ភ្នំពេញ៖ បើតាមឯកឧត្តម វេជ្ជបណ្ឌិត ងី មានហេង ប្រធានមនី្ទរសុខាភិបាលរាជធានីភ្នំពេញ បានបញ្ជាក់ប្រាប់BTV ព័ត៌មាននាព្រឹកថ្ងៃទី១៣ ខែសីហា ឆ្នាំ២០២២នេះថា គិតមកដល់ពេលនេះ ប្រជាពលរដ្ឋអាយុចាប់ពី១៨ឆ្នាំឡើង ចាក់វ៉ាក់សាំងការពារជំងឺកូវីដ-១៩ ដូសជំរុញទី៥ ក្នុងរាជធានីភ្នំពេញ បានចំនួន៩.២៤% ខណៈអ្នកដែលចាក់វ៉ាក់សាំងដូសជំរុញទី៤ បានចំនួន៨០.៣០%។

ឯកឧត្តម វេជ្ជបណ្ឌិត ងី មានហេង បានឲ្យដឹងទៀតថា ជាលទ្ធផលនៃការចាក់វ៉ាក់សាំង​បង្ការ​ជំងឺកូវីដ-១៩ ក្នុងភូមិសាស្រ្តរាជធានីភ្នំពេញ គិតត្រឹមល្ងាចថ្ងៃទី១២ ខែសីហា ឆ្នាំ២០២២​ម្សិលមិញ​នេះ កុមារមានអាយុពី០៣ឆ្នាំ ដល់ក្រោម០៥ឆ្នាំ ក្រុមគោលដៅ៧២,៨៥៤នាក់ ចាក់វ៉ាក់សាំងដូសទី៣ បានចំនួន៣%, កុមារមានអាយុ០៥ឆ្នាំ ក្រុមគោលដៅ៤៩.៨៤៨នាក់ ​ចាក់វ៉ាក់សាំងដូសទី៤ បាន​ចំនួន២.៦៣%, កុមារមានអាយុពី០៦ឆ្នាំ ដល់ក្រោម១២ឆ្នាំ ក្រុមគោលដៅ២២១,១៣៦នាក់ ចាក់វ៉ាក់សាំងដូសទី៤ បានចំនួន២៨.៧៣%, កុមារ និងយុវជន មានអាយុពី១២ឆ្នាំ​ ដល់ក្រោម១៨ឆ្នាំ ក្រុមគោលដៅ​១៩១,៤៨៦នាក់ ចាក់វ៉ាក់សាំងដូសទី៥ បានចំនួន២.៥៤% និងប្រជាពលរដ្ឋ​មាន​អាយុចាប់ពី១៨ឆ្នាំឡើង ក្រុមគោលដៅ១,៤១២,៧៦៩នាក់ ចាក់វ៉ាក់សាំងដូសទី៥ បានចំនួន៩.២៤% ឬស្មើចំនួនប្រជាពលរដ្ឋ១៣០,៥១៦នាក់។

ប្រធានមនី្ទរសុខាភិបាលរាជធានីភ្នំពេញ ​បានបន្ថែមទៀតថា សព្វថ្ងៃក្រៅពីការផ្តល់​សេវាចាក់វ៉ាក់​សាំងបង្ការជំងឺកូវីដ-១៩ នៅមន្ទីរពេទ្យបង្អែក ​និងមណ្ឌលសុខភាព ចំនួន៤៣ទីតាំង គឺក្រុមការងារ​គ្រូពេទ្យនៃការិយាល័យស្រុកប្រតិបតិ្តទូទាំងរាជធានីភ្នំពេញ ​បានបន្តចុះចាក់វ៉ាក់សាំងបង្ការជំងឺកូវីដ-១៩ ដូស​មូលដ្ឋាន ​និងដូសជំរុញជូនប្រជាពលរដ្ឋតាមខ្នងផ្ទះ ​និងទីប្រជុំនានា ជាពិសេសរៀងរាល់​ថ្ងៃសីល គឺក្រុមការងារគ្រូពេទ្យចុះចាក់វ៉ាក់សាំងនៅតាមទីវត្តអារាម ​ជូនលោកតា​ លោកយាយ ព្រះសង្ឃ និងពុទ្ធបរិស័ទ ដែលអញ្ជើញមកវត្ត ខកខានមិនបានចាក់វ៉ាក់សាំង ​ក៏ក្រុមការងារគ្រូពេទ្យ សម្រួលនឹងចាក់វ៉ាក់សាំងបង្ការជំងឺកូវីដ-១៩ជូនផងដែរ។​

អាស្រ័យហេតុនេះ ​ឯកឧត្តម វេជ្ជបណ្ឌិត ងី មានហេង សូមធ្វើការអំពាវនាវដោយទទូច និង​សូម​ក្រើនរំលឹក​ដល់សាធារណៈជន បងប្អូនប្រជាពលរដ្ឋទាំងអស់​ ត្រូវនាំគ្នាបន្តអនុវត្តវិធានការ ៣ការពារ និង៣កុំ ព្រមទាំងនាំគ្នាទៅចាក់វ៉ាក់សាំងកូវីដ-១៩ ​ទាំងដូសមូលដ្ឋាន ​និងដូសជម្រុញ (ដូសទី៣ ដូសទី៤ និងដូសទី៥) ជាចាំបាច់ ​ដែលមានគម្លាតពីដូសមួយទៅដូសមួយទៀត មានរយៈពេលពី៣ខែឡើងទៅ៕ អត្ថបទ រដ្ឋា