ភ្នំពេញ៖ ក្រសួងសាធារណការ និងដឹកជញ្ជូនស្នើឲ្យប្រជាពលរដ្ឋបញ្ឈប់ការជួបជុំ ឬទទួលទានលើផ្លូវដែក ខណៈអាជ្ញាធរមូលដ្ឋាន នឹងចុះល្បាតជាប្រចាំដើម្បីសុវត្ថិភាពប្រជាពលរដ្ឋ។
ថ្លែងប្រាប់BTV Newsនៅថ្ងៃទី១៦ ខែសីហា ឆ្នាំ២០២២ លោក ហៃ សុខឃីម ចៅសង្កាត់សំរោងក្រោម ស្ថិតក្នុងខណ្ឌពោធិ៍សែនជ័យ បានឲ្យដឹងថា ដោយសារមានប្រជាពលរដ្ឋតែងតែយកផ្លូវដែកប្រើប្រាស់ជាការជួបជុំទទួលទាន និងកម្សាន្ត ជារៀងរាល់ពេល អាជ្ញាធរសង្កាត់សំរោងក្រោម ដែលមានផ្លូវដែកចំនួន១គីឡ៉ម៉ែត្រ ព្រមទាំងមានប្រជាពលរដ្ឋតែងទៅកម្សាន្តលើផ្លូវនោះ បានរៀបចំការអនុវត្តវិធានការរដ្ឋបាលជាបន្តបន្ទាប់ ។
លោក ហៃ សុខឃីម បន្តថា អាជ្ញាធរបានរៀបចំកម្លាំងចុះល្បាតជារៀងរាល់ពេលវេលាដែលតែងមានការជួបជុំកម្សាន្ត ឬទទួលទានលើផ្លូវដែក ក្នុងគោលបំណងអប់រំ និងបញ្ចៀសពីករណីបុកដោយសាររថភ្លើងជាដើម។
លោកបញ្ជាក់ថា ក្នុងករណីអប់រំមិនរាងចាល អាជ្ញាធរនឹងដកហូតមធ្យោបាយធ្វើដំណើរ ដើម្បីព្រមានដល់ប្រជាពលរដ្ឋឱ្យបញ្ឈប់ប្រើប្រាស់ផ្លូវដែកជាការជួបជុំ ខណៈអាជ្ញាធរគ្រោងបំពាក់ស្លាក់ណែនាំ និងហាមប្រាមបន្ថែមផងដែរ។
ជាមួយគ្នានេះ ប្រជាពលរដ្ឋរស់នៅ និងលក់ដូរជិតផ្លូវដែក គាំទ្រចំពោះចំណាត់ការរបស់អាជ្ញាធរ ដើម្បីការពារអាយុជីវិតប្រជាពលរដ្ឋ បន្ទាប់ពីពួកគាត់ជួបករណីប្រជាពលរដ្ឋមួយចំនួនស្ទើរបាត់បង់ជីវិត នៅពេលពួកគាត់យកផ្លូវដែកជាកន្លែងកម្សាន្ត។
ឯកឧត្តម គង់ វិមាន អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា ការប្រើប្រាស់ផ្លូវដែកសាធារណៈរបស់ប្រជាពលរដ្ឋគឺជាការពុំត្រឹមត្រូវឡើយ ដោយសារ វាអាចបង្កការខូចខាតទៅដល់រថភ្លើងពេលធ្វើដំណើរ។ ក្នុងនាមក្រសួងសាធារណការ និងដឹកជញ្ជូន គាំទ្រឱ្យរៀបចំស្លាកណែនាំនៅចំណុចទាំងនោះ ដើម្បីជាការដាស់តឿនប្រជាពលរដ្ឋផងដែរ៕ អត្ថបទ៖ ឧត្តម