​ប្រដាល់៖ ​ស្នូរ​សន្ធឹក​អ្នកគាំទ្រ​ស្រែក​ឈ្មោះ Ali Ali Ali នៅ​ក្នុង​កីឡដ្ឋាន O2 Arena កីឡា​ការិនី​ប្រដាល់ Ramla Ali បាន​បន្ត​ស្ថិតិ​ប្រកួត​មិនដែល​ចាញ់​របស់ខ្លួន​កាលពី​ខែ​មុន​។​ ​កីឡាករ​វ័យ ៣២ឆ្នាំ​រូបនេះ​ស្ថិតនៅក្នុង​អាជីព​ថ្មីថ្មោង​នៅឡើយ ប៉ុន្តែ​ការតាមដាន និង​ចំណាប់​អារម្មណ៍​ពី​មហាជន​នោះ​គឺ​ស្នាដៃ​របស់​នាង​ទាំង​ក្នុង និង​ក្រៅពី​វិស័យ​កីឡា​។

ដំណើរ​របស់ Ali បាន​នាំ​នាង​ពី​ជនភៀសខ្លួន​កុមារ​ ចាក​ចេញពី​ប្រទេស​សូ​ម៉ាលី​ដែល​ហែកហួរ​ដោយ​សង្គ្រាម មក​ក្លាយជា​អ្នក​ប្រយុទ្ធ​មូស្លីម​ដំបូង​គេ​ដែល​ឈ្នះ​ពាន​នៅ​ទឹកដី​អង់គ្លេស ​ក្នុងនាម​ជា​អ្នក​ប្រដាល់​ស្ម័គ្រចិត្ត​។ Ramla Ali គឺជា​អត្ត​ព​លិ​ក សកម្មជន អ្នកនិពន្ធ និង​ជាតា​រា​ម៉ូ​ដែល​ដ៏​ជោគជ័យ​ម្នាក់ដែល​ត្រូវបាន​ជ្រើសរើស​ដោយ Meghan Markle ឱ្យមាន​វត្ត​មាននៅ​លើ​គម្រប​ទស្សនាវដ្ដី Vogue។​ ​និយាយ​ពី​ប្រវត្តិ​របស់ Ramla Ali បងប្រុស​របស់​នាង​ត្រូវ​បាន​សម្លាប់​តាំងពី​វ័យ ១២​ឆ្នាំ​នៅ​ប្រទេស​សូ​ម៉ាលី​អំឡុង​សង្គ្រាមស៊ីវិល​នៅ​ទសវត្សរ៍​ឆ្នាំ​១៩៩០​។ គ្រួសារ​របស់​នាង​បាន​រត់គេច​ពី​រដ្ឋធានី Mogadishu​។ បន្ទាប់ពី​ការធ្វើដំណើរ​តាម​ទូក​រយៈពេល​ប្រាំបួន​ថ្ងៃ​ទៅកាន់​ប្រទេស​កេ​ន​យ៉ា ដែល​ក្នុង​នោះ​អ្នកជិះ​លើ​យន្តហោះ​ខ្លះ​បាន​ស្លាប់​ដោយ​ការអត់ឃ្លាន ទីបំផុត​ពួកគេ​បាន​រកឃើញ​ទីជម្រក​នៅ​ទីក្រុង​ឡុង​ដ៍​។​

​កាល​នៅ​វ័យ​ជំទង់ Ali ត្រូវបាន​គេ​បៀតបៀន​នៅ​សាលា​ដោយសារ​លើស​ទម្ងន់ ដូច្នេះ​បាន​ទៅ​កន្លែង​ហាត់ប្រាណ​ក្នុងស្រុក ហើយ​សាកល្បង​ហាត់​ប្រដាល់ ប៉ុន្តែ​នាង​មិនបាន​ប្រាប់​ក្រុមគ្រួសារ​របស់​នាង​ទេ ព្រោះ​នាង​គិតថា​ ពួកគេ​នឹងមិន​យល់ព្រម​ចំពោះ​កីឡា​សម្រាប់​ក្មេងស្រី​ម៉ូ​ស្លី​ម​។ យ៉ាងណាក្តី​នាង​បានចាប់ផ្តើម​ប្រឡូក​ខ្លួន​នៅក្នុង​វិស័យ​កីឡាប្រដាល់ ដោយ​រៀន​តាម​វីដេអូ​អន​ឡាញ មុនពេល​ទទួលបាន​កា​រ​ប្រកួត​ស្ម័គ្រចិត្ត​លើកដំបូង​នៅ​អំឡុង​ឆ្នាំ២០១០​។ ​មិនយូរប៉ុន្មាន Ramla Ali ក៏មាន​ឱកាស​ប្រកួត​តំណាងឱ្យ​ប្រទេស​អង់គ្លេស និង​ឈ្នះ​ពាន​នៅពេលនោះ តែ​ម្តាយ​របស់​នាង​ដឹង​ក៏បាន​សុំឱ្យ​កូនស្រី​ឈប់​។

​នាង​មិនបាន​បញ្ឈប់​ក្តី​ស្រមៃ​របស់​នាង​ឡើយ និង​បាន​ជម្នះ​ចិត្ត​ម្តាយ​រហូត​មានឱកាស​ប្រកួត​លើ​ឆាក​អន្តរជាតិ និង​សំរេចចិត្ត​ប្រកួត​តំណាងឱ្យ​ប្រទេស​កំណើត​របស់ខ្លួន និង​ថែមទាំង​ជា​អ្នក​កាន់​ទង់ជាតិ​សូ​ម៉ាលី​ដង្ហែនៅ​ព្រឹត្តិការណ៍​អូឡាំពិក​ទីក្រុង​តូ​ក្យូ​ឆ្នាំមុន ពោលគឺ Ali បាន​ក្លាយជា​កីឡាការិនី​ប្រដាល់​ទី១ ​របស់​សូ​ម៉ាលី​ដែលមាន​មុខ​នៅ​អូឡាំពិក​។ ​សប្តាហ៍​នេះ​នៅ​ទីក្រុង Jeddah កីឡាការិនី Ramla Ali នឹង​បង្កើត​ប្រវត្តិសាស្ត្រ​ម្តងទៀត​ នៅពេល​បង្ហាញខ្លួន​នៅលើ​សង្វៀន​ដែលមាន​វត្តមាន​ប្រកួត​របស់​កំពូល​កីឡាករ​ប្រដាល់​ពីររូប Oleksandr Usyk និង Anthony Joshua ក្នុងការ​ប្រកួត​ស្ត្រី​អាជីព​ដំបូង​ដែល​ធ្វើឡើង​នៅ​ប្រទេស​អា​រ៉ា​ប៊ី​សា​អូឌីត​៕

​អត្ថបទ​៖​នាង សុភា​វុ​ធ