មន្ទីរអប់រំ យុវជន និងកីឡារាជធានីភ្នំពេញ ប្រារព្ធខួបលើកទី២៣ ទិវាអន្តរជាតិសម្រាប់យុវជន ១២ សីហា ២០២២ ធ្វើឡើង​ក្រោម​ប្រធាន​បទ«សាមគ្គីភាពអន្តរជំនាន់ បង្កើតពិភពលោក​ សម្រាប់​មនុស្ស​គ្រប់វ័យ» នាព្រឹកថ្ងៃទី១២ ខែសីហា ឆ្នាំ២០២២នេះ, ក្រោមវត្តមានលោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ, លោក ស៊ុ មនោរម្យ ប្រធាន​លេខាធិការដ្ឋាន សហភាពសហព័ន្ធយុវជនកម្ពុជារាជធានីភ្នំពេញ និងយុវជនក្រុមភ្លេងទាំង៤ក្រុម មក​ពី​វិទ្យាល័យ ហ៊ុន សែន ប៊ុនរ៉ានី វត្តភ្នំ, វិទ្យាល័យឥន្ទ្រទេវី, វិទ្យាល័យ បាក់ទូក និងវិទ្យាល័យ​វត្តកោះ។

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡា រាជធានីភ្នំពេញ បានលើកឡើងថា ជា​រៀងរាល់ឆ្នាំនៅថ្ងៃទី១២ សីហា នៅលើពិភពលោកតែងប្រារព្ធទិវាអន្តរជាតិសម្រាប់យុវជន ដើម្បី​ជារំលឹកដល់យុវជនគ្រប់រូប និងបង្ហាញពីការយកចិត្តទុកដាក់របស់ប្រមុខថ្នាក់ដឹកនាំ នៃ​ប្រទេស​នីមួយៗ ក្នុងការផ្តល់ឱកាស ក្នុងការការពារ និងកសាង​ពិភពលោក​មួយ​ប្រកប​ដោយ​និរន្តរភាព និងស្រស់បំព្រង។ ជាមួយគ្នានេះដែររាជរដ្ឋាភិបាលកម្ពុជា ក្រោម​ការដឹកនាំ​របស់​មគ្គុទ្ទេស និងជាស្ថាបនិកសន្តិភាព សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃ​ព្រះរាជាណាចក្រកម្ពុជា បានអនុញ្ញាតឲ្យក្រសួងអប់រំ យុវជន និងកីឡា ប្រារព្ធ​ទិវា​នេះ​ជា​រៀងរាល់ឆ្នាំ ក្នុងន័យអបអរសាទរ និងរួមចំណែកជាមួយពិភពលោក ក្នុងការកសាងសន្តិភាព សាមគ្គីភាព និងការអភិវឌ្ឍពិភពលោក។

លោក ហែម ស៊ីណារ៉េត បានបន្ថែមទៀតថា ក្នុងបរិបទនេះ គោល​បំណង នៃ​ទិវា​អន្តរជាតិ​ សម្រាប់​យុវជនឆ្នាំនេះ ប្រធានបទ សាមគ្គីភាពអន្តរជំនាន់ បង្កើត​ពិភពលោក សម្រាប់​មនុស្ស​គ្រប់វ័យ គឺដើម្បីពង្រីកសារថា សកម្មភាពចាំបាច់នៅគ្រប់ជំនាន់ ដើម្បី​សម្រេច​បាន​នូវ​គោល​ដៅ​អភិវឌ្ឍន៍​ប្រកបដោយចីរភាព និងមិនទុកចោលនរណាម្នាក់ឡើយ។

ឆ្លងតាមអត្ថន័យដ៏ជ្រាវជ្រៅនេះ លោក ហែម ស៊ីណារ៉េត សូមឧទ្ទិស​ទិវា​ដ៏​មាន​សារៈសំខាន់​នេះ​ សម្រាប់​យុវជន​កម្ពុជា​គ្រប់​រូប ជាពិសេសយុវជននៅរាជធានីភ្នំពេញ និងសូមក្រើន​រំលឹក​ដល់​យុវជន​គ្រប់រូប សូមធ្វើខ្លួនឲ្យក្លាយជាពលរដ្ឋសកម្មរបស់ជាតិ ពោលគឺ ជាយុវជន​ពេញលេញ​ប្រកប​ដោយ​សក្តានុពល។ ជាយុវជនឆ្លាត ពូកែ និងមានប្រយោជន៍ចំពោះខ្លួនឯង គ្រួសារ សហគមន៍ និងប្រទេសជាតិគ្រប់ជំនាន់ចេះស្រលាញ់សាមគ្គីគ្នា ចេះចែករំលែកគ្នាទៅវិញទៅមក ដើម្បីបង្កើតក្តីស្រលាញ់ពេញមួយជីវិត និងគ្រប់ជំនាន់។ លោក ក៏សូមឲ្យយុវជន​ខិតខំ​រៀន​សូត្រ​ជៀស​ឆ្ងាយ​ពី​គ្រឿងញៀនគ្រប់ប្រភេទ ដើម្បីក្លាយខ្លួនជាយុវជន៣ល្អ«កូនល្អ សិស្សល្អ មិត្តល្អ» និងជាពលរដ្ឋល្អសម្រាប់ប្រទេសជាតិ៕ រូបភាព/ អត្ថបទ៖ រដ្ឋា