ភ្នំពេញ៖ អាកាសចរស៊ីវិល តាមរយៈវិទ្យាស្ថានជាតិអាកាសចរស៊ីវិល បានសហការជាមួយក្រុមហ៊ុន ប៊ូអ៊ីង របស់សហរដ្ឋអាមេរិក បានរៀបចំវគ្គសិក្សារយៈពេល៤ថ្ងៃ ដែលមានអ្នកជំនាញមក​ពី​ប្រទេស​អង់គ្លេស ជាអ្នកបង្រៀនដល់មន្ត្រី អាកាសចរ, បង្រៀន ដល់​មន្ត្រីបម្រើការងារនៅតាម​អាកាស​យានដ្ឋាននានា ​និងមន្ត្រីបម្រើការងារនៅតាមក្រុមហ៊ុន ហោះហើរក្នុងស្រុកទំាងអស់ ដើម្បី​ពង្រឹង​សមត្ថភាពក្នុងការគ្រប់គ្រងសន្តិសុខ ព្រលានជូនអ្នក​ដំណើរ ពិសេសពីរបៀបស៊ើបអង្កេតភេរវករ ដែលមានបំណងធ្វើ ភេរវកម្ម ក្នុងព្រលានអ្នកដំណើរ។

បញ្ជាក់ប្រាប់ BTV ឯកឧត្តម លឹម កៅ នាយកវិទ្យាស្ថានជាតិអាកាសចរស៊ីវិល បានប្រាប់ថា ស្របពេលកម្ពុជា កំពុងកសាងអាកាសយានដ្ឋានថ្មីៗបន្ថែមចំនួន២​ គឺវគ្គបណ្តុះបណ្តាលនេះ ពិតជា​សំខាន់បំផុត ដើម្បីឱ្យមន្ត្រីអាកាសចរ មន្ត្រីបម្រើការងារនៅតាមអាកាសយានដ្ឋាននានា មន្ត្រី​បម្រើ​ការងារនៅតាមក្រុមហ៊ុនហោះហើរទំាងអស់ ​និងមន្ត្រីនៅវិទ្យាស្ថានជាតិអាកាស ចរស៊ីវិល បាន​ពង្រឹង​សមត្ថភាពលើការគ្រប់គ្រងព្រលាន ​ការប្រើប្រាស់ព្រលានដោយយកចិត្ត ទុកដាក់ ដើម្បី​រក្សាសន្តិសុខសុវត្ថិ ភាពដល់អ្នកដំណើរ ពិសេសបានដឹងពីរបៀបស៊ើបអង្កេត ​តាមដានសកម្មភាព និងគោលបំណងរបស់ភេរវករ​ ដែលមានបំណង ចង់ធ្វើភេរវកម្មទំាងនៅព្រលានអ្នកដំណើរផ្នែក​ខាងក្រៅ និងផ្នែកខាងក្នុងឱ្យមានសុវត្ថិភាពបំផុត។

ឯកឧត្តម នាយកវិទ្យាស្ថានជាតិអាកាសចរស៊ីវិល បានបន្តថា តាមរយៈវគ្គនេះ គឺបានបង្ហាញច្បាស់ៗ​តែម្តង ក្នុងនោះត្រូវ តម្រូវឱ្យមន្ត្រីសន្តិសុខអាកាសចរ ​ត្រូវចេះបង្កប់ខ្លួនឱ្យដូចនឹងប្រជាជន ឱ្យដូច​នឹងអ្នកដំណើរ ហើយត្រូវចេះ កំណត់មុខសញ្ញា និងភិនភាគរបស់ភេរវករ ដែលមានបំណង​ធ្វើ​ភេរវកម្ម ព្រោះភេរវករ ជាទូទៅមិនមែនមកជាមួយក្មេង​ មិនមែនមកជាមួយមនុស្ស ចាស់ជរា មិនមែន​មកដោយមិនមានអាវុធជាប់នឹងខ្លួននោះទេ​ ដូច្នេះវគ្គនេះបានបង្ហាញ ច្បាស់ៗ ហើយ​ឯកឧត្តម សង្ឃឹមថា នៅថ្ងៃខាងមុខ កម្ពុជាកាន់តែមានអ្នកជំនាញច្រើន ​ដើម្បីគ្រប់អាកាសយានដ្ឋាន និងធានាសុវត្ថិភាពដល់អ្នកដំណើរ។

ចំណែកឯកឧត្តម ជា អូន រដ្ឋលេខាធិការ តំណាងឯកឧត្តម ម៉ៅ ហាវណ្ណាល់ រដ្ឋមន្ត្រីទទួល​បន្ទុករដ្ឋ​លេខាធិការដ្ឋាន អាកាសចរស៊ីវិល ​បានប្រាប់ថា វគ្គនេះពិតជាសំខាន់​ ដូច្នេះឯកឧត្តម សូមអរគុណ​ដល់ក្រុមហ៊ុន ប៊ូអ៊ីង និងស្ថានទូត អាមេរិក ប្រចាំកម្ពុជា ដែលបានជួយគំាទ្រដល់វគ្គបណ្តុះបណ្តាល ដោយ​ឯកឧត្តម សង្ឃឹមថា កម្ពុជានឹងមានអ្នកជំនាញ ​បន្តដើម្បីពង្រីក ជំនាញស៊ើបអង្កេត​ភេរវកម្ម​ដល់មន្ត្រីផ្សេងៗទៀត​ ហើយត្រូវយកចំណេះដឹងទៅអនុវត្តការងារឱ្យមាន ប្រសិទ្ធិភាពបំផុត៕

អត្ថបទ៖ គង់ រ៉េន