ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នឹងដោះស្រាយបញ្ហាវិវាទប្រាកបៀវត្សកម្មករកម្មការនីរោងចក្រ Canteran Apparel (Cambodia) Co Ltd ឱ្យចប់ជាស្ថាបពរនៅសប្តាហ៍ក្រោយ។
ការបញ្ជាក់របស់ក្រសួងនេះ គឺធ្វើឡើងបន្ទាប់ពីប្រមុខរាជរដ្ឋាភិបាល បានបានស្តីបន្ទោស និងចោទជាសំនួរទៅឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ពីការព្រងើយកន្តើយចំពោះសុខទុក្ខរបស់កម្មករដែលមានការរំលោភបំពានការងារ។
ថ្លែងប្រាប់ព័ត៌មាន BTV នៅរសៀលថ្ងៃទី១៧ ខែសីហានេះ ឯកឧត្តម ហេង សួរ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ឯកឧត្តមរដ្ឋមន្រ្តី អ៊ិត សំហេង បានរៀបចំចាត់ចែងអនុវត្តអនុសាសន៍សម្តេចតេជោ ដែលបានមានប្រសាសន៍ព្រឹកមិញនេះឲ្យចប់សព្វគ្រប់នៅក្នុងសប្តាហ៍នេះ។
ឯកឧត្តម ហេង សួរ បន្តថា រាជរដ្ឋាភិបាល នឹងប្រើថវិកាបុរេប្រទានជាមុន ហើយនឹងរកវិធានការទូទាត់ពីនិយោជកតាមនីតិវិធីច្បាប់តាមក្រោយ។
រោងចក្រកាត់ដេរសំលៀកបំពាក់ Canteran Apparel (Cambodia) Co Ltd មានទីតាំងស្ថិតនៅងត្រពាំងថ្លុង ចោមចៅ ខណ្ឌពោធិ៍សែនជ័យ។
នៅរសៀលថ្ងៃដដែលនេះ កម្មករកម្មការនីរោងចក្រខាងលើនេះ ប្រមូលផ្តុំគ្នាមុខរោងចក្រ ឈររូបថតប្រមុខរាជរដ្ឋាភិបាល បានសាទរទៅនឹងចំណាត់ការរបស់សម្តេចតេជោ ហ៊ុន សែន ដែលតែងតែគិតគូរដល់សុខទុក្ខប្រជាពលរដ្ឋ ជាពិសេសបងប្អូនកម្មករកម្មការនីដែលកំពុងជួបវិវាទប្រាក់ខែជាមួយម្ចាស់រោងចក្រ៕ អត្ថបទ៖ ឈិត បូរ៉ាវី