ភ្នំពេញ៖ ក្រុមការងារគ្រូពេទ្យនៃការិយាល័យសុខាភិបាល ស្រុកប្រតិបត្តិសែនសុខ (ហៅកាត់ OD សែនសុខ) នាព្រឹកថ្ងៃទី១៥ ខែសីហា ឆ្នាំ២០២២នេះ បានបន្តការចុះចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋចាប់ពីដូសមូលដ្ឋាន និងចាក់វ៉ាក់សាំងការពារសុខភាពសម្រាប់ទារក ​ទាំង១១មុខ នៅសហគមន៍អន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

នាឱកាសដែរវត្តមានរបស់ក្រុមការងារគ្រូពេទ្យ នៃការិយាល័យសុខាភិបាល ស្រុកប្រតិបត្តិសែនសុខ បានចុះចាក់វ៉ាក់សាំងបង្ការជំងឺកូវីដ-១៩ ​និងចាក់វ៉ាក់សាំងការពារសុខភាពសម្រាប់ទារក ក្នុង​សហគមន៍​អន្លង់ក្ងានផ្ទាល់ គឺប្រជាពលរដ្ឋក្មេង ចាស់ ប្រុស ស្រី មកទទួលការចាក់វ៉ាក់សាំង បង្ហាញ​ពីចំណាប់អារម្មណ៍សេចកី្តរំភើបសប្បាយរីករាយ​ និងអបអរសាទរ ​ចំពោះវត្តមានក្រុមគ្រូពេទ្យ និង​អំពីការ​គិតគូរយកចិត្តដាក់ពីថ្នាក់ដឹកនាំក្រសួងសុខាភិបាល ​ជាពិសេសប្រមុខរាជរដ្ឋាភិបាល ដែល​ដឹកនាំ​ដោយ​សម្តេចអគ្គមហាសេនាបតីតេជោ ​ហ៊ុន សែន នាយករដ្ឋមន្រី្ត បានតស៊ូស្វះស្វែងរក​វ៉ាក់សាំង​ពីបណ្តាប្រទេសជាមិត្ត ​ជាពិសេសគឺកម្ពុជា ទទួលបានវ៉ាក់សាំងឥតគិតថ្លៃជាជំនួយ​ពី​រដ្ឋាភិបាលចិនប្រគល់ជូនជាបន្តបន្ទាប់។

សូមរំលឹកផងដែរថា ស្របពេលដែលជំងឺកូវីដ-១៩ នៅតែបន្តរីករាលដាល ​គឺក្រសួងសុខាភិបាល ក៏ដូចមនី្ទរសុខាភិបាល ​នៃរដ្ឋបាលរាជធានីភ្នំពេញ​ បានបង្កើនការអប់រំ និងផ្សព្វផ្សាយ​ឲ្យបាន​ទូលំទូលាយជូនដល់ប្រជាពលរដ្ឋទាំងរាជធានី-ខេត្ត ឲ្យមកទទួលយកការចាក់វ៉ាក់សាំង​បង្ការ​ជំងឺកូវីដ-១៩ ឲ្យបានគ្រប់ដូស ចាប់ពីដូសមូលដ្ឋាន រហូតដល់ដូសជំរុញទី៣ ​ដូសទី៤ និងដូសទី៥ ជាពិសេសអំពីនីតិវិធីប្រតិបតិ្តស្តង់ដារសម្រាប់គ្រប់គ្រង​ ថែទាំនិង ព្យាបាលអ្នកជំងឺកូវីដ-១៩ គ្មាន​រោគសញ្ញា និងកម្រិតស្រាលនៅតាមផ្ទះផងដែរ៕អត្ថបទ រដ្ឋា