​ភ្នំពេញ៖ ប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ អាយុចាប់ពី១៨ឆ្នាំឡើង បានមកចាក់វ៉ាក់​សាំង​បង្ការ​ជំងឺ​កូវីដ-១៩ ដូសជំរុញទី៤ បានចំនួន៨០.៤៧% និងដូសជំរុញទី៥ បានចំនួន៩.៦៨% គិតត្រឹម​ល្ងាចម្ស៉ិលម៉ិញថ្ងៃទី១៧ ខែសីហា ឆ្នាំ២០២២ ។

ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ បានលើកឡើងថា សព្វថ្ងៃ​មណ្ឌលចាក់វ៉ាក់សាំងបង្ការជំងឺកូវីដ-១៩​ ស្ថិត​នៅតាមមនី្ទរពេទ្យបង្អែក និងមណ្ឌលសុខភាព​ទាំង៤៣ទីតាំង ក្នុងរាជធានីភ្នំពេញ នៅបន្ត​ដំណើរ​​ការ​ចាក់វ៉ាក់​សាំង​ជូនបងប្អូនប្រជាពលរដ្ឋ​ជា​ធម្មតា ហើយក្រុមការងារគ្រូពេទ្យ​មួយផ្នែក ​នៃការិ​យា​ល័យ​សុខាភិបាល ស្រុកប្រតិបតិ្ត នៃមនី្ទរ​សុខាភិបាល​រាជធានីភ្នំពេញ កំពុងបន្ត​បេសក​កម្ម​យ៉ាង​សកម្ម ​ចុះចាក់វ៉ាក់សាំងតាមសហគមន៍​ ខ្នងផ្ទះ ​ដើរពីផ្ទះមួយ ទៅផ្ទះមួយ ​ដើម្បីចាក់វ៉ាក់សាំងកូវីដ-១៩ ​ជូនប្រជាពលរដ្ឋ ចាស់ជរា និង​វ៉ាក់សាំងការពារជំងឺ១១មុខ ជូនកុមារ ​ដែលពិបាក​ក្នុងការ​ធ្វើដំណើរ​មក​កាន់​មណ្ឌលសុខភាព និង​មនី្ទរពេទ្យបង្អែក ដើម្បីទទួលយកថ្នាំបង្ការការពារជំងឺ។

ជាចុងក្រោយឯកឧត្តមវេជ្ជបណ្ឌិត ងី មានហេង បាន​សង្កត់ធ្ងន់ថា ​ក្រោម​ការដឹកនាំ​ប្រកប​ដោយ​គតិបណ្ឌិត​របស់​សម្តេចអគ្គមហាសេនាបតីតេជោ ​ហ៊ុន សែន ​នាយករដ្ឋមន្រី្តនៃ​ព្រះរាជា​ណា​ចក្រកម្ពុជា យុទ្ធនា​ការ​ចាក់វ៉ាក់សាំង​បង្ការជំងឺកូវីដ-១៩​ បាន​ចាប់ផ្តើមចាក់​វ៉ាក់​សាំង​នេះ​ជូន​បងប្អូន​ប្រជា​​ពល​រដ្ឋ កាល​ពីថ្ងៃ​ទី១០ ​ខែកុម្ភះ ឆ្នាំ២០២១​ ដោយឥតគិតថ្លៃ ​រហ័សទាន់​ពេលវេលា​ រួមទាំងជន​បរទេស​ដែល​រស់​នៅក្នុងព្រះ​រាជាណាចក្រកម្ពុជាផងដែរ៕ អត្ថបទ រដ្ឋា