ភ្នំពេញ៖ គណៈកម្មាធិការជាតិគ្រប់គ្រងគ្រោះមហន្តរាយ លើកឡើងពីការត្រៀមខ្លួនរួចរាល់​ក្នុងការ​ជួយសង្គ្រោះប្រជាពលរដ្ឋក្នុងគ្រោះទឹកជំនន់។

ការត្រៀមខ្លួនរួចរាល់ដែលបានលើកឡើងនេះ រួមមានទាំងកងកម្លាំង មធ្យោបាយដឹកជញ្ជូន គ្រូពេទ្យ ស្បៀងក៏ដូចជាគ្រាប់ពូជផងដែរ។ នេះជាការបញ្ជាក់របស់ ទីប្រឹក្សាគណៈកម្មាធិការជាតិគ្រប់គ្រង​គ្រង​គ្រោះមហន្តរាយ ខណៈខេត្តមួយចំនួនចាប់ផ្ដើមមាន​ការជន់លិច។

គណៈកម្មាធិការជាតិគ្រប់គ្រងគ្រោះមហន្តរាយ ជាផ្នែកសំខាន់ក្នុងការជួយសង្រ្គោះបន្ទាន់ ខណៈនេះគឺត្រៀមរួចជាស្រេច ជួយសង្រ្គោះប្រជាពលរដ្ឋក្នុងគ្រោះទឹកជំនន់។ នេះជាការលើកឡើងរបស់លោក សុទ្ធ គឹមកុលមុនី ទីប្រឹក្សាគណៈកម្មាធិការជាតិគ្រប់គ្រង​គ្រង​គ្រោះ​មហន្តរាយ។ បច្ចុប្បន្នទោះ បណ្ដាខេត្តរងការជន់លិច អាចមានលទ្ធភាពដោះស្រាយដោយ​ខ្លួនឯងប្រាកដមែន ​គណៈកម្មាធិការជាតិគ្រប់គ្រងគ្រោះមហន្តរាយ ក៏បានត្រៀមរួចរាល់ក្នុងការចុះ​អន្តរាគមន៍ភ្លាមៗ ​ដោយមានកងកម្លាំងជំនាញ ​១៦កង ស្មើនឹងជិត ២០០០នាក់ សុទ្ធតែទទួល​បាន​ការហ្វឹកហាត់ និងបំពាក់សម្ភាររួចរាល់។

ក្រៅពីកងកម្លាំងជំនាញទាំង ១៦កង ក៏មានលេខធិការដ្ឋានគ្រប់គ្រងគ្រោះមហន្តរាយ តាម​ក្រសួងស្ថាប័ន ដែលត្រៀមរួចរាល់ ទាំងមធ្យោបាយដឹកជញ្ជូន​ ទាំងក្រុមគ្រូពេទ្យសង្គោះព្យាបាល និង​ស្បៀងគ្រាប់ពូជជួយដល់ពលរដ្ឋរងគ្រោះផងដែរ។

លើសពីចំណុចទាំងនេះ គណៈកម្មាធិការជាតិគ្រប់គ្រងគ្រោះមហន្តរាយ ក៏បានសាងសង់​ទីទួលសុវត្ថិភាព​ រួចរាល់នៅតាមបណ្ដាខេត្តមួយចំនួន។ ​ទីទួលសុវត្ថិភាពនេះ គឺមាន ៩ ជា​លក្ខណៈស្តង់ដារ ស្ថិតក្នុង កំពង់ធំ កំពង់ឆ្នាំង និងខេត្តពោធិ៍សាត់។ លើសពីនេះ ក៏មាន​ទីទួល​សុវត្ថិភាពផ្សេងទៀត ​ជាការជួយសាងសង់ដោយ អង្គការដៃគូ។

ចំពោះការជន់លិចក្នុងពេល​បច្ចុប្បន្ននេះ គឺអាជ្ញាធរខេត្តនីមួយៗ ​មានលទ្ធភាពគ្រប់គ្រាន់ ក្នុង​ការគ្រប់​គ្រងសង្រ្គោះក្នុងភូមិសាស្រ្តដែនដីរបស់ខ្លួន។ ជាក់ស្ដែងពុំទាន់មានការស្នើសុំបញ្ជូន​ក្រុមការងារជួយសង្រ្គោះពិសេស ​របស់គណៈកម្មាធិការជាតិគ្រប់គ្រងគ្រោះមហន្តរាយ ចុះទៅអន្តរគមន៍នោះទេ។

យ៉ាងណាម៉ិញបញ្ហាអាកាសធាតុនៅកម្ពុជា គឺបន្តមានភ្លៀងធ្លាក់ជាប្រចាំ។​ នេះបើយោងតាម ក្រសួងធនធានទឹកនិងឧតុនិយម។ ក្រសួងបញ្ជាក់ថា ចាប់ពីថ្ងៃទី ១៧ ដល់ថ្ងៃទី ២៣ ខែសីហា គឺមានភ្លៀងបន្តធ្លាក់​ ដែលអាចបង្កឱ្យបណ្ដាខេត្តមួយចំនួនក្នុងតំបន់ខ្ពង់រាប ​មានជំនន់ទឹកភ្លៀង ដូចជាខេត្ត ព្រះវិហារ ស្ទឹងត្រែង រតនគិរី ក្រចេះ ត្បូងឃ្មុំ កំពង់ចាម ឧត្តរមានជ័យ។ ចំពោះតំបន់ទំនាបកណ្ដាល ​ដែលអាចមានការប្រឈមជំនន់ទឹកភ្លៀង ​គឺខេត្តកំពង់ធំ៕ អត្ថបទ៖ គឹមហុក