អាហ្វហ្គានីស្ថាន៖ នៅថ្ងៃចន្ទនេះជាខួបមួយឆ្នាំ ចាប់តាំងពីក្រុមតាលីបង់ចូលកាន់អំណាចក្នុងប្រទេសអាហ្វហ្គានីស្ថាន ប៉ុន្តែមេដឹកនាំក្រុមតាលីបង់នៅតែស្ថិតក្រោមការរិះគន់ពីអន្តរជាតិកាន់តែខ្លាំងឡើង ចំពោះការរឹតត្បិតសិទ្ធិក្មេងស្រី និងស្ត្រី។
ក្រុមអ៊ីស្លាមនិយមនេះបានចូលកាន់កាប់រដ្ឋធានីកាប៊ុលកាលពីថ្ងៃទី១៥ ខែសីហា ឆ្នាំ២០២១ ក្នុងពេលមានការដកទ័ពអាមេរិកចេញពីប្រទេស។ មេដឹកនាំក្រុមតាលីបង់បានបន្តការគ្រប់គ្រងឡើងវិញ ដោយអនុវត្តតាមការបកស្រាយច្បាប់អ៊ីស្លាម។ ពួកគេបានប្រកាសកាលពីដើមឆ្នាំថា ស្ត្រីត្រូវបិទបាំងខ្លួនពីក្បាលដល់ចុងជើងរួមទាំងមុខរបស់ពួកគេ នៅពេលពួកគេស្ថិតនៅក្នុងទីសាធារណៈ។ មេដឹកនាំក្រុមនេះក៏មិនអនុញ្ញាតឱ្យក្មេងស្រីចូលរៀននៅថ្នាក់អនុវិទ្យាល័យ ដោយបាននិយាយថា បរិស្ថានត្រឹមត្រូវគួរតែត្រូវបានរៀបចំជាមុន។ ក្រុមតាលីបង់មិនបានបំពេញតាមការទាមទារម្តងហើយម្តងទៀតរបស់អង្គការសហប្រជាជាតិ និងប្រទេសដទៃដែលថា ពួកគេត្រូវតែធ្វើឲ្យប្រសើរឡើងស្ថានភាពនៅក្នុងប្រទេសនេះ ខណៈគ្មានប្រទេសណាមួយក្រៅពីអាហ្វហ្គានីស្ថានខ្លួនឯង បានទទួលស្គាល់ភាពស្របច្បាប់នៃការគ្រប់គ្រងរបស់ក្រុមតាលីបង់នោះទេ។
សេដ្ឋកិច្ចរបស់ប្រទេសអាហ្វហ្គានីស្ថានស្ថិតក្នុងស្ថានភាពលំបាកខ្លាំង ខណៈប្រទេសនេះមិនអាចទទួលបានជំនួយអន្តរជាតិ។ អាហ្វហ្គានីស្ថានក៏កំពុងប្រឈមនឹងការខ្វះខាតស្បៀងអាហារធ្ងន់ធ្ងរផងដែរ។ កម្មវិធីស្បៀងអាហារពិភពលោកបាននិយាយកាលពីខែឧសភាថា មនុស្ស 18.9លាននាក់នៅក្នុងប្រទេសកំពុងប្រឈមអសន្តិសុខស្បៀងធ្ងន់ធ្ងរ។ មេដឹកនាំក្រុមតាលីបង់កំពុងស្វែងរកជំនួយហិរញ្ញវត្ថុអន្តរជាតិ ហើយបានអំពាវនាវឱ្យទ្រព្យសម្បត្តិរបស់ប្រទេស ដែលត្រូវបានបង្កកនៅក្រៅប្រទេសត្រូវបានបញ្ចេញ។ ទ្រព្យសម្បត្តិរបស់ប្រទេសអាហ្វហ្គានីស្ថាននៅក្នុងសហរដ្ឋអាមេរិក និងប្រទេសផ្សេងទៀតត្រូវបានបង្កក បន្ទាប់ពីការចូលកាន់កាប់របស់ក្រុមតាលីបង់៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
