អ៊ុយក្រែន៖ ការផ្ទុះ និងអគ្គិភ័យបានឆាបឆេះឃ្លាំងគ្រាប់រំសេវមួយកន្លែង នៅឧបទ្វីបគ្រីមៀដែលបានដាក់បញ្ចូលឧបសម្ព័ន្ធរបស់រុស្ស៊ី នៅក្នុងការវាយប្រហារដោយអ៊ុយក្រែនដែលសង្ស័យជាលើកទី២ នៅលើឧបទ្វីបនេះក្នុងរយៈពេលត្រឹមតែជាងមួយសប្តាហ៍ ដែលបានបង្ខំឱ្យជម្លៀសមនុស្សជាង ៣ពាន់នាក់។
ការវាយប្រហារដែលត្រូវបានចោទប្រកាន់ធ្វើឡើងដោយយោធាអ៊ុយក្រែន ក៏បានបំផ្លាញផ្នែកមួយនៃផ្លូវរថភ្លើងនៅក្បែរនោះ។ ប្រទេសរុស្ស៊ីបានដាក់កំហុសការបំផ្ទុះនៅក្នុងភូមិ Mayskoye និង Avovskoye ថា ជាសកម្មភាពបំផ្លាញដោយមិនបញ្ចេញឈ្មោះអ្នកប្រព្រឹត្ត។ ប្រធានតំបន់ដែលតែងតាំងដោយទីក្រុងមូស្គូ លោក Sergei Aksyonov បាននិយាយកាលពីថ្ងៃអង្គារថា មនុស្សរហូតដល់ ៣ពាន់នាក់ត្រូវបានជម្លៀសចេញពីតំបន់ទីលំនៅ នៅជិតតំបន់ផ្ទុះឃ្លាំងអាវុធរុស្ស៊ីនៅភាគខាងជើងតំបន់គ្រីមៀ។ រុស្ស៊ីបានដាក់កំហុសការបំផ្ទុះនៅទីតាំងផ្ទុកគ្រាប់រំសេវក្នុងទីក្រុង Mayskoye ថា ជាអំពើបំផ្លិចបំផ្លាញដោយមិនបញ្ចេញឈ្មោះអ្នកប្រព្រឹត្ត៕
អត្ថបទ៖ ប៊ុនថន