ភ្នំពេញ៖ ក្រសួងសុខាភិបាល បានស្នើដល់អភិបាលរាជធានីភ្នំពេញ ចាត់វិធានការចំពោះការប្រើប្រាស់រថយន្ត​គិលាន​សង្គ្រោះ ខុសពីការណែនាំរបស់ក្រសួងសុខាភិបាល របស់ម្ចាស់គ្លីនិកឯកជន និងតែងតែយករថយន្តគិលាន​សង្គ្រោះ​របស់​ខ្លួន​ទៅដឹកអ្នករងរបួស ដោយសារគ្រោះថ្នាក់ចរាចរណ៍តាមដងផ្លូវ មកព្យាបាលនៅក្នុងគ្លីនិករបស់ខ្លួន រួមទាំង​ការយក​ឡានពេទ្យមិនមានសញ្ញាសម្គាល់ និងមិនមានឈ្មោះគ្លីនិកត្រឹមត្រូវ ច្បាស់លាស់ទៅដឹកអ្នករងរបួស​ដោយ​គ្រោះ​ថ្នាក់ចរាចរណ៍ ឬសាកសពនៅតាមដងផ្លូវ។

យោងតាមលិខិតរបស់ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល នៅថ្ងៃទី១៥ ខែសីហា ឆ្នាំ២០២២នេះ បានឱ្យដឹងថា រយៈកាលកន្លងមកក្រសួងសុខាភិបាល បានធ្វើសារាចរណែនាំជាច្រើនលើកច្រើនសាររួចមកហើយ អំពីការហាមឃាត់មិនអនុញ្ញាត ឱ្យគ្លីនិកឯកជន យករថយន្តគិលានសង្គ្រោះ របស់ខ្លួនទៅដឹកអ្នករងរបួស ដោយ​គ្រោះ​ថ្នាក់​ចរាចរតាមដងផ្លូវមកព្យាបាល នៅក្នុងគ្លីនិករបស់ខ្លួនជាដាច់ខាត។

ក្នុងលិខិតបានបន្តថា ប៉ុន្តែបច្ចុប្បន្ននេះ សង្កេតឃើញមានគ្លីនិកឯកជនមួយចំនួន មិនបានអនុវត្តទៅតាមសារាចរ​ណែ​នាំ របស់ក្រសួងសុខាភិបាលឡើយ ដោយនៅតែបន្តធ្វើសកម្មភាព យករថយន្តគិលានសង្គ្រោះគ្លីនិក​ឯកជន​របស់​ខ្លួន ទៅ​ដឹកអ្នករងរបួសដោយគ្រោះថ្នាក់ចរាចរតាមដងផ្លូវ យកមកព្យាបាលនៅក្នុងគ្លីនិកទៀត។

លិខិតដដែលបន្ថែមថា ជាមួយគ្នានោះ ក្រសួងក៏ឃើញមានឡានពេទ្យឯកជនមួយចំនួនទៀត ដែលពុំមានឈ្មោះគ្លីនិក ទៅ​ដឹកអ្នកគ្រោះថ្នាក់ចរាចរ និងសាកសពគ្រោះថ្នាក់ចរាចរនៅតាមដងផ្លូវរហូតដល់មានការឈ្លោះប្រកែកដណ្ដើមគ្នា ដឹក​យ៉ាងអនាធិបតេយ្យ ដែលជាកត្តាមួយជះឥទ្ធិពលមិនល្អ ដល់វិស័យសុខាភិបាលទាំងមូល និងសេចក្ដីថ្លៃថ្នូរបស់​គ្រូពេទ្យ​ដទៃទៀត ហើយក៏មានរថយន្តគិលានសង្គ្រោះមួយចំនួនទៀត ដែលពុំមានអាជ្ញាបណ្ណពីក្រសួងសុខាភិបាល និង​ពុំ​មានឈ្មោះ​គ្លីនិកច្បាស់លាស់ ដែលកំពុងធ្វើចររាចរណ៍ តាមដងផ្លូវផងដែរ។

យោងតាមលិខិតមួយទៀត នៅថ្ងៃដដែលនេះ ក្រសួងសុខាភិបាល បានផាកពិន័យទៅលើមន្ទីរពហុព្យាបាល ម្លិះដង្កោ ស្ថិត​នៅផ្លូវលេខ​២១៧ សង្កាត់ដង្កោ ខណ្ឌដង្កោ ចំនួន ១០លានរៀល ចំពោះកំហុសឆ្គងដែលមាន និងបញ្ជាឲ្យបញ្ឈប់​ជា​​បន្ទាន់ ការយករថយន្តគិលានសង្គ្រោះរបស់ខ្លួន ទៅដឹកអ្នករបួសដោយគ្រោះថ្នាក់ចរាចរណ៍នៅតាមដងផ្លូវ៕ អត្ថបទ៖ បាន សុខរិទ្ធិ