ភ្នំពេញ៖ ក្រសួងទេសចរណ៍ បានប្រកាសថា អាជីវកម្មទេសចរណ៍ រួមមាន ភោជនីយដ្ឋាន KTV ក្លឹបបៀហ្កាឌិន និងអាហារដ្ឋាននានាទៀត នឹងប្រឈមការផាកពិន័យ ដកអាជ្ញាបណ្ណ និងការដាក់ទោសទណ្ឌ ករណីអាជីវកម្មផ្តល់សេវាម្ហូបអាហារនោះ ត្រូវបានពលរដ្ឋរាយការណ៍ ឬអាជ្ញាធររកឃើញថា មានការទទួលទិញសាច់សត្វព្រៃយកទៅចំអិនលក់ជូនភ្ញៀវពិសារ។

ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ ​បានថ្លែងប្រាប់BTV នៅថ្ងៃទី១៦ ខែសីហានេះថា ​ស្របពេលដែលបច្ចុប្បន្នក្រសួងបរិស្ថាន បាននិងកំពុងប្រកាស​ផ្សព្វផ្សាយ​ភោជនីយដ្ឋាន និងអាហារដ្ឋាន មិនលក់មុខម្ហូបពីសាច់សត្វព្រៃផងដែរនោះ បណ្តាអាជីកម្មទេសចរណ៍ ដែលផ្តល់សេវាមុខម្ហូបអាហារ នឹងត្រូវទទួលការដាក់ទោសទណ្ឌ ករណីរឹងរុសល្មើសបំរាម ការទទួលទិញសាច់សត្វព្រៃទៅចំអិនលក់ជូនភ្ញៀវពិសារ។

តំណាងមូលដ្ឋានអាជីវកម្មទេសចរណ៍នៅរាជធានីភ្នំពេញ និងក្រុងតាខ្មៅ បានថ្លែងថា បច្ចុប្បន្នក្នុងហាងរបស់គេទទួលទិញតែសាច់សត្វស្រុកមានសាច់គោ ជ្រូក មាន់ ទា ត្រី ដែល​ចិញ្ចឹមរក​បានពីប្រជាពលរដ្ឋមកចំអិនលក់ ហើយពាក់ព័ន្ធនឹងសាច់សត្វព្រៃវិញគឺម្ចាស់ហាងមិន​ទទួល​ទិញមកចំអិននោះទេ ដោយសារម្ចាស់ហាងក៏ចង់ផ្សព្វផ្សាយទប់ស្កាត់​ការហូបមុខម្ហូប​សាច់សត្វព្រៃ និងចង់លុបបំបាត់មុខរបរបរបាញ់សត្វព្រៃដើម្បីលក់ ពិសេសចង់រក្សា​សត្វព្រៃជូនភ្ញៀវទេសចរទៅទស្សនា។

សូមបញ្ជាក់ថា រហូតមកដល់ពេលនេះ តាមរយៈអនុវត្តយុទ្ធនាការអន្ទាក់សូន្យ ដើម្បីលុបបំបាត់ការ​ដាក់អន្ទាក់ ​បញ្ឈប់ការជួញដូរសត្វព្រៃរបស់ក្រសួងបរិស្ថាន ​មានភោជនីយដ្ឋាន និងអាហារដ្ឋាន​ប្រមាណ ៥០ទីតាំងនៅខេត្តក្រចេះ មណ្ឌលគិរី ព្រះវិហារ ស្ទឹងត្រែង និងកំពង់ធំជាដើមបាន​ដាក់​ស្លាកប្រកាសមិនលក់មុខម្ហូបពីសាច់សត្វព្រៃជូនភ្ញៀវពិសារ។

ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន ក៏បានអំពាវនាវដល់ម្ចាស់ភោជនីយដ្ឋាន​និង​អាហារដ្ឋានផ្សេងទៀត ក៏ដូចជាប្រជាពលរដ្ឋ ទាំងអស់ ​នៅទូទាំងប្រទេសកម្ពុជា ចូលរួមបញ្ឈប់​រាល់ការទិញ លក់ និងបរិភោគសត្វព្រៃ ដើម្បីជាប្រយោជន៍ ទុកសម្រាប់ទាក់ទាញវិស័យ​អេកូ​ទេសចរណ៍ និងទុកសម្រាប់មនុស្សជំនាន់ក្រោយៗទៀតបានស្គាល់៕ អត្ថបទ ស៊ុម សុខជា