ស្វាយរៀង៖ មន្ត្រី បុគ្គលិកសុខាភិបាល នៅខេត្តស្វាយរៀងចំនួន ១៨នាក់ ត្រូវបានដាក់ឲ្យធ្វើចត្តាឡីស័ករយៈពេល១៤ថ្ងៃ ក្រោយពីពួកគាត់បានប៉ះពាល់ជាមួយអ្នកជំងឺកូវីដ១៩កន្លងទៅ ខណៈដែលពលករ និងភ្ញៀវចម្រុះជាតិសាសន៏ កំពុងធ្វើចត្តាឡីសក័ជាង ៦០០នាក់។​

លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង នៅថ្ងៃទី២ ខែមេសាបានប្រាប់ទូរទស្សន៏ BTV តាមទូរសព្ទ័ អោយដឹងថា គឹតត្រឹមថ្ងៃទី២ ខែមេសា នៅខេត្តស្វាយរៀង មានមន្ត្រី បុគ្គលិកសុខាភិបាល ចំនួន ១៨នាក់ ត្រូវបានរដ្ឋបាលខេត្តតម្រូវអោយធ្វើចត្តាឡីស័កដោយខ្លួនឯងផ្ទាល់ បន្ទាប់ពីពួកគាត់បានប៉ះពាល់ជាមួយអ្នកជំងឺកូវីដ១៩ នៅកន្លែងផ្សេងគ្នា ក្នុងពេលបំពេញការងារជួយសង្គ្រោះពលរដ្ឋ និងភ្ញៀវ កាលពីប៉ុន្មានថ្ងៃមុននេះ។ លោកបន្តថា សុខភាពពលរដ្ឋ គឺផ្តើមចេញពីក្រុមគ្រូពេទ្យ ដែលធានាបាននូវសុខភាពផ្ទាល់ខ្លួនជាមុន មុននិងឈានទៅពិនិត្យព្យាបាលពលរដ្ឋជាក្រោយ ដើម្បីធានាបានសុខភាព ក្រុមគ្រូពេទ្យតត្រូវធ្វើចត្តាឡីស័ករយៈពេល១៤ថ្ងៃ ដើម្បីឲ្យប្រាកដថា ពួកគាត់ពិតជាមិនមានឆ្លងជំងឺកូវីដ១៩។

លោកបន្ថែមថា ជំងឺកូវីដ១៩ ជាជំងឺដែលលាក់មុខ សម្ងំសម្លាប់មនុស្សនៅគ្រប់ពេលដែលមនុស្សគ្រប់រូបមិនបាន សម្អាតនិងអនាម័យនៅលើខ្លួនប្រាណ និងការរស់នៅក្នុងភាពប្រមូលផ្តុំ ហើយប្រាស្រយ័ទំនាក់ទំនងសង្គម ក្នុងបរិយាកាសមួយដែលមេរោគងាយជ្រៀតចូលបំផ្លាញសុខភាព ដោយប្រយោល និងដោយផ្ទាល់ ដូចករណីក្រុមគ្រូពេទ្យជិត២០នាក់ បើទោះជាក្រុមគាត់បានពាក់អាវ ពាក់ស្រោមដៃ ស្រោមជើង ពាក់របាំងការពារ ពីការចម្លងជំងឺ នៅតែមេរោគអាចជ្រៀតចូលបំផ្លាញសុខភាពបានខ្លះមិនអាចជៀសផុត ទើបក្រុមគ្រូពេទ្យត្រូវរដ្ឋបាលខេត្តតម្រូវអោយធ្វើចត្តាឡីសក័រយះពេល១៤ថ្ងៃ ដើម្បីត្រៀមឆ្លើយតបនឹងដែលពលរដ្ឋរងជំងឺដោយប្រការណាមួយនាពេលខាងមុខ។

លោកបញ្ជាក់បន្ថែមថា គិតត្រឹមថ្ងៃទី៣១ ខែមីនា ឆ្នាំ២០២១នេះ នៅខេត្តស្វាយរៀងមានអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍ ២០កុម្ភៈចំនួន ២៨នាក់ ក្នុងនោះ មាន ០២នាក់បានជាសះស្បើយនិងនៅសល់ ២៦នាក់កំពុងសម្រាកព្យាបាលនៅមន្ទីរពេទ្យ៕ អត្ថបទ៖ ភា សារិត