ភ្នំពេញ៖ ក្រុមប្រឹក្សាភិបាល នៃប.ស.ស. បានបើកិច្ចប្រជុំលើកទី១៤ អាណត្តិទី១របស់ខ្លួន ដើម្បីត្រួតពិនិត្យ​សម្រេច​ជា​ស្ថាពរ ក្រោមអធិបតីភាពឯកឧត្តមបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ។

នៅក្នុងកិច្ចប្រជុំ នៅព្រឹកថ្ងៃទី១៧ សីហា ឆ្នាំ២០២២នេះ ឯកឧត្តមបណ្ឌិត អ៊ិត សំហេង បានស្នើដល់​សមាជិក​ក្រុម​ប្រឹក្សា​ភិបាល​ទាំងអស់ ត្រូវពិនិត្យ និងពិភាក្សាឲ្យបានគ្រប់ជ្រុងជ្រោយ នូវសេចក្តីព្រាងផែនការថវិកា ធ្វើយ៉ាងណាឲ្យការ​ចំណាយ​នានា​ក្នុងការអនុវត្តការងារស្របទៅតាមគោលការណ៍របស់រាជរដ្ឋាភិបាល និងធានាបាននូវតុល្យភាពហិរញ្ញវត្ថុ និង​បាន​ស្នើ​ដល់​សមាជិក នៃ​អង្គប្រជុំទាំងអស់ត្រូវត្រួតពិនិត្យ និងពិភាក្សាឲ្យបានគ្រប់ជ្រុងជ្រោយផងដែរ ទៅលើសេចក្តីព្រាង​អនុក្រឹត្យ​ស្ដីពីតួនាទី និងភារកិច្ចរបស់អធិការកិច្ចសន្តិសុខសង្គម នៃ ប.ស.ស. ក្នុងន័យប្រមូលបាន​នូវធាតុចូល​សំខាន់ៗ​បន្ថែម​ទៀតសំដៅធ្វើឲ្យសេចក្តីព្រាងអនុក្រឹត្យនេះ កាន់តែមានលក្ខណៈត្រឹមត្រូវស្របទៅតាមច្បាប់ស្តីពីរបបសន្តិសុខសង្គម ដោយធ្វើយ៉ាងណាធានាបាននូវប្រសិទ្ធភាព តម្លាភាព និងគណនេយ្យភាព។

ជាមួយគ្នានេះ ឯកឧត្តម ធ្វើការកោតសរសើរយ៉ាងស្មោះចំពោះការខិតខំប្រឹងប្រែង សហការបានយ៉ាងល្អ​របស់​សមាជិក​ទាំងអស់ ក៏ដូចជាថ្នាក់ដឹកនាំ មន្រ្តីបុគ្គលិកគ្រប់លំដាប់ថ្នាក់របស់ ប.ស.ស. ដែលបានខិតខំយកចិត្តទុកដាក់ ប្រកបដោយ​ស្មារតី​ទទួល​ខុសត្រូវខ្ពស់ក្នុងការអនុវត្តការងារកន្លងមក បើទោះបីស្ថិតក្នុងស្ថានភាពដ៏លំបាកយ៉ាងណាក្ដី ក៏នៅតែបំពេញ​តួនា​ទីយ៉ាងល្អ​ក្នុងការផ្ដល់សេវាសាធារណៈប្រកបដោយភាពទន់ភ្លន់ ក្រមសីលធម៌ មនសិការវិជ្ជាជីវៈ និងមានស្មារតី​ទទួល​ខុសត្រូវខ្ពស់។

ក្រសួងការងារ និងបណ្តុះបណ្តាលវិជ្ជាជីវៈ បានបញ្ជាក់ថា តាមរយៈកិច្ចប្រជុំនេះ អង្គប្រជុំទាំងមូល បានសម្រេច​អនុម័ត​ទាំង​ស្រុង​លើសេចក្តីព្រាងផែនការថវិកាឆ្នាំ២០២៣ និងសេចក្តីព្រាងអនុក្រឹត្យ ស្ដីពីតួនាទី និងភារកិច្ចរបស់អធិការ​កិច្ច​សន្តិសុខសង្គម នៃ ប.ស.ស. បន្ទាប់ពីបានពិភាក្សាយ៉ាងយកចិត្តទុលដាក់អស់រយៈពេលពេញមួយព្រឹកកន្លងមកនេះ៕ អត្ថបទដោយ ឈិត បូរ៉ាវី​