ភ្នំពេញ៖ ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកបានថ្លែងថា មនុស្សម្នាក់ៗត្រូវមានមោទនភាពលើអ្វីដែលខ្លួនធ្វើបាន ដោយមិនបាច់ទៅខ្វល់នឹងរឿងគេមើលឬមិនមើល Share និង Likeច្រើននោះទេ ខណៈមានអ្នកឈ្លោះគ្នាក្នុងក្រុមគ្រួសាររបស់ពួកគេហើយត្រូវបានមហាជនគេចាប់អារម្មណ៍មើលច្រើននោះមិនប្រកដថាសប្បាយចិត្តនោះឡើយ។

 ថ្លែងនៅក្នុងឱកាសដែលលោកបានអញ្ជើញជួបសំណេះសំណាល និងពិសារអាហារសាមគ្គីជាមួយសិល្បករ សិល្បការិនី នៃសិល្បៈទាំង ៧ទម្រង់ កាលពីថ្ងៃទី០៦ ខែសីហា ឆ្នាំ២០២២កន្លងទៅនេះ លោកឧត្តមសេនីយ៍ឯក ហ៊ុន ម៉ាណែត បានលើកឡើងថា មានបងប្អូនខ្មែរយើងមួយចំនួន បានត្អូញត្អែរពីស្នាដៃរបស់ខ្លួនពេលដែលពួកគាត់បានធ្វើចម្លាក់ និងឆ្លាក់អក្សរសាស្រ្តខ្មែរជាដើម មិនសូវមានការគាំទ្រលើបណ្តាញសង្គម និងមិនសូវមានអ្នក Share ឬ Like ច្រើនដូចរឿងរ៉ាវជម្លោះគ្រួសារគេនោះ។

យ៉ាងណាក៏ដោយលោកឧត្តមសេនីយ៍ ហ៊ុន ម៉ាណែត បានកោតសរសើរ និងបានបង្ហាញការគាំទ្រដល់បងបងប្អូនខ្មែរ ដែលបានខិតខំឆ្លាក់អក្សរសាស្រ្ត និងចម្លាក់បែបបុរាណផ្សេងៗបង្ហោះបង្ហាញដល់សាធារណៈជនឲ្យមើល និងឲ្យបានដឹងផងដែរ បើទោះបីបងប្អូនខ្លះគាត់មិនបានចាប់អារម្មណ៍ក៏ដោយ ខណៈសកម្មភាពនេះបានបង្ហាញឲ្យឃើញថា ពួកគាត់និមួយៗបានអភិរក្ស និងថែរក្សានូវវប្បធម៌ប្រពៃណីជាតិខ្មែរយើងដែលបានបន្សល់ទុកឲ្យពួកយើងទាំងអស់គ្នារហូតដល់បច្ចុប្បន្ននេះ។

 ជាមួយគ្នានោះ លោកឧត្តមសេនីយ៍ ក៏បានលើកទឹកចិត្តបងប្អូនខ្មែរគ្រប់រូប ទោះក្នុងកាលៈទេសៈណាក៏ដោយ មិនត្រូវផ្តោតទៅលើការឲ្យតម្លៃរបស់អ្នកដ៍ទៃជាជាងការផ្តល់តម្លៃចំពោះខ្លួនឯងនោះទេ។ យើងត្រូវមានមោទនភាពចំពោះអ្វីដែលយើងធ្វើបាន ទោះបីជាវាមិនល្អដូចគេ ឬមិនមានការចាប់អារម្មណ៍ច្រើនដូចគេក៏ដោយ ប៉ុន្តែវាបានកើតចេញពីស្នាដៃ និងការខិតខំប្រឹងប្រែងផ្ទាល់ខ្លួនរបស់យើង នេះហើយជាមោទនភាពរបស់យើងគ្រប់ៗគ្នានោះ៕

អត្ថបទ: បាន ចក់