ភ្នំពេញ៖ តំណាងក្រុមហ៊ុនGANZBERG ប្រកាសប្រគល់រថយន្តឲ្យអ្នកត្រូវរង្វាន់ដោយគ្មានការប្រួលប្រែ ដរាបណាភាគីទាំងពីរស្រុះស្រួលគ្នា។ 

តំណាងក្រុមហ៊ុនGANZBERG បានបញ្ជាក់ថា ក្រវិតកំប៉ុងនោះពិតជាត្រូវរង្វាន់ពិតប្រាកដមែន ហើយការប្រគល់រង្វាន់ នឹងធ្វើងឡើងពេលភាគីទាំងពីរត្រូវរ៉ូវគ្នា។ 

គួរបញ្ជាក់ថា បុរសជាសន្តិសុខឯកជនម្នាក់ បានរងបណ្តឹងពីបទរំលោភលើទំនុកចិត្ត ក្រោយពីយកក្រវិលកំប៉ុង ដែលគាស់ត្រូវរង្វាន់រថយន្តរត់គេចខ្លួន មិនចែកម្ចាស់ស្រាបៀរដែលហៅមកផឹកជាមួយគ្នា។

បុរសដែលរងបណ្តឹងឈ្មោះ ស៊ឹម ស៊ន់ អាយុ៣៨ឆ្នាំ ជាសន្តិសុខឯកជន រស់នៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល ចំណែកឯដើមបណ្តឹងឈ្មោះ ឌុល ដែន អាយុ៣៧ឆ្នាំ ជាអ្នករត់ម៉ូតូឌុប ស្នាក់នៅបន្ទប់ជួល ក្នុងភូមិថ្មី សង្កាត់តាខ្មៅ ក្រុងតាខ្មៅ។

លោក ឌុល ដែន បានបញ្ជាក់ថា កាលពីព្រឹកថ្ងៃទី២៨ ខែមីនា ឆ្នាំ២០២១កន្លងទៅ ខ្លួនបានឲ្យប្រពន្ធ ឈ្មោះ ឈឹម ភា យកក្រវិលកំប៉ុងស្រាបៀ GANZBERG ដែលត្រូវរង្វាន់ចំនួន១២ ទៅដូរយកស្រាបៀដើម្បីយកមកហូប។ ដោយយល់ថា ជាមនុស្សរាប់អាន និងធ្លាប់ផឹកស៊ីជាមួយគ្នា ក៏បានហៅឈ្មោះ ស៊ឹម ស៊ន់ មកផឹកជាមួយ ដោយមានគ្នាទាំងអស់៣នាក់ គឺខ្លួន និងប្រពន្ធ ព្រមទាំងឈ្មោះ ស៊ឹម ស៊ន់។

ភ្លាមនោះឈ្មោះ ស៊ឹម ស៊ន់ ក៏លើកស្រាបៀ១កំប៉ុងមកគាស់ ហើយស្រែកថា ត្រូវរង្វាន់ធំហើយ រួចក៏បង្ហាញឲ្យមើលទាំងអស់គ្នា គឺត្រូវរង្វាន់រថយន្ត ហើយឈ្មោះ ស៊ឹម ស៊ន់ និយាយថា «កុំមាត់ចាំគេចែកឲ្យ១ពាន់ ២ពាន់ដុល្លារ»។ រំពេចនោះ ខ្លួនបាននិយាយថា «ធ្វើអញ្ចឹងម៉េចកើត ខ្ញុំហៅបងឯងមកផឹក ហើយស្រាបៀរជារបស់ខ្ញុំ បើចែកត្រូវចែកគ្នាស្មើ ឬម្នាក់៤០% ម្នាក់៦០% ទើបយុត្តិធម៌»។

ឮដូច្នោះឈ្មោះ ស៊ឹម ស៊ន់ ក៏កាន់កំប៉ុងស្រាបៀ និងក្រវិលកំប៉ុងដែលត្រូវរង្វាន់ ក្រោកឈរ រួចនិយាយថា «ខ្ញុំទៅបើកទ្វារឲ្យមេសិន» រួចក៏ប្រមូលសម្លៀកបំពាក់ឡើងម៉ូតូឌុបយកក្រវិលកំប៉ុង ត្រូវរង្វាន់រថយន្តនោះរត់គេចបាត់ទៅ៕