ភ្នំពេញ៖ សហព័ន្ធ​សេវាអប់រំ​នៅកម្ពុជា ដែល​មាន​គ្រឹះស្ថានសិក្សាជាសមាជិកប្រមាណ ១០០​គ្រឹះស្ថាន លើក​ឡើង​ជា​ការ​ជំរុញ​ឱ្យគ្រឹះស្ថានសិក្សាចាប់យកបច្ចេកវិទ្យាឌីចីថល ទាំងក្នុងការបង្រៀន និងរៀន រួម​ទាំង​ការ​គ្រប់គ្រង​ទូទៅ​ក្នុង​គ្រឹះស្ថាន​សិក្សាផងដែរ។ នេះជាការលើកឡើងក្នុងឱកាសសិក្ខាសាលា ដែល​និយាយ​ពីការ​លើក​កម្ពស់​គុណភាព​សិក្សា​តាម​រយៈការពង្រឹងនវានុវត្តន៍ និងសហគ្រិនភាព។

ការអប់រំបែបឌីជីថល បានក្លាយជាផ្នែកសំខាន់ក្នុងវិស័យអប់រំនៅកម្ពុជា ជាពិសេសគឺតាំងពីពេលមានវត្តមានកូវីដ-១៩ ដែល​ឈានដល់ការបិទសាលារៀនទូទាំងប្រទេស។ ពាក់ព័ន្ធនឹងការអប់រំ តាមបែបឌីជីថលនេះ គឺក្រសួងអប់រំ នៅតែបន្តជំរុញទោះសព្វថ្ងៃសាលារៀនបានបើកដំណើរការវិញយ៉ាងណាក្ដី។

ពាក់ព័ន្ធនឹងការអប់រំឌីជីថលនេះ លោក គង់ សំនៀង សមាជិកក្រុមប្រឹក្សាភិបាល សហព័ន្ធសេវាអប់រំនៅកម្ពុជា លើកឡើងថា បច្ចុប្បន្នគ្រឹះស្ថានសិក្សាត្រូវតែកែប្រែដោយចាប់យកការអប់រំ និងគ្រប់គ្រងកិច្ចការទូទៅក្នុងគ្រឹះស្ថាន​សិក្សា​របស់ខ្លួន តាមប្រព័ន្ធឌីជីថល។ លោកថា ការចាប់យកបច្ចេកឌីជីថល មកប្រើប្រាស់ក្នុងវិស័យអប់រំ គឺនឹងផ្ដល់នូវភាពងាយស្រួល និងសារៈប្រយោជន៍ច្រើនសម្រាប់គ្រឹះស្ថាន សិស្ស ក៏ដូចជាអាណាព្យាបាលផងដែរ។

ជុំវិញ​ការលើកទឹកចិត្តឱ្យគ្រឹះស្ថានសិក្សាចាប់យក ការអប់រំឌីជីថលនេះ លោកក៏លើកឡើងដែរថា ចំពោះ​គ្រឹះស្ថាន​សិក្សា ដែលពុំទាន់មានលទ្ធភាពក្នុងការផ្លាស់ប្ដូរទាំងស្រុង ក៏គួរចាប់យកផ្នែកណាមួយ នៃបច្ចេកវិទ្យាឌីជីថល​មក​ប្រើ​ប្រាស់​ក្នុងការអប់រំ របស់ខ្លួនផងដែរ។

វិស័យ​អប់រំបែបឌីជីថល សព្វថ្ងៃក៏មានក្រុមហ៊ុនមួយចំនួនបាននឹងកំពុងធ្វើលើការងារនេះផងដែរ។ ជាក់ស្ដែង​លោក ងន់ ម័រ ជាស្ថាបនិកក្រុមហ៊ុន POSCAR Digital ( ផូស្កា ឌីជីថល) ក៏​បាន​រួមចំណែកជាមួយក្រសួងអប់រំ បង្កើត​នូវ​កម្មវិធីឌីជីថល ដែល​ផ្ដល់​ភាពងាយស្រួលក្នុងវិស័យអប់រំផងដែរ។

ការ​អប់រំឌីជីថល កន្លងទៅឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ​យុវជន និងកីឡា ក៏ធ្លាប់លើកឡើងដែរថា វិបត្តិកូវីដ-១៩ បានធ្វើឱ្យវិស័យអប់រំ​នៅកម្ពុជាមានលទ្ធភាពផ្លាស់ប្ដូរពីការអប់រំតាមបែបប្រពៃណី ទៅជាការអប់រំបែប​ឌីជី​ថល បានយ៉ាងលឿន។ ការផ្លាស់ប្ដូរនេះ គឺលឿនជាងផែនការ ប្រមាណ ១០ឆ្នាំ៕ អត្ថបទ៖ គឹមហុក