ភ្នំពេញ៖ រដ្ឋមន្រ្តីក្រសួង វប្បធម៌ និងវិចិត្រសិល្បៈ បានអំពាវនាវឱ្យយុវជន ដែលទើបបញ្ចប់ការ​សិក្សា​ថ្នាក់វិទ្យាល័យ ចាប់យកមុខជំនាញនៅសាកលវិទ្យល័យភូមិន្ទវិចត្រសិល្បៈ ឱ្យកាន់តែច្រើន។ គោលដៅគឺដើម្បីប្រែក្លាយពួកគេឱ្យក្លាយជាធនធាន ​សំខាន់ចូលរួមក្នុងការថែរក្សា អភិរក្ស​សម្បត្តិវប្បធម៌​ដែលជាអត្តសញ្ញាណជាតិ។ នេះជាការលើកឡើងក្នុងឱកាស ចូលរួមប្រគល់សញ្ញាបត្រ ជូននិស្សិតនៅសាកលវិទ្យាល័យភូមិន្ទវិចិត្រសិល្បៈនាព្រឹកនេះ។

លោកជំទាវ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ បានបង្ហាញនូវភាពពេញចិត្ត​ជា​ខ្លាំងក្នុងឱកាសចូលរួមប្រគល់សញ្ញាបត្រ​ ជូននិស្សិតនៃមហាវិទ្យាល័យទាំង ៥នៃសាកលវិទ្យាល័យ​ភូមិន្ទវិចិត្រសិល្បៈ។ ភាពពេញចិត្តដោយសារ ​លោកជំទាវមើលឃើញថា និស្សិតដែលទទួលបាន​សញ្ញាបត្រ​នៅថ្ងៃនេះ ​ជាធនធានសំខាន់​ រួមចំណែក​ក្នុងការថែរក្សា អភិរក្ស ស្រាវជ្រាវលើការងារ​ពាក់ព័ន្ធ​នឹងវិស័យវប្បធម៌ដែលជាអត្តសញ្ញាណជាតិ។

ទន្ទឹមនឹងភាពពេញចិត្តនេះ លោកជំទាវ រដ្ឋមន្រ្តីក៏បានស្នើសុំឱ្យយុវជន​ ដែល​បញ្ចប់​ការសិក្សាថ្នាក់​វិទ្យាល័យ ចាប់យកការសិក្សានៅសាកលវិទ្យា ភូមិន្ទវិចិត្រសិល្បៈ ឱ្យកាន់តែច្រើន។ លោកជំទាវ បន្តថា សព្វថ្ងៃធនធានមនុស្សលើវិស័យនេះ គឺនៅមានភាពខ្វះខាតនៅឡើយ ដែលទាមទារ​ឱ្យមានការបណ្ដុះធនធានឱ្យកាន់តែច្រើន។

ពាក់ព័ន្ធនឹងការលើកឡើងបែបនេះ ​សាកលវិទ្យាល័យភូមិន្ទវិចិត្រសិល្បៈ សព្វថ្ងៃក៏បានពង្រឹង​គុណភាព​អប់រំឱ្យកាន់តែមានភាពប្រសើរផងដែរ។ ​ជាក់ស្ដែងតាមការលើកឡើងរបស់ ឯកឧត្តម ហេង សុផាឌី ជាសាកលវិទ្យាធិការ បញ្ជាក់ថា សាកល័យភូមិន្ទវិចិត្រសិល្បៈ គឺមានកិច្ចសហការ​យ៉ាងល្អជាមួយបណ្ដាសាកលវិទ្យាល័យធំៗ​ជាច្រើននៅបរទេស ​លើវិស័យនេះ។

លើសពីនេះ ក្នុងឆ្នាំ ២០១២ គឺមានការបង្កើតគម្រោងមនុស្សសាស្រ្ដ​ ជាគម្រោងកិច្ចសហការ ជាមួយ​វិទ្យាស្ថានជាតិភាសា និងអារ្យធម៌បូព៌ាប្រទេស​ និងទទួលបានការគាំទ្រពីស្ថាប័នជាតិ និងអន្តរជាតិ​មានជាអាទិ៍។ កម្មវិធីនេះបានផ្តល់ឱ្យនិស្សិតខ្មែរ​ និងនិស្សិតក្នុងតំបន់អាស៊ាន អាចចូល​សិក្សា​ជាមួយសាស្រ្តាចារ្យល្បីៗមកពីប្រទេសបារាំង​ ហើយពេលបញ្ចប់ការសិក្សា និស្សិតនឹងទទួល​បាន​សញ្ញាបត្រផ្ទាល់ពីប្រទេសបារាំង៕

អត្ថបទ៖គឹមហុក