ភ្នំពេញ៖ រាជរដ្ឋាភិបាលកម្ពុជា បាននិងកំពុងខិតខំប្រឹងប្រែង ហើយគ្រោងនឹងដំឡើង​ប្រាក់ខែ​ជូនគ្រូ​បង្រៀននៅតាមសាលារៀនសាធារណៈនៅឆ្នាំ២០២៣ ​យ៉ាងហោចណាស់តិចបំផុតនឹងទទួលបាន ១លាន៥សែនរៀល ខណៈគិតត្រឹមឆ្នាំ២០២២នេះ ​ទទួលប្រាក់ខែទាបបំផុត ​១លាន ២សែនរៀល រួមទាំង​មានប្រាក់ឧបត្ថម្ភមួយចំនួនផងដែរ ។

ក្នុងសន្និសីទស្តីពី សមិទ្ធផលសម្រេចបានរយៈពេល៥ឆ្នាំ របស់ក្រសួងអប់រំ យុវជន និងកីឡា រៀបចំ​ដោយអង្គភាពអ្នកនាំពាក្យរាជរដ្ឋាភិបាល ​នាថ្ងៃទី១៦ ខែសីហា ឆ្នាំ២០២២​ ឯកឧត្តមឯកឧត្តម រស់ សុវាចា អ្នកនាំពាក្យក្រសួង មានប្រសាសន៍ថា ក្រសួងអប់រំបានបន្តលើកកម្ពស់ ​គុណភាព និង​ជីវភាព​របស់គ្រូបង្រៀន ​ដោយបានយកចិត្តទុកដាក់ធ្វើការជាមួយក្រសួងសេដ្ឋកិច្ច ​និងហិរញ្ញវត្ថុ បន្តបង្កើនប្រាក់ខែជូនគ្រូបង្រៀនទៅតាមលទ្ធភាព ​របស់រាជរដ្ឋាភិបាល ។

ឯកឧត្តមបានបន្តថា នៅឆ្នាំ២០១៥ គ្រូបង្រៀនទទួលបានប្រាក់ខែចំនួន ចន្លោះពី៥សែនរៀល ដល់១លាន ​២សែនរៀល ហើយនៅឆ្នាំ២០២២ ​ប្រាក់ខែទទួលបានចន្លោះពី​ ១លាន២សែនរៀល ទៅ​២លាន១សែនរៀល ហើយចាប់ពីដើមឆ្នាំ២០២៣ ​នឹងទទួលបាន ​១លាន ៥សែនរៀលយ៉ាងតិច ។

ឯកឧត្តម រស់ សុវាចា ​បានបន្ថែមថា បច្ចុប្បន្នដំណើរការសាលារៀននៅទូទាំងប្រទេស បាន​និង​កំពុងប្រព្រឹត្តិទៅដោយរលូន តាមការគ្រោងទុក បែបគន្លងប្រក្រតីភាពថ្មីនៃវិស័យអប់រំ ដោយ​សិស្សានុសិស្សគ្រប់កម្រិតថ្នាក់​ បានអនុវត្តការរៀនពេញលេញនៅទូទាំងប្រទេស រួមទាំង​បន្តអនុវត្តនូវវិធានការ៣ការពារ ៣កុំ យ៉ាង​ខ្ជាប់ខ្ជួន ។

គួរបញ្ជាក់ថា គិតត្រឹមឆ្នាំសិក្សា២០២១-២០២៣ ​កម្ពុជាមានសាលាមត្តេយ្យសិក្សា និង​សាលារៀនចំណេះដឹងទូទៅទាំងសាធារណៈ ​និងឯកជន ១៨ ៤៣០ និងមាន​សិស្សកំពុង​សិក្សាចំនួនជាង ៣លាន ៥សែននាក់ ៕ អត្ថបទ បាន សុខរិទ្ធិ