បាល់ទាត់៖ ពានរង្វាន់សម្ដេចតេជោ ហ៊ុន សែន លើកទី១៦ (ថ្នាក់ជាតិ) ឆ្នាំ២០២២ នឹងធ្វើការប្រកួតជើងទី២ នៃវគ្គ ១៦ក្រុមចុងក្រោយនាថ្ងៃទី១៧ ខែសីហាស្អែកនេះដើម្បីស្វែងរកបេក្ខភាព ៤ក្រុមចុងក្រោយឡើងបង្គ្រប់កៅអីវគ្គ ៨ក្រុមចុងក្រោយ ខណៈមាន ៤ក្រុមកំពុងឈរចាំរួមមានក្រុមព្រះខ័នរាជស្វាយរៀង វិសាខា ណាហ្គាវើលដ៏ និងក្រុមបឹងកេត។
សម្រាប់កម្មវិធីប្រកួតជើងទី២ នៃវគ្គ ១៦ក្រុមចុងក្រោយស្អែកនេះគឺមាន ៤គូ ដែលត្រូវប្រកួតនាវេលាម៉ោង ៣៖៣០នាទីរសៀលដូចគ្នា រួមមានក្រុមអង្គរថាយហ្គឺរជួបក្រុមកោះកុងអេហ្វស៊ីនៅកីឡដ្ឋានហនុមាន, ក្រុមភ្នំពេញក្រោនបើកទ្វារកីឡដ្ឋាន RSN ទទួលក្រុមព្រៃវែង, ក្រុមកងយោធពលខេមរភូមិន្ទជួបក្រុមភ្ញៀវនគរបាលជាតិនៅកីឡដ្ឋានស្ដាតចាស់ និងក្រុមគិរីវង់បើកទ្វារផ្ទះទទួលក្រុមអគ្គិសនីកម្ពុជា។ សូមរំឭកថា ក្នុងចំណោម ៤ប្រកួតនេះភាគច្រើនក្រុមសមាជិកលីគកំពូលកម្ពុជាគឺទទួលបានជ័យជម្នះ លើកលែងតែក្រុមគិរីវង់ប៉ុណ្ណោះដែលរងបរាជ័យក្រោមថ្វីជើងក្រុមលីគទី២ អគ្គិសនីកម្ពុជាក្នុងលទ្ធផល ៣-២។ រីឯ ៣គូទៀតក្រុមអង្គរថាយហ្គឺរបានយកឈ្នះក្រុមកោះកុងអេហ្វស៊ី ២-១, ភ្នំពេញក្រោនយកឈ្នះក្រុមព្រៃវែង ១-០ និងក្រុមកងយោធពលខេមរភូមិន្ទបានយកឈ្នះក្រុមនគរបាលជាតិ ក្រៅដី ក្នុងលទ្ធផល ២-១។
តាមរយៈលទ្ធផលនេះ ក្រុមនីមួយៗសុទ្ធតែនៅមានឱកាសច្រើនក្នុងការប្រជែងកៅអីវគ្គបន្ដ ដ្បិតក្រុមឈ្នះគឺមានប្រៀបតែ ១គ្រាប់ ខណៈក្រុមចាញ់ក៏ចាញ់ប្រៀបតែ ១គ្រាប់ដែរ។ ហេតុនេះការប្រកួតជើងទី២ ស្អែកនេះគឺជាជំនួបដ៏ស្វិតស្វាញដើម្បីកាត់សេចក្ដីរកបេក្ខភាពបង្គ្រប់កៅអីវគ្គ ៨ក្រុមចុងក្រោយ។ ដូច្នេះចាំមើលតើក្រុមណាខ្លះនឹងត្រូវឡើងទៅជួបក្រុមព្រះខ័នរាជស្វាយរៀង វិសាខា ណាហ្គាវើលដ៏ និងបឹងកេតនៅវគ្គបន្ដ?
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
