ភ្នំពេញ ៖ បច្ចុប្បន្នការលក់ និងចែកចាយបារីអេឡិចត្រូនិកតាមបណ្តាញសង្គមមានការប្រុងប្រយ័ត្នជាងមុន ក្រោយមានចំណាត់ការក្តៅពីអាជ្ញាធរមានសមត្ថកិច្ច។

ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រៀងញៀននៅថ្ងៃទី១៦ខែសីហានេះ បានអញ្ជើញចូលរួមជាអធីបតីភាពក្នុងសិក្ខាសាលាស្តីពីការរឹតបន្តឹងការហាមឃាត់ការប្រើប្រាស់ ការនាំចូល និងការធ្វើអាជីវកម្មបារីអេឡិកត្រូនិក និងផលិតផលHTP ដែលរៀបចំដោយអាជ្ញាធរជាតិប្រយុទ្ធប្រឆាំងគ្រឿងញៀន និងសហការណ៍ជាមួយអង្គការចលនាដើម្បីសុខភាពកម្ពុជា។

នៅឱកាសខាងលើនោះ នាយឧត្តមសេនីយ៍ មាស វិរិទ្ធ មានប្រសាសន៍ថា បារីអេឡិចត្រូនិក និងផលិតផល HTP កំពុងពង្វក់យុវជននិងកុមារ ហើយក្លាយជាការព្រួយបារម្ភរបស់ថ្នាក់ដឹកនាំ ក៍ដូចជាប្រជាពលរដ្ឋទូទៅ។ការចែកចាយ ការលក់ និងការប្រើប្រាស់បារីអេឡិចត្រូនិក (vape)តាមបណ្តាញព័ត៌មានសង្កម នៅតែមានសកម្មភាពបន្តដដែល ដោយគ្រាន់តែមានការប្រុងប្រយ័ត្នជាងមុន ដោយផ្លាស់ប្តូរពីការផ្សព្វផ្សាយលក់ផលិតផលទាំងនេះដោយផ្ទាល់តាមហ្វេសប៊ុកឬផេក មកជាការលក់តាមប្រព័ន្ធតេលេក្រាមវិញ ដោយរក្សាគណនេយ្យហ្វេសប៊ុកឬផេក សម្រាប់ទំនាក់ទំនងជាមួយអតិថិជន។

នាយឧត្តមសេនីយ៍បន្តថា ទង្វើទាំងនេះជាការប្រព្រឹត្តបទល្មើសទៅនឹងសេចក្ដីណែនាំរបស់របស់រាជរដ្ឋាភិបាល ដែលបានហាមឃាត់ការការប្រើប្រាស់ធ្វើអាជីវកម្ម ការនាំចូល ផលិតផលស៊ីហ្សា បារីអេឡិចត្រូនិច (E-cigarette) តាំងពីឆ្នាំ២០១៤ និងហាមឃាត់ការការប្រើប្រាស់ធ្វើអាជីវកម្ម ការនាំចូលផលិតផល អេចស៍ ធី ភី (HTPs) នៅឆ្នាំ២០២១។ក្រៅពីនេះ នាយឧត្តមសេនីយ៍ ក្រើនរម្លឹកដល់អ្នកលក់ និងចែកចាយត្រូវឈប់ទង្វើនេះជាបន្ទាន់។

លោកវេជ្ជបណ្ឌិត មុំ គង់ នាយកអង្គការសុខភាពកម្ពុជា បានមានប្រសាសន៍ដែរថា យុវជនជាច្រើននាំគ្នាសាកល្បង ប្រើប្រាស់បារីអេឡិចត្រូនិក និងអេចឈ៍ ធី ភី ក្រោយពីត្រូវបានអូសទាញ ដោយការផ្សព្វផ្សាយរបស់ក្រុមអ្នកលក់បារីអេឡិចត្រូនិក ហើយការប្រើប្រាស់ផលិតផលគ្រោះថ្នាក់ទាំងនោះ ជាច្រកទ្វារទៅកាន់ការប្រើប្រាស់ថ្នាំញៀន ការស្រូបចូលជាតិនីកូទីន ដែលមានលក្ខណៈបង្កភាពងាយស្រួល សម្រាប់ឲ្យអ្នកប្រើប្រាស់ អាចដាក់បញ្ចូលបាននូវកញ្ឆា និងប្រភេទថ្នាំញៀនផ្សេងៗ ៕ អត្ថបទ ៖ ទូច សោភ័ណ