ភ្នំពេញ៖ បច្ចុប្បន្នសាលារៀនទូទាំងប្រទេស គឺបានបើកដំណើរការទាំងស្រុង ពុំមានបញ្ហាបិទសាលាដោយសារកូវីដ-១៩ទៀតនោះទេ។

ទោះសាលារៀនបើកដំណើរការទាំងស្រុងក្ដី សិស្សនៅតែបន្តប្រើប្រាស់ការអប់រំឌីជីថល សម្រាប់ការស្វ័យសិក្សា ព្រោះការអប់រំឌីជីថលនេះ បានជួយច្រើនដល់ការសិក្សារបស់ខ្លួន។

ការអប់រំតាមប្រព័ន្ធឌីជីថល សព្វថ្ងៃកាន់តែមានសម្បូរបែប ដោយមានជាច្រើនទម្រង់បង្កើតដោយ ក្រសួងអប់រំ យុវជន និងកីឡា និងមានការចូលរួមបង្កើតពីខាងវិស័យឯកជនជាច្រើនផងដែរ។ ការអប់រំបែបឌីជីថលនេះ សព្វថ្ងៃគឺនៅតែមានសារៈសំខាន់សម្រាប់ការសិក្សា ទោះសាលារៀនបើកដំណើរការវិញយ៉ាងណាក្ដី។ នេះជាការលើកឡើងរបស់សិស្សថ្នាក់ទី ១២ ដែលសិក្សានៅវិទ្យាល័យ ហ៊ុនសែនសេរីភាព ស្ថិតក្នុងក្រុងតាខ្មៅ។

សិស្សានុសិស្សមួយចំនួន នៅតែបន្តប្រើប្រាស់ប្រព័ន្ធអប់រំឌីជីថល ជាប្រចាំថ្ងៃ នៅពេល​ទំនេរពីការសិក្សានៅក្នុងថ្នាក់រៀន។ ការអប់រំឌីជីថល ជាទម្រង់អប់រំបន្ថែមសម្រាប់ស្វ័យសិក្សា ដោយផ្ទុកនូវឯកសារលំហាត់ វីដេអូបង្រៀន​ និងធនធានសំខាន់ជាច្រើនទៀត ដែលពិតជារួមចំណែកធ្វើឱ្យការសិក្សាកាន់តែប្រសើរ។

ការអប់រំតាមប្រព័ន្ធឌីជីថល បច្ចុប្បន្នគឺមានច្រើនដែលផ្ដល់ជាជម្រើស និងភាពងាយស្រួលកាន់​តែច្រើន​សម្រាប់សិស្ស ដោយសិស្សខ្លះសិក្សាតាមប្រព័ន្ធហ្វេសប៊ុក យូធូប រឺតាមកម្មវិធីទូរស័ព្ទផ្សេងៗ។

ពាក់ព័ន្ធនឹងរឿងនេះ សម្រាប់កម្មវិធី Moeys E-Learning ដែលបង្កើតដោយក្រសួងអប់រំ និង​សហភាព​សហព័ន្ធយុវជនកម្ពុជា សព្វថ្ងៃ មានការប្រើប្រាស់ប្រមាណជិត ​៣២ម៉ឺននាក់។

កម្មវិធីនេះ គឺមានការបង្រៀនគ្រប់កម្រិតថ្នាក់ ហើយបច្ចុប្បន្នគឺមានបន្ថែមផ្តោតលើ ការប្រឡង​សញ្ញាបត្រមធ្យមសិក្សាទុតិយភូមិ ជាពិសេសសម្រាប់សិស្សថ្នាក់ទី ១២។

ក្រុមការងារ Moeys E-Learning លើកឡើងថែមថា ជារួមកម្មវិធីនេះ គឺមានចំនួនអ្នកប្រើប្រាស់ថ្មី ប្រមាណជិត ២០០ទៅជិត៣០០នាក់ រៀងរាល់ថ្ងៃ៕

អត្ថបទ៖គឹមហុក