ភ្នំពេញ៖ ក្រុមការងារគ្រូពេទ្យ នៃការិយាល័យសុខាភិបាល ស្រុកប្រតិបតិ្តពោធិ៍សែនជ័យ (ហៅកាត់OD ពោធិ៍សែនជ័យ) នាព្រឹកថ្ងៃទី១៧ ខែសីហា ឆ្នាំ២០២២នេះ បានចុះចាក់វ៉ាក់សាំង​បង្ការជំងឺកូវីដ-១៩ ជូនប្រជាពលរដ្ឋក្មេង ចាស់ ប្រុស ស្រី និងវ៉ាក់សាំងការពារជំងឺ១១មុខ ជូនកុមារ តាមខ្នងផ្ទះប្រជាពលរដ្ឋ ក្នុងសង្កាត់បឹងធំ ខណ្ឌកំបូល រាជធានីភ្នំពេញ។

លោក ចាប សុវណ្ណ ប្រធានកម្មវិធីផ្តល់ថ្នាំបង្ការ នៃការិយាល័យស្រុកប្រតិបតិ្តពោធិ៍សែនជ័យ បានឲ្យដឹងថា ក្រុមការងារគ្រូពេទ្យរបស់យើង បានចុះចាក់វ៉ាក់សាំងបង្ការជំងឺកូវីដ-១៩ ជូន​ប្រជាពលរដ្ឋ និងវ៉ាក់សាំងការពារជំងឺ១១មុខជូនកុមារ ​នៅតាមខ្នងផ្ទះ ​ក្នុងភូមិរស់នៅរបស់ពួកគាត់ ដើម្បីផ្តល់វ៉ាក់សាំងជូនពួកគាត់ ​ដែលមិនបានទទួលពេញលេញ ហើយប្រសិនបើកុមារខ្វះនៅ​វ៉ាក់សាំង​ណាមួយ​ យើងត្រូវចាក់វ៉ាក់សាំងជូនកុមារភ្លាមៗតែម្តង ​និងការចាក់វ៉ាក់សាំងកូវីដ-១៩ ប្រសិន​បើពួកគាត់មិនទាន់បានចាក់វ៉ាក់សាំងកូវីដ-១៩ គឺយើងក៏ត្រូវចាក់វ៉ាក់សាំងជូនពួកគាត់ផងដែរ ដោយ​ចាប់ពីដូសមូលដ្ឋាន រហូតដល់ដូសជំរុញ។

ដូច្នេះក៏សូមផ្តាំផ្ញើដល់លោកគ្រូពេទ្យ អ្នកគ្រូពេទ្យទាំងអស់ មេត្តាចុះទៅតាមខ្នងផ្ទះ និងសហការ​ជាមួយ​មេភូមិ និងអ្នកស្ម័គ្រចិត្តភូមិ ដើម្បីជួយស្វែងរកប្រជាជន​ដែលមិនទាន់បានចាក់វ៉ាក់សាំងកូវីដ-១៩ និងកុមារ ដែលខកខានមិនបានទទួលវ៉ាក់សាំងការពារជំងឺ១១មុខ ឲ្យមកទទួលវ៉ាក់សាំង​គ្រប់ចំនួន។

ទន្ទឹមនឹងនោះ បងប្អូនប្រជាពលរដ្ឋរស់នៅក្នុងភូមិត្រពាំងត្រប់ សង្កាត់បឹងធំ ខណ្ឌកំបូល បាន​បង្ហាញ​ពីកី្តសប្បាយរីករាយ​ ដោយទទួលបានការយកចិត្តខ្ពស់ពីក្រុមគ្រូពេទ្យ OD ពោធិ៍សែនជ័យ បាន​ចុះមក​ដល់ផ្ទះពួកគាត់ផ្ទាល់ ​ដើម្បីចាក់វ៉ាក់សាំងបង្ការជំងឺកូវីដ-១៩ ​ចាប់ពីដូសមូលដ្ឋាន រហូតដល់​ដូសជំរុញ​ ព្រមទាំងចាក់វ៉ាក់សាំងការពារជំងឺ១១មុខជូនកូនៗរបស់ពួកគាត់ ជាពិសេស​សូមគោរព​ថ្លែងអំណរគុណជូនចំពោះប្រមុខរាជរដ្ឋាភិបាល ក្រោមការដឹកនាំប្រកបដោយគតិបណ្ឌិត​របស់​សម្តេចតេជោ ហ៊ុន សែន នាយករដ្ឋមន្រី្ត យកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋ ។

ជាចុងក្រោយលោក ចាប សុវណ្ណ បានបញ្ជាក់ទៀតថា យុទ្ធនាការចាក់វ៉ាក់សាំងតាម​ខ្នងផ្ទះប្រជា​ពលរដ្ឋនេះ គឺទទួលបានការចង្អុលបង្ហាញពីមនី្ទរសុខាភិបាល នៃរដ្ឋបាលរាជធានីភ្នំពេញ និងមួយផ្នែក​ទៀតទទួលបានការគាំទ្រពីអង្គការ ហ្គាវី ដើម្បីអនុញ្ញាតឲ្យក្រុមការងារគ្រូពេទ្យ ផ្តល់​វ៉ាក់សាំងជូនប្រជាពលរដ្ឋ ​និងកុមារ ដែលសេសសល់ មិនទាន់បានចាក់វ៉ាក់សាំងកូវីដ-១៩ និងវ៉ាក់សាំង​ការពារជំងឺ១១មុខ​ និងក្នុងនាមប្រធានកម្មវិធីផ្តល់ថ្នាំបង្ការ សូមអំពាវនាវ​ដល់​ប្រជាពលរដ្ឋទាំងអស់ ដែលមិនទាន់បានទទួលវ៉ាក់សាំងកូវីដ១៩ និងកុមារ មិនទាន់​បានទទួល​វ៉ាក់សាំងការពារ១១មុខ សូមអញ្ជើញមកទទួលការចាក់វ៉ាក់សាំងពីក្រុមការងារគ្រូពេទ្យ នៅតាមភូមិ ដែលក្រុមគ្រូពេទ្យចុះទៅចាក់វ៉ាក់សាំងជូន និងសូមអញ្ជើញមកទទួលវ៉ាក់សាំង​នៅ​តាមមណ្ឌល​សុខភាព ដែលនៅជិតផ្ទះរបស់បងប្អូនប្រជាពលរដ្ឋ ​ដើម្បីការពារជំងឺកូវីដ១៩ កុំឲ្យមាន​ការរីករាល​ដាលក្នុងសហគមន៍ ដូចកាលពីពេលកន្លងមកទៀត៕

អត្ថបទ រដ្ឋា