បាត់ដំបង៖ ប្រជាពលរដ្ឋក្រីក្រ មានប័ណ្ណឧបត្ថម្ភសាច់ប្រាក់ប្រចាំខែ បានថ្លែងអំណរគុណដល់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ បានបន្តឧបត្ថម្ភដល់ពួកគាត់ ក្នុងអំឡុងវិបត្តិជំងឺកូវីដ១៩ ធ្វើឲ្យពួកគាត់អាចដោះស្រាយបញ្ហាជីវភាពក្នុងគ្រួសារបានមួយកម្រិត។

​ប្រជាពលរដ្ឋទទួលសាច់ប្រាក់ពីរាជរដ្ឋាភិបាលប្រចាំខែ រស់នៅឃុំគាស់ក្រឡ ស្រុកគាស់ក្រឡ បានលើ កឡើងថា ក្នុងស្ថានភាពនៃការឆ្លងរីករាលដាលនៃជំងឺកូវីដ១៩នេះ ពួកគាត់ពិតជាមានការលំបាកជាខ្លាំ ងក្នុងជីវភាពប្រចាំថ្ងៃ ហើយសមាជិកខ្លះក៏បានបាត់បង់ការងារធ្វើ ដែលបញ្ហានេះធ្វើឲ្យពួកគាត់បាត់ប្រាក់ចំណូល។ ពលរដ្ឋដដែលបន្តថា ដោយឃើញពីការលំបាកនេះ អាជ្ញាធរភូមិឃុំក៏បានធ្វើប័ណ្ណក្រីក្រដល់ពួកគាត់ អាចទទួលបានប្រាក់ឧបត្ថម្ភប្រចាំខែ ដែលអាចជួយដោះស្រាយការលំបាកបានមួយចំនួន ទាំងម្ហូបអាហារ និងថ្នាំសង្កូវជាដើម ខណៈពេលខ្លះទទួលបានអំណោយបន្ថែម ពីអាជ្ញាធរអង្គការ សប្បុរសជន ហើយដោយស្រុកនេះតែងជួបគ្រោះរាំងស្ងួតនោះ ក៏មានការចែកពាង និងធុងដាក់ទឹកផងដែរ។​

លោក ហុង សុផាត មេឃុំគាស់ក្រឡ បានលើកឡើកថា ពលរដ្ឋរស់នៅស្រុកគាស់ក្រឡ ក៏ដូចជាពល រដ្ឋនៅទូទាំងប្រទេសផងដែរ ដែលបានរងប៉ះពាល់ដោយសារជំងឺកូវីដ១៩ ពាក់ព័ន្ធនឹងកត្តាជីវភាព ហើយទន្ទឹមនេះ អាជ្ញាធរភូមិឃុំ ក៏បានស្រង់ស្ថិតិជួយធ្វើប័ណ្ណដល់ពលរដ្ឋក្រីក្រកម្រិត១ និងកម្រិត២បានជាង ៥០០នាក់ ដើម្បីទទួលប្រាក់ឧបត្ថម្ភពីរាជរដ្ឋាភិបាល ។

លោកមេឃុំបញ្ជាក់បន្ថែមថា ពលរដ្ឋទទួលប័ណ្ណក្រីក្រ ក៏ដូចជាពលរដ្ឋផ្សេងៗទៀត ក៏បានទទួលអំ ណោយមនុស្សធម៌ ជាបន្តបន្ទាប់ពីរាជរដ្ឋាភិបាល ពេលទឹកជំនន់កាលពីចុងឆ្នាំ២០២០ ខណៈក៏មានក្រុមការងារចុះជួយមូលដ្ឋានឃុំគាស់ក្រឡ មានឯកឧត្តម ឌឿន ចាន់ដារ៉ា ជាប្រធានក្រុមការងារ ជួយផ្ដល់នូវអំណោយ និងជួយអភិវឌ្ឍនូវហេដ្ឋារចនាសម្ព័ន្ធផ្សេងៗជាដើម។

គួរបញ្ជាក់ថា តាំងពីកម្ពុជាជួបវិបត្តិជំងឺកូវីដ១៩មក ចាប់ពីឆ្នាំ២០២០ រាជរដ្ឋាភិបាល បានបញ្ចេញនូវថវិកា ក្នុងការជួយឧបត្ថម្ភសាច់ប្រាក់ដល់ពលរដ្ឋក្រីក្រ ហើយសម្រាប់ខេត្តបាត់ដំបង ក៏មានពលរដ្ឋក្រីក្រជាង ៧ម៉ឺននាក់ ទទួលនូវការឧបត្ថម្ភនេះផងដែរ៕ អត្ថបទ៖ ​ បាន សុខរិទ្ធ