​វាយ​កូន​បាល់​៖ កីឡាករ​​អេ​ស្ប៉ា​ញ Pablo Cerreno Busta បាន​គ្រង​ជើងឯក​នៅក្នុង​ព្រឹត្តិការណ៍ Masters 1000 ជា​លើកដំបូង​ក្នុង​អាជីប ក្រោយ​យកឈ្នះ​កីឡាករ​ប៉ូឡូញ Hubert Hurkacz នៅ​វគ្គ​ផ្តាច់ព្រ័ត្រ​លើក​ពាន Canadian Open​។

​​កីឡាករ​វ័យ ៣១ឆ្នាំ Cerreno Busta ត្រូវ​តាម​ពីក្រោយ​មួយ​សិត​បន្ទាប់ពី Hurkacz យកឈ្នះ​សិត​ដំបូង ៦-៣ មុន​ពេលដែល​កីឡាករ​អេ​ស្ប៉ា​ញ Cerreno Busta វាយបក​យកឈ្នះ​វិញ​ពីរ​ផ្ទួនៗ ៦-៣ និង ៦-៣​។ ​Pablo Cerreno Busta បាន​ក្លាយជា​កីឡាករ​ដែលមាន​ចំណាត់ថ្នាក់​ក្នុង​កម្មវិធី​ដំបូង ​ដែល​ឈ្នះ​ពាន​នេះរាប់​តាំងពី​ឆ្នាំ២០០២ ដែល​ធ្វើបាន​ដោយ​កីឡាករ​អា​ហ្ស​ង់​ទីន Guillermo Canas​។ ​នេះ​ជា​ពាន​នៅក្នុង​ក្របខណ្ឌ ATP Tour លើក​ទី៧ សំរាប់ Busta តែ​ជា​លើកដំបូង​សំរាប់​ព្រឹត្តិការណ៍ Masters 1000​។

​​ងាក​មក​ការប្រកួត​ផ្នែក​នារី​វិញ កីឡាការិនី​រ៉ូ​ម៉ា​នី Simona Halep បាន​ក្លាយជា​ជើងឯក Canadian Open នេះ​ជា​លើក​ទី៣ ក្នុង​អាជីព​ក្រោយ​យកឈ្នះ​កីឡាការិនី​ប្រេ​ស៊ី​ល Beatriz Haddad Maia នៅ​វគ្គ​ផ្តាច់ព្រ័ត្រ​។ ​ជើងឯក Wimbledon ឆ្នាំ២០១៩ វ័យ ៣០ឆ្នាំ Simona Halep បាន​យកឈ្នះ​ដោយ​លទ្ធផល ២សិត​ទល់នឹង១ ពិន្ទុ ៦-៣, ២-៦ និង ៦-៣​។ រំលឹកថា Simona Halep បាន​ធ្លាក់​ពី​ចំណាត់ថ្នាក់​លេខ២ ពិភពលោក​រហូតដល់​លេខ២០ បន្ទាប់ពី​អវត្តមាន​ច្រើន​កម្មវិធី​រដូវ​កាល​មុន​ដោយសារ​របួស​។ ​ជ័យជំនះ​នេះដែរ​បានធ្វើឱ្យ Simona Halep ឡើងមក​កាន់​លំដាប់ថ្នាក់​លេខ៦ ពិភពលោក​វិញ​ផងដែរ​នៅ​ថ្ងៃ​ចន្ទ​នេះ​៕

​អត្ថបទ​៖​នាង សុភា​វុ​ធ