មីយ៉ាន់ម៉ា៖ មេធាវីរបស់លោកស្រីបានអះអាងកាលពីថ្ងៃព្រហស្បតិ៍ថា មេដឹកនាំស៊ីវិលដែលត្រូវឃាត់ខ្លួនរបស់សហភាពមីយ៉ាន់ម៉ា លោកស្រី អ៊ុងសាន ស៊ូជី ត្រូវបានរបបសឹកយោធាចោទប្រកាន់ពីបទ បំពានច្បាប់ការសម្ងាត់ជាតិក្នុងយុគសម័យអាណានិគម ដែលធ្វើឲ្យលោកស្រីប្រឈមនឹងការជាប់ពន្ធនាគាររយៈពេល ១៤ឆ្នាំ។
លោកស្រី ស៊ូជី, រដ្ឋមន្ត្រីនៃគណៈរដ្ឋមន្ត្រី ៣នាក់ និងទីប្រឹក្សាសេដ្ឋកិច្ចជនជាតិអូស្ត្រាលីរបស់លោកស្រី គឺលោកសាស្ត្រាចារ្យ សៀន ធឺណែល ត្រូវបានចោទប្រកាន់កាលពីរយៈពេល ១សប្តាហ៍មុននៅក្នុងទីក្រុងយ៉ាងហ្គោន ប៉ុន្តែមេធាវីរបស់លោកស្រី លោក ឃីន មុងច បាននិយាយប្រាប់ទីភ្នាក់ងារព័ត៌មានរ៉យទ័រថា លោកស្រីទើបដឹងការចោទប្រកាន់មួយនេះកាលពី ២ថ្ងៃមុន ដែលជាការចោទប្រកាន់ធ្ងន់ធ្ងរបំផុតរបស់យោធា មកលើរូបលោកស្រីគិតមកទល់នឹងពេលនេះ។ កាលពីដំបូងឡើយ របបយោធាបានចោទប្រកាន់លោកស្រីពីបទ បំពានការនាំចូលដោយខុសច្បាប់វិទ្យុទាក់ទង និងការបំពានច្បាប់រឹតត្បិតជំងឺ Covid-19។ លោកស្រីស្ថិតក្រោមការឃុំឃាំងចាប់តាំងពីមានរដ្ឋប្រហារយោធាកាលពីថ្ងៃទី០១ ខែកុម្ភៈកន្លងទៅ ប៉ុន្តែសេចក្ដីរាយការណ៍បានឲ្យដឹងថា លោកស្រីមានសុខភាពល្អជាទេ។
សូមបញ្ជាក់ថា មនុស្សជាង ៥៣០នាក់ត្រូវបានសម្លាប់ អំឡុងវិធានការបោសសម្អាតយ៉ាងចាស់ដៃ ពីកងកម្លាំងសន្តិសុខទៅលើក្រុមប្រឆាំងរបស់ខ្លួន។ ចក្រភពអង់គ្លេសបានបង្កើនទណ្ឌកម្មរបស់ខ្លួនកាលពីថ្ងៃព្រហស្បតិ៍ រួមទាំងសាជីវកម្មសេដ្ឋកិច្ចមីយ៉ាន់ម៉ា (MEC) ដែលជាក្រុមហ៊ុនមានទំនាក់ទំនងជិតស្និតជាមួយរបបសឹកយោធា៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
