កំពង់ស្ពឺ៖ រដ្ឋបាលខេត្តកំពង់ស្ពឺ នៅថ្ងៃទី០២ ខែមេសា បានដាក់ចេញនូវវិធានការផ្អាកការជួបជុំ ផ្អាកសកម្មភាពអាជីវកម្មដូចជាភោជនីយដ្ឋាន អាហារដ្ឋាន តូបអាហារចល័ត ហាងលក់ភេសជ្ជៈ ដែលបើកបម្រើអតិថិជន ជាបណ្ដោះអាសន្ន រយះពេលពីរសប្តាហ៍ ចាប់ពីម៉ោង៨យប់ ដល់ម៉ោង៥ភ្លឺ ។ នេះបេីតាមសេចក្តីណែនាំរបស់រដ្ឋបាលខេត្តកំពង់ស្ពឺ។​

សេចក្ដីណែនាំរបស់រដ្ឋបាលខេត្តកំពង់ស្ពឺ ស្តីការអនុវត្តវិធានការរដ្ឋបាលជាបណ្តោះអាសន្ន ដែលចាប់អនុវត្តពីថ្ងៃទី០២ ដល់ទី១៥ ខែមេសា ដើម្បីទប់ស្កាត់ការឆ្លងរីករាលដាលជំងឺកូវីដ១៩ក្នុងភូមិសាស្ដ្រខេត្តកំពង់ស្ពឺ។

សេចក្តីណែនាំដដែលបញ្ជាក់ថា  រាល់ការជួបជុំ ឬការប្រមូលផ្ដុំមនុស្សត្រូវបានលើកលែ ងក្នុងករណីចាំបាច់ ក្នុងនោះមានដូចជា សកម្មភាពអាជីវកម្មតាមភោជនីយដ្ឋាន អាហារដ្ឋាន តូបអាហារចល័ត អាចបម្រើសេវាកម្មជាលក្ខណៈវេចខ្ចប់, ការជួបជុំលក្ខណៈសមាជិកគ្រួសារដែលរស់នៅក្នុងលំនៅឋាន ឬទីសំណាក់ជាមួយគ្នា, ការរៀបចំពិធីបុណ្យសព ដោយគោរពតាមវិធានសុខាភិបាល និងតាមការកំណត់របស់អាជ្ញាធរមានសមត្ថកិច្ច, ការជួបជុំរបស់បុគ្គលិកសុខាភិបាល ដែលបំពេញការងារថែរក្សាសង្គ្រោះបន្ទាន់ផ្សេងទៀត និងការជួបជុំរបស់អាជ្ញាធរមានសមត្ថកិច្ច កម្លាំងគណៈបញ្ជាការឯកភាពរដ្ឋបាលខេត្ដ ក្រុង ស្រុក ឃុំ សង្កាត់ ក្នុងការបំពេញភារកិច្ច ថែរក្សាសន្ដិសុខសណ្ដាប់ធ្នាប់ និងរបៀបរៀបរយសាធារណៈ។

សេចក្តីណែនាំដដែលនេះបន្តថា គ្រប់ម្ចាស់អាជីវកម្ម និងប្រជាពលរដ្ឋទាំងឡាយណា ដែលមិនចូលរួមអនុវត្តតាមខ្លឹមសារនៃសេចក្ដីណែនាំនេះ រដ្ឋបាលខេត្ត នឹងអនុវត្តវិធានការរដ្ឋបាលតាមផ្លូវច្បាប់ ដូចបានកំណត់ក្នុងច្បាប់ស្ដីពីវិធានការទប់ស្កាត់ការឆ្លងរីករាលដាល នៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ព្រមទាំងលិខិតបទដ្ឋានគិតយុត្តពាក់ព័ន្ធជាធរមាន ខណ:កំពង់ស្ពឺ ជាខេត្តដែលបានដាក់ចេញនូវវិធានការបណ្ដោះអាសន្ន ដើម្បីទប់ស្កាត់ការឆ្លងរីករាលដាលជំងឺកូវីដ១៩ បន្ទាប់ពីរាជធានីភ្នំពេញ៕ អត្ថបទ៖ សេក ឧត្តម