ភ្នំពេញ៖ វិនិយោគិនមកពីប្រទេសថៃជាច្រើន បានចាប់អារម្មណ៍ និងចូលមកសិក្សាស្វែងយលអំពីសក្តានុពលវិនិយោគ នៅព្រះរាជាណាចក្រកម្ពុជាបណ្តើរៗហើយ បន្ទាប់ពីស្ថានភាពនៃការរីករាលដាលជំងឺកូវីដ១៩ នៅកម្ពុជាមានលក្ខណៈល្អប្រសើរ។
លោកស្រី ជីរ៉ាណាន់ វង្សមង្គល ប្រធានសមាគមពាណិជ្ជកម្មថៃនៅកម្ពុជា លើកឡើងក្នុងជំនួបពិភាគ្សាការជាមួយប្រតិភូមកពីប្រទេសថៃ នៅថ្ងៃទី១៧ ខែសីហា ឆ្នាំ ២០២២ នេះថា ក្នុងរយៈពេលជាង ២ឆ្នាំ បន្ទាប់ពីវិបត្តិជំងឺកូវីដ ១៩ បានផ្ទុះឡើង វិនិយោគិនថៃជាច្រើន បានរង់ចាំពេលវេលា និងឱកាសដើម្បីចុះមកធ្វើការសិក្សា ស្វែងយល់ អំពីសក្តានុពលវិនិយោគនៅព្រះរាជាណាចក្រកម្ពុជា ខណៈដែលក្រុមហ៊ុនបានជាច្រើនចាត់ទុកប្រទេសកម្ពុជា គឺជាប្រទេសគោលដៅវិនិយោគដ៍យ៉ាងសំខាន់របស់ពួគគេ។
លោកស្រីបន្តថា ចំពោះការចាត់ទុកកម្ពុជា គឺជាប្រទេសគោលដៅនេះ ព្រោះកម្ពុជា គឺជាប្រទេសដែលមានស្ថេរភាពនយោបាយល្អប្រសើរ និងរឹងមាំ ជាពិសេសច្បាប់ស្តីពីការវិនិយោគនៃព្រះរាជាណាចក្រកម្ពុជា បានបើកទូលាយ និងបង្កលក្ខណៈងាយស្រួលដល់អ្នកកវិនិយោគដូចជា ការវិនិយោគលើសហគ្រាសធុនតូច និងមធ្យម អាចធ្វើការផ្គត់ផ្កង់ទៅដល់រោងចក្រ សហគ្រាស ដោយមិនជាប់អាករតម្លែបន្ថែមផ្សេងៗ ដែលចំណុចទាំងអស់នេះ បានធ្វើឲ្យវិនិយោគទុកបរទេស ជាពិសេសក្រុមវិនិយោគថៃ បានចាប់អារម្មណ៍យ៉ាងខ្លាំង។
លោកស្រី ជីរ៉ាណាន់ វង្សមង្គល បញ្ជាក់បន្ថែមថា៖ ក្រុមហ៊ុនថៃជាច្រើន បានចាប់អារម្មណ៍អំពីការវិនិយោគលើវិស័យកសិកម្មដូចជា៖ ការវិនិយោគលើដំណំាឧស្សាហកម្ម ទំពាងបាយជូរ ការដាំដុះផ្កា រោងចក្រផលិតជីកសិកម្មជាដើម ចំណែកវិស័យឧស្សាហកម្ម វិនិយោគិនបានចាប់អារម្មណ៍ លើការវិនិយោគវិស័យម្ហូបអាហារ និងភេសជ្ជៈ និងវិស័យសហគ្រាសធុនតូច និងមធ្យមជាដើម ជាក់ស្តែងនៅពេលនេះ ធុកិច្ចថៃបានចាប់អារម្មណ៍អំពីការវិនិយោគលើវិស័យសុខាភិបាល និងការផ្សព្វផ្សាយពីសេវាព្យាបាលទៅកាន់ប្រទេសថៃ ខណៈដែលថៃបានចាត់ទុកកម្ពុជា គឺជាជំរើសទី១ ក្នុងចំណោមប្រទេសជាច្រើនទៀតក្នុងអាស៊ីអាគ្នេយ៍៕ អត្ថបទ៖ សុន រ៉ាឌី