កោះកុង៖ អាជ្ញាធរស្រុកបូទុមសាគរ លើកសរសើរអំពីគុណបំណាច់របស់អតីតយុទ្ធជន ដែលបាន​លះបង់គ្រប់ បែបយ៉ាងដើម្បីសុខសន្តិភាព និងការអភិវឌ្ឍ​ពេញលេញជូនមាតុភូមិមក​ទល់សព្វថ្ងៃនេះ។

ក្នុងពិធីសួរសុខទុក និងចែកអំណោយរបស់សប្បុរសជនជូនគ្រួសារអតីតយុទ្ធជន ចាស់ជរា និង សិស្សានុសិស្សជាង៥០០នាក់ នៅថ្ងៃទី១៥ ខែសីហា នេះ លោក ហាក់ ឡេង អភិបាលស្រុក​បូទុមសាគរ បានលើកឡើងថា ​អតីតយុទ្ធជន ជាក្រុមជនដែលមានគុណ​បំណាច់ចំពោះជាតិមាតុភូមិ ជានិមិត្តរូប នៃ ស្មារតីនៃការលះបង់ ​និងពលីកម្មគ្រប់បែបយ៉ាង ដើម្បីសង្គមជាតិបានសុខសន្តិភាព ក៏ដូចជាការអភិវឌ្ឍ ពេញលេញ ។

លោក បានបន្ថែមថា ការលះបង់របស់អតីតយុទ្ធជន និងចាស់ជរាជំនាន់មុនៗ ​សុទ្ធតែត្រូវបានចារិក ទុកនូវគំរូវីរភាពដ៏ឧត្តុងឧត្តម​របស់ពួកគេ ​សម្រាប់យុវជនជំនាន់ក្រោយបានដឹង​ ស្វែងយល់ យក​គំរូតាម។ តបនឹងគុណបំណាច់នេះដែរ រាជរដ្ឋាភិបាលកម្ពុជា បានចំណាយថវិកាជាង ៣០០ពាន់លានរៀលក្នុង១ ឆ្នាំៗ ​ទៅលើវិស័យអតីតយុទ្ធជន ។

បើតាមអាជ្ញាធរស្រុកបូទុមសាគរ កាលថ្មីៗនេះ សម្តេចតេជោ ហ៊ុន សែន នាយករដ្ឋមន្រ្តី ជំរុញ ឱ្យ​មានចលនាថ្មីមួយទៀត គឺចលនាកសាងលំនៅដ្ឋនជូនដល់អតីតយុទ្ធជនកម្ពុជានៅទូទាំងប្រទេស ក្នុង ន័យសំដៅលើកកម្ពស់ជីវភាពរស់នៅប្រកបដោយ​សុខដុមរមនា​បន្តទៀត៕

អត្ថបទ៖ ឈឹម មករា