ភ្នំពេញ៖ លោកជំទាវ ជូ ប៊ុនអេង បានឱ្យដឹងថា ក្នុងឆ្នាំ២០២១ កម្ពុជាបង្ក្រាបបទល្មើសជួញដូរ មនុស្សបានជាង ៣៥០ករណី ដែលការបង្ក្រាបនេះ បានច្រើនជាងឆ្នាំណាៗទាំងអស់ និងបានជួយ សង្គ្រោះជនរងគ្រោះចំនួនជាង ១៥០០នាក់ ។

ក្នុងសន្និសីទសារព័ត៌មាន ស្តីពីស្ថានភាពនៃការជួញដូរមនុស្សនៅកម្ពុជា កាលពីថ្ងៃទី១២ ខែសីហា ម្សិលមិញ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការ ជាតិប្រយុទ្ធប្រឆាំងអំពើជួញដូរមនុស្ស បានបញ្ជាក់ថា នៅឆ្នាំ២០២១ ក្នុង​ដំណាក់​កាល ដែលកំពុងមានការឆ្លងរាលដាល នៃជំងឺ កូវីដ-១៩ គណៈកម្មាធិការជាតិប្រយុទ្ធ​ប្រឆាំងអំពើជួញដូរមនុស្ស សមត្ថកិច្ចពាក់ព័ន្ធ និងអង្គការដៃគូ បានធ្វើការផ្សព្វផ្សាយពីករណីជួញ​ដូរមនុស្ស ទៅដល់ប្រជាពលរដ្ឋចំនួនជាង ១២ម៉ឺន៨០០០លើក ស្នើមនុស្ស ជាង៦លាននាក់ ។

លោកជំទាវ បានបន្តថា នៅក្នុងឆ្នាំ២០២១ ការបង្ក្រាបបទល្មើសជួញដូរមនុស្ស ​បានរហូតដល់ ៣៥៩ករណី ​និងបានបញ្ជូនជនសង្ស័យជាច្រើននាក់ទៅតុលាការ ​ចាត់ការតាមនីតិវិធីច្បាប់ ខណៈ ឆ្នាំ២០១៩ បង្ក្រាបបានត្រឹម១៥៥ករណី​ គឺកើនឡើងទ្វេដង ហើយបានសង្គ្រោះជនរងគ្រោះរហូត​ដល់១ ៥៧៧នាក់ ដែលកាលពីឆ្នាំ២០១៩ គឺសង្គ្រោះបានត្រឹម ៤៦៧នាក់ ។

ក្នុងសន្និសីទនេះដែរ នាយឧត្តមសេនីយ៍ យក់ សុខា អគ្គស្នងការរងនគរបាលជាតិ បានលើកឡើង ថា ប្រសិនបើពលរដ្ឋ​ ចង់រាយការណ៍​ព័ត៌មានពាក់ព័ន្ធការជួញដូរមនុស្ស​ ដើម្បីឲ្យមានការបង្រ្កាប​ទាន់​​ពេលវេលា អាចទាក់ទង «Hotline របស់នាយកដ្ឋានប្រឆាំងការជួញដូរមនុស្ស គឺ (១២៨៨) ហើយនៅពេល ​ដែលទូរស័ព្ទទៅ Hotlineនេះ​ មានការរអាក់រអួល គឺនៅមានហ្វេសប៊ុក​ផេក​របស់នាយកដ្ឋានថែមទៀត​ ដែលអាចផ្ញើព័ត៌មានចូល ​ដើម្បីសហការគ្នាស្រាវជ្រាវ ៕ អត្ថបទ៖ បាន សុខរិទ្ធិ