កំពង់ធំ៖ ទីបំផុតកងរាជអាវុធហត្ថ បានសម្រេចឃាត់ខ្លួនមន្រ្តីរបស់ខ្លួនពីរនាក់ នៅខេត្តកំពង់ធំ ក្រោយជាប់សង្ស័យថា បានធ្វើឲ្យមនុស្សស្លាប់ បន្ទាប់ពីធ្វើប្រតិបត្តិការបង្រ្កាបកន្លែងជល់មាន់​តាម​អនឡាញខុសច្បាប់មួយកន្លែង នៅស្រុកបារាយ៍ ខេត្តកំពង់ធំ។ នេះបើតាមសេចក្តីប្រកាសព័ត៌មាន របស់កងរាជអាវុធហត្ថលើ ផ្ទៃប្រទេសដែលបានចេញនៅព្រឹកថ្ងៃទី១៦ ខែសីហានេះ។

សេចក្តីប្រកាសព័ត៌មាន បានឱ្យដឹងថា នៅព្រឹកថ្ងៃទី១៦ ខែសីហានេះ កងរាជអាវុធហត្ថលើ​ផ្ទៃ​ប្រទេស បានឃាត់ខ្លួនយោធិននៃកងរាជអាវុធហត្ថខេត្តកំពង់ធំ ដែលពាក់ព័ន្ធនឹងការ​ប្រព្រឹត្តអំពើ​ល្មើស ចំនួន២រូប រួមមាន ១- ឈ្មោះ សុខ ម៉េងហុង ឋានៈអនុសេនីយ៍ឯក មុខងារនាយការិយាល័យ​ព្រហ្មទណ្ឌ និងទី២- ឈ្មោះ លុយ តាំងឈួយ​ ឋានៈអនុសេនីយ៍ឯក មុខងារប្រធានអង្គភាព​នគរបាល​យុត្តិធម៌។ ទាក់ទងនឹងករណីនេះ កងរាជអាវុធហត្ថ នឹងធ្វើសន្និសីតសារព័ត៌មាន​នៅ​ថ្ងៃស្អែកនេះ នៅបញ្ជាការកងរាជ អាវុធហត្ថខេត្តកំពង់ធំ ។

សូមរំលឹកថា កាលពីថ្ងៃទី៧ ខែសីហា នេះ កងរាជអាវុធហត្ថខេត្តកំពង់ធំ បានចុះប្រតិបត្តិការ បង្ក្រាប​កន្លែង​ជល់មាន់ខុសច្បាប់តាមអនឡាញមួយកន្លែង ដោយឃាត់ខ្លួនជនសង្ស័យ​បាន​ចំនួន​បួននាក់បញ្ជូនទៅកាន់បញ្ជាការដ្ឋានកងរាជអាវុធហត្ថខេត្តកំពង់ធំ ប៉ុន្តែក្នុងពេលកំពុងធ្វើដំណើរ​តាមរថយន្ត ដែលមន្រ្តីកងរាជអាធហត្ថដឹកនោះ​ មានជនសង្ស័យម្នាក់ឈ្មោះ សួង ឌ័ន បានទទួលមរណភាព មុននឹងជនសង្ស័យរូបនេះទៅដល់មន្ទីរពេទ្យ។

បន្ទាប់ពីមានករណីធ្វើឲ្យមនុស្សស្លាប់នៅក្នុងប្រតិបត្តិការនេះ នាយឧត្តមសេនីយ៍ សៅ សុខា មេ​បញ្ជា​​ការកងរាជអាវុធហត្ថលើផ្ទៃប្រទេស ​បានបញ្ជាឲ្យមានការស៊ើបអង្កេត និងធ្វើការឃាត់ខ្លួន​ជាបន្ទាន់ ​នូវមន្រ្តីកងរាជអាវុធហត្ថមួយចំនួន ​ដែលជាប់សង្ស័យពាក់ព័ន្ធនឹងករណីនេះ។

ក្រោយមានបទបញ្ជារបស់នាយឧត្តមសេនីយ៍ សៅ សុខា ​និងក្រុមការងារចំពោះកិច្ច បានធ្វើការ ស្រាវជ្រាវ​ស៊ើបអង្កេតតាមនីតិវិធីរួចមក ​មន្ត្រីជំនាញនគរបាលយុត្តិធម៌ បានសុំគោលការណ៍​ឃាត់​ខ្លួនយោធិន នៃកងរាជអាវុធហត្ថនៅខេត្តកំពង់ធំចំនួនពីរនាក់នេះ ៕ អត្ថបទ៖ បាន ចក់