កំពង់ធំ៖ ឯកឧត្តម សុទ្ធ គឹមកុលមុន្នី អ្នកនាំពាក្យគណ:កម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ក្នុងចំណោមខេត្តទាំង៨ដែលប្រឈមនឹងជំនន់ទឹកភ្លៀង គិតត្រឹមព្រឹកនេះ​មាន​ខេត្តកំពង់ធំប្រភពទឹកឡើងដល់កម្រិតប្រកាសអាសន្ន ខណៈខេត្ត៧ផ្សេងទៀត​បង្កើនការ​តាមដាន​បញ្ហាទឹកជំនន់ដូចគ្នា។

ថ្លែងប្រាប់BTV News នៅថ្ងៃទី១៥ ខែសីហា ឆ្នាំ២០២២ ឯកឧត្តម សុទ្ធ គឹមកុលមុន្នី អ្នកនាំពាក្យ​គណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា គិតត្រឹមព្រឹកនេះ ក្នុង​ចំណោម​ខេត្តទាំង៨ ដែលព្យាករណ៍ថា នឹងត្រូវរងជំនន់ទឹកភ្លៀង មានស្ថានីយកំពង់ធំមួយកន្លែងក្នុង ក្រុងស្ទឹងសែន ខេត្តកំពង់ធំ ដែលបរិមាណទឹកឡើងលើសកម្រិតប្រកាសអាសន្ន។

ជាមួយគ្នានេះ អ្នកនាំពាក្យដដែល បញ្ជាក់ថា គណៈកម្មាធិការជាតិគ្រប់គ្រងគ្រោះមហន្តរាយ​បាន​តាមដាន​ជាប់ជាប្រចាំ ដោយណែនាំដល់លេខាធិកាដ្ឋានគ្រោះមហន្តរាយខេត្តនីមួយៗ​ត្រៀមកម្លាំង​សម្របសម្រួល​ប្រតិបត្តិការក្នុងខេត្តទាំង៨ ក្នុងករណីមានទឹកជំនន់។

គួរបញ្ជាក់ថា តាមការព្យាករណ៍របស់ក្រសួងធនធានទឹក និងឧតុនិយម ​ចាប់ពីថ្ងៃទី១៥ ដល់ថ្ងៃទី១៩ ​សីហានេះ ដែលកម្ពុជានឹងរងឥទ្ធិពលសម្ពាធទាបនៅសមុទ្រចិនខាងត្បូង​អូសបន្លាយ​ពី​ប្រទេសជិតខាង ​នឹងអាចធ្វើឲ្យតំបន់ផ្ទៃរងទឹកភ្លៀង ​និងបណ្តាខេត្តមួយចំនួនដែលកន្លងមក ទទួល​បាននូវបរិមាណទឹកភ្លៀងបង្គួរ និងច្រើនរួចមកហើយ​ នឹងបន្ថែមបរិមាណកើនឡើងទៀត ដែលជា​ហេតុបង្កើតឡើងនូវជំនន់ទឹកភ្លៀងសារជាថ្មី ដូចជា ខេត្តកំពង់ធំ ព្រះវិហារ រតនគិរី ស្ទឹងត្រែង ក្រចេះ ត្បូងឃ្មុំ កំពង់ចាម និង ខេត្តឧត្តរមានជ័យ៕ អត្ថបទ៖ សេក ឧត្តម