ភ្នំពេញ៖ តារាងវាយតម្លៃចុងក្រោយ Asia Nikkei គិតត្រឹមដំណាច់ខែកក្តដាឆ្នាំ២០២២នេះ កម្ពុជា​ស្ថិតក្នុងចំណាត់ថ្នាក់លេខ២ ថាជាប្រទេសមានការទប់ស្កាត់ការពារកូវីដ១៩ ដើម្បី​ស្តារសេដ្ឋកិច្ច​ឲ្យងើប​ឡើងវិញបានល្អប្រសើរជាងគេនៅលើពិភពលោក។ សម្រាប់ពលរដ្ឋវិញមានមោទកភាពចំពោះប្រមុខថ្នាក់រាជរដ្ឋាភិបាល​ ហើយគេនឹងបន្ត​ចាក់វ៉ាក់សាំង​ការពារកូវីដ១៩ ដូសជម្រុញបន្តបន្ទាប់ទៀត និងបន្តរក្សា៣កុំ៣ការពារ ដើម្បីរក្សាចំណាត់ថ្នាក់​ការវាយ​តម្លៃដ៏ល្អប្រសើរនេះ។

ពលរដ្ឋថ្លែងប្រាប់BTV នៅថ្ងៃទី១៥ ខែសីហានេះ ថ្លែងថានៅដំណាច់ខែមិថុនានេះ Asia NIKKEI វាយតម្លៃកម្ពុជាស្ថិតក្នុងចំណាត់លេខ១ដោយសារកម្ពុជាទប់ស្កាត់មិនមានអ្នកឆ្លងកូវីដ១៩ថ្មី ប៉ុន្តែរហូត​ដល់ដំណាច់ខែកក្តដានេះវិញ ​កម្ពុជាស្ថិតក្នុងចំណាត់ថ្នាក់លេខ២លើពិភពលោក ដោយសារ​ក្នុងរយៈពេលនេះកម្ពុជា បានរកឃើញអ្នកឆ្លងថ្មីនៃមេរោគកូវីដអូមីក្រុងរង្វង់​២០ទៅ​៣០នាក់​ស្ទើររៀងរាល់ថ្ងៃ តែការព្យាបាលក៏មានការជាសះស្បើយវិញច្រើនហើយគ្មាន​អ្នក​ស្លាប់នោះទេ។

ពលរដ្ឋថ្លែងថា យ៉ាងណាក៏ដោយ​ យើងទាំងអស់គ្នាសូមថ្លែងអំណរគុណជាខ្លាំងដល់សម្តេចតេជោ ហ៊ុន សែន នាយករដ្ឋមន្ត្រី ដែលបានខិតខំស្វែងរកវ៉ាក់សាំងចាក់ជូនពលរដ្ឋទូទាំង​ប្រទេសបាន​ទាន់​ពេលវេលា ធ្វើឲ្យពលរដ្ឋទូទាំងប្រទេសមានប្រព័ន្ធភាពស៊ាំ ហើយពលរដ្ឋក៏បានបន្ស៊ាំខ្លួនរស់ក្នុង​បរិបទកូវីដ១៩ ដោយរក្សាបានការអនុវត្តវិធាន៣កុំ៣ការពារ ​ហើយអាចចេញប្រកបរកស៊ី ធ្វើ​អាជីវកម្ម​ជម្រុញ​កំណើនសេដ្ឋកិច្ចឡើងវិញបាន។

លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល​ បានថ្លែងថា ពាក់ព័ន្ធ​នឹងការទទួលបានចំណាត់ថ្នាក់នេះដែរ​ មួយចំណែកធំ គឺវាអាស្រ័យលើបណ្តាពលរដ្ឋចូល​រួម​សហការ ​និងមានការសម្រេចចិត្តត្រឹមត្រូវរបស់បុគ្គល និងគ្រួសារនីមួយៗដោយត្រូវរួមនាំ​គ្នាទៅ​ចាក់វ៉ាក់សាំងកូវីដ១៩ ដូសជំរុញជាបន្តទៀតរួមនឹងការអនុវត្តវិធានការ៣កុំ៣ការពារ ព្រមទាំង​កុំភ្លេចអនុវត្តការបរិភោគអាហារឆ្អិនល្អ ​ហើយកុំឲ្យប្រៃពេក កុំផ្អែមពេក​ កុំខ្លាញ់ពេកផងដែរ។

ដោយឡែកបើតាមឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍​ក៏បាន​ថ្លែងដែរថា ការទទួលបានចំណាត់ថ្នាក់ដ៏ល្អប្រសើរ​ ដែលបានផ្សព្វផ្សាយសារព័ត៌មានASIA NIKKEIទៅលើមជ្ឈដ្ឋានអន្តរជាតិនេះ ​គឺជារឿងដ៏ល្អ ​ហើយវាក៏បង្ហាញថា កម្ពុជាជាគោលដៅ​ប្រទេស ​និងទេសចរណ៍មានសុវត្ថិភាព និងរួមចំណែកទាក់ទាញមជ្ឈដ្ឋានអន្តរជាតិចាប់​អារម្មណ៍​មកទស្សនាកម្ពុជា ​ខណៈបច្ចុប្បន្នរាជរដ្ឋាភិបាលកម្ពុជា ក៏បានកែសម្រួលលក្ខខណ្ឌធ្វើចត្តាឡីស័ក​ចំពោះអ្នកដំណើរអន្តរជាតិមិនទាន់ចាក់វ៉ាក់សាំង គឺអាចមកទស្សនាកម្ពុជាបាន៕

អត្ថបទ ស៊ុម សុខជា