ភ្នំពេញ៖ ប្រជាពលរដ្ឋប្រកបអាជីវកម្មពាក់ព័ន្ធវិស័យទេសចរណ៍ កំពុងមានភាពសប្បាយចិត្ត​ក្នុងពេលបច្ចុប្បន្ន។ ភាពសប្បាយចិត្ត ព្រោះមានវត្តមានភ្ញៀវទេសចរបរទេសដើរ​កំសាន្តច្រើន​ជាងមុន ដែលអាចជួយឱ្យអាជីវកម្មរបស់ពួកគាត់មានភាពប្រសើរផងដែរ។

ក្រសួងទេសចរណ៍ ទើបបានបញ្ជាក់ថ្មីៗនេះថា ភ្ញៀវទេសចរជាតិ និងភ្ញៀវទេសចរអន្តរជាតិ មាន​ចំនួនរហូតដល់ជាង ២៤ម៉ឺននាក់ បានធ្វើដំណើរកំសាន្តជុំវិញប្រទេសកម្ពុជា​ ក្នុងសប្ដាហ៍ដំបូងនៃខែ សីហា នេះ។ ក្នុងនោះភ្ញៀវទេសចរជាតិ មានជាង ២២ម៉ឺននាក់ និងភ្ញៀវអន្តរជាតិមានចំនួនជាង ២ម៉ឺននាក់។

ខណៈមានកំណើនភ្ញៀវទេសចរកើនឡើងនេះ អ្នកប្រកបរបរស៊ីក្លូដឹកភ្ញៀវបរទេស ​ក៏ចាប់ផ្ដើមមាន​ភ្ញៀវ​ដឹកជាប្រចាំឡើងវិញ ក្រោយមានភាពស្ងប់ស្ងាត់ជាយូរដោយសារកូវីដ-១៩។ នេះជាការលើកឡើងរបស់លោក អ៊ឹម សម្បត្តិ ប្រធានសមាគមអភិរក្សស៊ីក្លូ ​និងមុខរបរក្រៅប្រព័ន្ធ។ លោក បញ្ជាក់ថា ភ្ញៀវជិះស៊ីក្លូ ក្នុងរយៈពេល ២ខែចុងក្រោយនេះគឺចាប់មានកំណើន ហើយ​លោកសង្ឃឹមថា ខែ វិច្ឆិកា ចំនួននឹងកាន់តែច្រើន។ បច្ចុប្បន្នគឺមាន ការសហការជាមួយសណ្ឋាគារ និងទីភ្នាក់ងារទេសចរណ៍ ​ដោយមានការលក់ជាកញ្ចប់សម្រាប់ទស្សនានៅប្រទេសកម្ពុជា។ លោកបន្តថា អ្នកប្រកបរបរស៊ីក្លូ គឺមានភ្ញៀវជាប្រចាំ ហើយអ្នកខ្លះក៏បានវិលត្រឡប់មកពីស្រុក​កំណើត ដើម្បីប្រកបរបរនេះជាថ្មីផងដែរ។

លើកឡើងដូចគ្នាផងដែរ សម្រាប់អាជីវកម្មក្នុងទីតាំង ផ្សារទួលទំពូង ​បញ្ជាក់ថា បច្ចុប្បន្ននេះ គឺមាន​ភ្ញៀវទេសចរបរទេសចូលមកផ្សារច្រើនជាងមុន។​ វត្តមានរបស់ភ្ញៀវបរទេស ក៏បានជួយឱ្យការ​លក់ដូរ របស់ពួកគាត់មានភាពកាន់តែប្រសើរផងដែរ។

តាមរបាយការណ៍របស់ក្រសួងទេសចរណ៍ ដែលបានបញ្ជាក់ពី ចំនួនភ្ញៀវទេសចរក្នុង សប្ដាហ៍​ដំបូងនៃខែ សីហា ក៏បានលើកឡើងដែរថា ទីតាំងសំខាន់ដែលស្រូបទាញភ្ញៀវទេសចរ​បាន​ច្រើនជាងគេ គឺខេត្តសៀមរាប ​បន្ទាប់មកគឺខេត្តព្រះសីហនុ ​កំពត កែប ខេត្តបាត់ដំបង និងរាជធានីភ្នំពេញ៕ អត្ថបទ៖ គឹមហុក