ភ្នំពេញ៖ រាជរដ្ឋាភិបាលកម្ពុជាបានយកចិត្តទុកដាក់ខ្ពស់ លើការងារគ្រប់គ្រងគ្រោះមហន្តរាយ ការកាត់បន្ថយហានិភ័យគ្រោះមហន្តរាយ ការត្រៀមបង្ការ ការឆ្លើយតប ក៏ដូចជាការស្តារឡើងវិញ​ក្រោយ គ្រោះមហន្តរាយ ។ នេះបើតាមប្រសាសន៍​មន្រ្តីជាន់ខ្ពស់​នៃគណៈកម្មាធិការជាតិ​គ្រប់គ្រង​គ្រោះមហន្តរាយ។

ក្នុងសិក្ខាសាលាថ្នាក់តំបន់សី្តពី«ការកសាងចំណេះដឹង និងការយល់ដឹងអំពីការគ្រប់គ្រងទឹកជំនន់» ស្ថិតនៅសណ្ឋាគារកាំបូឌីយ៉ាណា នាថ្ងៃទី១៨ ខែសីហានេះ ឯកឧត្តម ហង្ស សាមឿន អនុប្រធាន​គណៈកម្មាធិការជាតិគ្រប់គ្រងគ្រោះមហន្តរាយតំណាងឯកឧត្តម គន់ គីម អនុប្រធានទី១ បានថ្លែងថា រាជរដ្ឋាភិបាលកម្ពុជាបានយកចិត្តទុកដាក់ខ្ពស់ លើការងារគ្រប់គ្រងគ្រោះមហន្តរាយ ការកាត់បន្ថយហានិភ័យគ្រោះមហន្តរាយការត្រៀមបង្ការ ការឆ្លើយតប ក៏ដូចជាការស្តារឡើងវិញ​ក្រោយគ្រោះមហន្តរាយ ក្នុងលក្ខណៈពហុវិស័យ ឈរលើគ្រប់ទិដ្ឋភាពនៃសេដ្ឋកិច្ច-សង្គមរបស់​កម្ពុជា ដូចមាន​ចារឹក​នៅក្នុងយុទ្ធសាស្ត្រចតុកោណ​ របស់រាជរដ្ឋាភិបាលកម្ពុជាជាអាទិ៍។

ឯកឧត្តម បន្តថា រាជរដ្ឋាភិបាលកម្ពុជា តាមរយៈ គណៈកម្មាធិការជាតិគ្រប់គ្រង​គ្រោះមហន្តរាយ​បាន​រៀបចំតាក់តែងច្បាប់ស្តីពីការគ្រប់គ្រងគ្រោះមហន្តរាយ និង​លិខិត​បទដ្ឋានគតិយុត្តពាក់ព័ន្ធ​នានារៀបចំកែសម្រួលរចនាសម្ព័ន្ធគ្រប់គ្រង​គ្រោះមហន្តរាយ ពីថ្នាក់ជាតិដល់ថ្នាក់មូលដ្ឋាន​សហគមន៍ ​កសាងផែនការសកម្មភាពជាតិ NAP-DRR ​សម្រាប់អាណត្តិ៥ឆ្នាំម្តង រៀបចំផែនការ​ត្រៀមបម្រុងឆ្លើយតប ​និងសង្គ្រោះគ្រោះមហន្តរាយនៅរៀងរាល់ឆ្នាំ រៀបចំ​កងឯកភាព​សង្គ្រោះ​គ្រោះមហន្តរាយ ដោយបំពាក់សម្ភារៈ ​និងមធ្យោបាយគ្រប់គ្រាន់ ​ឱ្យឈរជើងនៅតាមតំបន់ ដើម្បី​ធានាការជួយសង្គ្រោះបានទាន់ពេលវេលា ​នៅគ្រប់កាលៈទេសៈ។ រហូតមកដល់ពេលនេះ បង្កើត​បានចំនួន១៦កងរួចមកហើយ ហើយនឹងបន្តបង្កើតកងថ្មីបន្ថែមជាបន្តបន្ទាប់ទៀត នៅក្នុងបណ្តាឆ្នាំ​ខាងមុខៗ។

បច្ចុប្បន្នពិភព​លោក បាននឹងកំពុងឆ្លងកាត់នូវបញ្ហា ប្រឈមនឹងមុខសញ្ញាគ្រោះថ្នាក់ជាច្រើន បង្ក​ដោយធម្មជាតិ និងមនុស្ស ដែលជាបុព្វហេតុនៃ​ គ្រោះមហន្តរាយ។ ប្រទេសកម្ពុជា ក៏មិនខុស​ពីបណ្តាប្រទេសនានាដែរ ​គឺមានការប្រឈមជាខ្លាំង​ ជាមួយមុខសញ្ញាគ្រោះថ្នាក់ធម្មជាតិ ដូចជា៖ ទឹកជំនន់, រាំងស្ងួត, ខ្យល់កន្រ្តាក់ ឬខ្យល់ព្យុះ, រន្ទះបាញ់, និងបាក់ច្រាំងទន្លេជាដើម៕ អត្ថបទ៖ ទូច សោភ័ណ