រាជរដ្ឋាភិបាលកម្ពុជាបានយកចិត្តទុកដាក់ខ្ពស់ក្នុងការស្ដារនិងអភិវឌ្ឍន៍ធនធានមនុស្ស

ភ្នំពេញ៖ ក្រោយថ្ងៃរំដោះ៧ មករា ១៩៧៩ រាជរដ្ឋាភិបាលបានផ្ដល់អាទិភាព និងយកចិត្តទុកដាក់ខ្ពស់លើការស្ដារឡើងវិញ និងអភិវឌ្ឍន៍ធនធានមនុស្សយ៉ាងសកម្ម ដែលរហូតមកដល់ពេលនេះ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន បានលើកស្ទួយ និងជំរុញវិស័យ សិក្សាធិការ ដោយមិនចេះនឿយហត់។ នេះជាប្រសាសន៍លើកឡើងរបស់សម្ដេចក្រឡាហោម ស ខេង ។

ក្នុងពិធីបញ្ចុះបឋមសិក្សាសាងសង់អគារសិក្សាថ្មី ១ខ្នង កម្ពស់៤ជាន់ ២០បន្ទប់ ក្នុងបរិវេណអនុ វិទ្យាល័យសោហឺ ក្នុងក្រុងបាត់ដំបង នៅថ្ងៃទី១៧ ខែសីហា នេះ សម្ដេចក្រឡាហោម ស ខេង ឧបនាយក រដ្ឋមន្រ្តី រដ្ឋមន្រ្តីក្រសួងមហាផ្ទៃ បានមានប្រសាសន៍ថា រាជរដ្ឋាភិបាល បានបើកទូលាយឱ្យមិត្តភក្តិបរទេស សង្គមស៊ីវិល និងដៃគូអភិវឌ្ឍន៍ បានចូលរួមលើកកម្ពស់វិស័យសិក្សាធិការ ដែលធ្វើឱ្យពេលនេះ គុណភាព អប់រំនៅកម្ពុជា អាចតាមទាន់បណ្ដាប្រទេសនានានៅលើពិភពលោក។

សម្ដេចក្រឡាហោម បានបញ្ជាក់ថា រាជរដ្ឋាភិបាលកម្ពុជា បានចាត់ទុកការអប់រំ គឺជាវិស័យគន្លឹះធំ បំផុត ព្រោះប្រសិនបើប្រទេសមួយគ្មានធនធានមនុស្ស ដែលមានសមត្ថភាពពិតប្រាកដ មិនអាចការពារ បូរណភាពទឹកដី អធិបតេយ្យភាព និងមិនអាចអភិវឌ្ឍន៍សេដ្ឋកិច្ចសង្គមបាននោះទេ។

សម្ដេចក្រឡាហោម ឆ្លៀតឱកាសនេះ បានណែនាំដល់គណៈគ្រប់គ្រងសាលា និងលោកគ្រូអ្នកគ្រូ ត្រូវចូលរួមបំផុសចលនាប្រយុទ្ធប្រឆាំង និងទប់ស្កាត់ការប្រើប្រាស់គ្រឿងញៀន និងការជួញដូរមនុស្សនៅតាមសាលារៀន។

អភិបាលខេត្តបាត់ដំបង ឯកឧត្តម សុខ លូ បានឱ្យដឹងថា អគារសិក្សាថ្មី ១ខ្នង កម្ពស់៤ជាន់ ២០ បន្ទប់ ដែលទើបដំណើរការសាងសង់នាពេលនេះ គ្រោងចំណាយទឹកប្រាក់ប្រមាណ ៥៤ម៉ឺនដុល្លារ ដែលជាអំណោយដ៏ថ្លៃថ្លារបស់សម្ដេចក្រឡាហោម ស ខេង និងលោកជំទាវ ដោយប្រើពេលសាងសង់១២ខែ៕អត្ថបទ៖ នឿត សុភក្ត្រ