងអស់ត្រូវតែរក្សាឱ្យបាននូវភាពអត់ធ្មត់ សេចក្តីថ្លៃថ្នូរ សុជីវធម៌ល្អ និងកិច្ចពិភាក្សាប្រកប ដោយអរិយធម៌។ 

សារនេះ គឺច្បាស់លាស់ថា អាស៊ានក្នុងនាមជាម្ចាស់ផ្ទះរៀបចំកិច្ចប្រជុំមានបុព្វសិទ្ធិដើ ម្បីរៀបចំបទបញ្ញត្តិមួយចំនួន ហើយអ្នកចូលរួមទាំងអស់ត្រូវតែគោរពឱ្យបានម៉ឺងម៉ាត់ មានន័យថា កុំម ករញ៉េរញ៉ៃជាមួយប្រទេសជាម្ចាស់ផ្ទះរៀបចំកិច្ចប្រជុំឱ្យសោះ។

-នៅចំកណ្តាលនៃភាពតានតឹងសកលដែលកំពុងតែកើនឡើងដោយសារតែការឈ្លានពានរបស់រុស្ស៊ីទៅលើប្រទេសអ៊ុយក្រែន ក៏ដូចជា ការកើនឡើងនូវភាពតានតឹងរវាងចិន និងសហហរដ្ឋអាម៉េរិកលើបញ្ហាកោះតៃវ៉ាន់ ពិភពលោកត្រូវការជាចាំបាច់នូវវេទិកាផ្លូវការមួយដែលយ៉ាងហោចណាស់ក៏អ្នកចូលរួម អាចសម្តែងចេញនូវជំហររបស់ខ្លួន។ ហើយអាស៊ាន បានផ្តល់កន្លែងមួយដែលប្រទេសមហាអំណា ចធំៗរបស់ពិភពលោកមានអារម្មណ៍ថា ខ្លួនមានផាសុកភាព។ អាស៊ានជាម្ចាស់ផ្ទះរៀបចំកិច្ចប្រជុំ តែងតែព្យាយាមមិនឱ្យផុងខ្លួននៅជាប់ចំចំណុចកណ្តាលនៃការប្រយុទ្ធគ្នាដោយភ្ញៀវរបស់ខ្លួន។

-ហេតុផលមួយក្នុងចំណោមហេតុផលទាំងឡាយដែលនាំឱ្យភ្ញៀវអាស៊ានគោរពច្បាប់ល្បែងនេះ គឺដោ យសារតែអាស៊ានបានទទួលជោគជ័យក្នុងការដោះស្រាយបញ្ហាផ្ទៃក្នុងដ៏លំបាកបំផុតរបស់ខ្លួន ដោយការដាក់ទណ្ឌកម្មរបបយោធាមីយ៉ាន់ម៉ាក្រោមការដឹកនាំរបស់ឧត្តមសេនីយ៍ Min Aung Hlaing ចំពោះទង្វើដ៏ព្រៃផ្សៃរបស់ខ្លួន។ 

ជាការភ្ញាក់ផ្អើលសម្រាប់ប្រទេសជាសមាជិកមួយចំនួន សម្ដេចតេជោនាយករដ្ឋមន្ត្រី ហ៊ុន សែន បានបង្ហាញថា សម្ដេចជាប្រធានអាស៊ានដែលមានការទទួលខុសត្រូវចំពោះវេទិកាតំបន់នេះ។

ក្រៅពីនេះ សារព័ត៌មានអន្តរជាតិ និងជាតិ ក៏បានផ្ដោតការចាប់អារម្មណ៍ទៅលើកិច្ចប្រជុំរដ្ឋមន្ត្រីការបរ ទេសអាស៊ាន ដាណឺម៉ាក ក្រិក ហូឡង់ អូម៉ង់ កាតា និងអារ៉ាប់រួម ព្រមទាំងការចុះហត្ថលេខាលើលិខិតុបករណ៍នៃការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៊ីអាគ្នេយ៍(TAC)ផងដែរ។ ឥឡូវនេះប្រទេសចំនួន ៤៩ រួមទាំងសហរដ្ឋអាម៉េរិក ចិន ជប៉ុន បារាំង ចក្រភពអង់ គ្លេស ឥណ្ឌា និងកាណាដា ក៏បានចុះហត្ថលេខាលើលិខិតុបករណ៍នៃការចូលជាសមាជិកនៃ TAC ផង ដែរ។ 

បណ្ដាសារព័ត៌មានទាំងនេះ ក៏បានចាប់អារម្មណ៍ទៅលើខួបអនុស្សាវរីយ៍លើកទី៥៥ របស់អាស៊ាន, ការចូលជាសមាជិករបស់ប្រទេសទីម័រខាងកើត និងការពង្រីកទំនាក់ទំនងខាងក្រៅរបស់អាស៊ាន ផងដែរ៕ ដោយ៖ គង់ ឌិន