ភ្នំពេញ៖ ដើម្បីឆ្លើយតបចំពោះការរាតត្បាត នៃជំងឺកូវីដ-១៩ ជាពិសេសព្រឹត្តិការឆ្លងក្នុងសហគមន៍ ២០កុម្ភៈ ក្រោយទទួលបានការអនុញ្ញាតពីសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន ឱ្យប្រើប្រាស់កញ្ចប់ថវិកាសម្រាប់បោះពុម្ព សម្ភារអប់រំផ្សព្វផ្សាយ អគ្គលេខាធិការដ្ឋាន បានរៀបចំផលិត និង បែងចែកសម្ភារអប់រំផ្សព្វផ្សាយ បង្ការជំងឺកូវីដ -១៩ទាំងនេះ ទៅតាមសាខារទាំង២៥ រាជធានី ខេត្ត ដើម្បីចែកជូនទៅដល់ប្រជាពលរដ្ឋ នៅតាមបណ្តាខេត្តមានជ្រាប។

ជាក់ស្តែងនៅថ្ងៃទី០២ ខែមេសា ឆ្នាំ២០២១នេះ នៅទីស្នាក់ការកណ្តាលកាកបាទក្រហមកម្ពុជា បានប្រគល់ម៉ាស់ និងសម្ភារផ្សព្វផ្សាយ បង្ការជំងឺកូវីដ-១៩ បន្ថែមទៀត ទៅដល់សាខាកាកបាទក្រហមកម្ពុជា ខេត្តកំពង់ស្ពឺ និងខេត្តកំពង់ឆ្នាំង។

នៅក្នុងឱកាសប្រគល់-ទទួលសម្ភារទាំងនោះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានផ្តាំផ្ញើនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សួរសុខទុក្ខ ដោយក្តីនឹករលឹក និងការកោតសរសើរចំពោះសកម្មភាព របស់សាខាកាកបាទក្រហមកម្ពុជាទាំង២៥ រាជធានី-ខេត្ត ដែលបាននិងកំពុងចូលរួមយ៉ាងសកម្ម ក្នុងការប្រយុទ្ធនឹងជំងឺកូវីដ-១៩ តាមរយៈការអប់រំផ្សព្វផ្សាយតាមផ្ទះ, ប្រជុំក្រុមតូច, ចែកបណ្ណផ្សព្វផ្សាយ, បិទផ្ទាំងរូបភាពតាមទីសាធារណៈ, ចាក់ផ្សាយសារគន្លឹះតាមឧគ្ឃោសនស័ព្ទ, បញ្ជ្រាបសារគន្លឹះស្តីពីការបង្ហារជំងឺកូវីដ-១៩ និងការចំណាកស្រុកដោយសុវត្ថិភាព។

លោកជំទាវអគ្គលេខាធិការ បានអោយដឹងថា មេរោគកូវីដ១៩ បានយាយីដល់សកលលោក ក៏ដូចជាប្រទេសកម្ពុជា អស់រយៈពេលជាងមួយឆ្នាំមកហើយ ដែលធ្វើអោយយើងខាត់បង់ជាច្រើន។ ជាពិសេសដូចជាកាកបាទក្រហមកម្ពុជាជាដើម គឺបានខកខាននៅការប្រារព្ឋពិធីទិវា ០៨ឧសភា ដែលជាទិវាមួយជួយគៀងគររកមូលនីធី ដើម្បីផ្គត់ផ្គង់ ដល់វិស័យមនុស្សធម៌ របស់កាកបាទក្រហមកម្ពុជា។ តែទោះជាយ៉ាងណាលោកជំទាវនៅតែ កោតសសើរទៅដល់សប្បុរជននានា ដែលតែងតែផ្តល់ជំនួយគាំទ្រការងារមនុស្សធម៌ ដល់កាកបាទក្រហមកម្ពុជាជានិច្ច ក៏ដូចជាសាខាទាំងអស់ ដែលបានខិតខំប្រឹងប្រែងក្នុងសកម្មភាពគ្រៀងគរកន្លងមក។ ក្នុងការបន្តស្វែងរកថវិកាតាមលទ្ឋភាពរៀងៗខ្លួន ដើម្បីសកម្ម ភាពមនុស្សធម៌មួយនេះ សម្រាប់ជួយទៅដល់ពលរដ្ឋរងគ្រោះ និងងាយរងគ្រោះ។

សូមបញ្ជាក់ថា ជំនួយដែលផ្តល់ទៅតាមបណ្តាសាខានីមួយៗ ទទួលបានម៉ាស់ចំនួន១ម៉ឺនម៉ាស់, បណ្ណ​ប្រកាស “៣ការពារ និង ៣កុំ ២ចូលរួម” ចំនួន ៥០០សន្លឹក, បណ្ណប្រកាស“រស់នៅធម្មតា តាមបែបគន្លងថ្មី” ចំនួន ៥០០សន្លឹក។

គួររំលឹកថាកាលពីថ្ងៃ ទី១៨ ខែមីនា ឆ្នាំ២០២១កន្លងទៅ ទីស្នាក់ការកណ្តាលបានបែងចែកជូន សាខារាជធានី-ខេត្ត ចំនួន២០ ដែលប៉ះពាល់ដោយ “ព្រឹត្តិការណ៍ឆ្លងក្នុងសហគមន៍២០កុម្ភៈ” និងមានជំងឺកូវីដ-១៩ ដោយទទួលបានបណ្ណប្រកាសប្រភេទនីមួយៗចាប់ពី ១ពាន់ ដល់ ៣ពាន់សន្លឹក ក្នុងមួយសាខាៗ។ ដោយឡែក ខេត្តចំនួន៥ ដែលពុំមានករណីជំងឺកូវីដ-១៩ ទទួលបានបណ្ណប្រកាសប្រភេទនីមួយៗចំនួន ១ពាន់សន្លឹក ក្នុងមួយសាខាៗ៕ អត្ថបទ៖ ស ងីម