ស៊ីហ្គេម៖ ឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានជំរុញគណៈកម្មការវប្បធម៌ បរិស្ថាន និងអប់រំកីឡា ត្រូវពង្រីកការផ្សព្វផ្សាយយុទ្ធនាការឆ្ពោះទៅស៊ីហ្គេមឆ្នាំ២០២៣ ពិសេសរាជធានី-ខេត្តចំនួន ៥ ដែលត្រូវទទួលរៀបចំព្រឹត្តិការណ៍ជាប្រវត្តិសាស្ដ្រលើកដំបូងនៅកម្ពុជានេះ។
ឯកឧត្តមបានលើកឡើងបែបនេះនៅក្នុងកិច្ចប្រជុំប្រចាំសប្ដាហ៍ របស់គណៈអចិន្ដ្រៃយ៍នៃគណៈកម្មាធិការជាតិ CAMSOC ដើម្បីត្រួតពិនិត្យរបាយការណ៍ការងារ និងកំណត់ផែនការសកម្មភាពការងារ ក៏ដូចជាទិសដៅអនុវត្តការងារបន្ដដល់គណៈកម្មការវប្បធម៌ បរិស្ថាន និងអប់រំកីឡា នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី១៦ ខែសីហា ឆ្នាំ២០២២ ម្សិលមិញ។ យុទ្ធនាការឆ្ពោះទៅស៊ីហ្គេមឆ្នាំ២០២៣ ដែលត្រូវបានឯកឧត្តមរដ្ឋមន្ដ្រី ជំរុញគណៈកម្មការជំនាញត្រូវយកចិត្តទុកដាក់ និងពង្រីកការផ្សព្វផ្សាយ ដើម្បីបញ្ជ្រាបការយល់ដឹងដល់ប្រជាជនទូទាំងប្រទេសនេះមានដូចជា៖ យុទ្ធនាការកីឡារស់ក្នុងសន្ដិភាព, ប្រជាជនម្នាក់លេងកីឡាមួយមុខក្នុងមួយជីវិត, កម្ពុជាស្អាត បដិសណ្ឋារកិច្ចល្អ, កាត់បន្ថយការគ្រោះថ្នាក់ចរាចរណ៍ និងកាត់បន្ថយគ្រឿងញៀន។ ឯកឧត្តមបានគូសបញ្ជាក់ថា នេះគឺជារឿងសំខាន់ដែលគណៈកម្មការវប្បធម៌ បរិស្ថាន និងអប់រំកីឡាមានតួនាទីផ្សព្វផ្សាយ ក្រោមកិច្ចសហការជាមួយអាជ្ញាធររាជធានី-ខេត្ត ពិសេសតំបន់គោលដៅសំខាន់ៗទាំង ៥ ដែលត្រូវទទួលរៀបចំការប្រកួតកីឡាស៊ីហ្គេមរួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពត និងខេត្តកែប។ ក្នុងនោះរាជធានីភ្នំពេញគឺជាគោលដៅធំជាងគេ ព្រោះជាកន្លែងរៀបចំព្រឹត្តិការណ៍ធំជាងគេផងដែរ។
ទន្ទឹមជាមួយគ្នាក្នុងនាមប្រធានគណៈកម្មការជំនាញ ឯកឧត្តម តុប សុភ័ក រដ្ឋលេខាធិការក្រសួងទេសចរណ៍បានអះអាងថា កន្លងមកគណៈកម្មការរបស់ខ្លួនបានធ្វើសកម្មភាពផ្សព្វផ្សាយមួយចំនួនមកហើយ និងកំពុងធ្វើការជាមួយអគ្គលេខាធិការដ្ឋាន CAMSOC ដើម្បីជំរុញការផ្សព្វផ្សាយយុទ្ធនាការឆ្ពោះទៅស៊ីហ្គេមឆ្នាំ២០២៣ ពិសេសកៀគរប្រជាពលរដ្ឋឲ្យចូលរួមយុទ្ធនាការទាំងអស់ ពិសេសការរៀបចំសណ្ដាប់ធ្នាប់ អនាម័យ ក៏ដូចជាការរៀបចំផ្ទះសម្បែងឲ្យបានស្អាត និងល្អ ត្រៀមទទួលបដិសណ្ឋារកិច្ចប្រកបដោយស្នាមញញឹម និងភាពរួសរាយរាក់ទាក់។ អ្វីដែលពិសេសគឺរាជធានី-ខេត្តគោលដៅទាំង ៥ ដែលគណៈកម្មការរបស់ខ្លួននឹងខិតខំពង្រីកការផ្សព្វផ្សាយឲ្យបានកាន់តែទូលំទូលាយ ក្រោមកិច្ចសហការជាមួយអាជ្ញាធរដែនដី។ លើសពីនេះដោយមានការចង្អុលបង្ហាញពីឯកឧត្តមបណ្ឌិត ថោង ខុន ឯកឧត្តមក៏ត្រៀមរៀបចំនូវបទចម្រៀងអបអរសាទរព្រឹត្តិការណ៍ស៊ីហ្គេម សម្រាប់ធ្វើការផ្សព្វផ្សាយផងដែរ ព្រោះបទចម្រៀងអាចមានសក្ដានុពល និងជ្រូតជ្រាបខ្លាំងទៅដល់មហាជនទាំងអស់ដែលនិយមទស្សនាទស្សនាទូរទស្សន៍ និងប្រព័ន្ធផ្សព្វផ្សាយនានា។ គួរដឹងថា គិតត្រឹមថ្ងៃទី១៧ ខែសីហានេះ កម្ពុជានៅសល់រយៈពេល ២៦០ថ្ងៃទៀតប៉ុណ្ណោះសម្រាប់ដំណើរឆ្ពោះទៅស៊ីហ្គេមលើកទី៣២ ដែលនឹងប្រារព្ធពិធីបើកការប្រកួតនៅថ្ងៃទី០៥ ខែឧសភា និងបិទនៅថ្ងៃទី១៧ ខែឧសភា ឆ្នាំ២០២៣ ខាងមុខ មុនបន្ដរៀបចំការប្រកួតកីឡអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣-០៩ ខែមិថុនា ឆ្នាំ២០២៣ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
