ភ្នំពេញ៖ ក្នុងមួយថ្ងៃៗអាជ្ញាធរនៃប្រទេសថៃ បានបញ្ជូនពលករខ្មែរដែលបានរងគ្រោះដោយ​អំពើ​ផ្សេងៗប្រមាណ១០០នាក់ ទៅកាន់មណ្ឌលសំចតរបស់ពលករ ស្ថិតក្នុងក្រុងប៉ោយប៉ែត ខេត្តបន្ទាយមានជ័យ ហើយត្រូវសមត្ថកិច្ចប្រចាំការ និងអ្នកពាក់ព័ន្ធបានសម្របសម្រួលបញ្ជូន​ពួកគេទៅកាន់ស្រុកកំណើតដោយសុវត្ថិភាព ។

ក្នុងសន្និសីទសារព័ត៌មានស្តីពី សមិទ្ធផលសម្រេចបានរយៈពេល៥ឆ្នាំ​ របស់ក្រសួងសង្គមកិច្ច អតីតយុទ្ធជន និងនីតិសម្បទា នៅថ្ងៃទី១៨ ខែសីហា ឆ្នាំ២០២២ ឯកឧត្តម តូច ចាន់នី អគ្គនាយកសេវាសង្គមកិច្ច ​និងជាអ្នកនាំពាក្យក្រសួង មានប្រសាសន៍ថា ក្នុងរយៈពេល៥ឆ្នាំ គឺចាប់​ពីឆ្នាំ២០១៧-២០២២ ជនរងគ្រោះដោយអំពើជួញដូរមនុស្សជាង ៤ ៧០០នាក់ ត្រូវបានសង្គ្រោះ អប់រំប្រឹក្សាយោបល់ បញ្ជូនទៅស្តារនីតិសម្បទា និងបណ្តុះបណ្តាលវិជ្ជាជីវៈ នៅតាមមណ្ឌល​របស់​អង្គការ និងជនរងគ្រោះចំនួនជាង ១ ៣០០នាក់ ត្រូវធ្វើសមាហរណកម្មទៅសហគមន៍ និងតាមដាន​បន្តចំនួន ៣៩១នាក់ និងបិទករណីចំនួន ២៥២នាក់ ។

ឯកឧត្តម បានបន្តថា ទន្ទឹមនោះក្រសួង និងអាជ្ញាធរពាក់ព័ន្ធ ​បានកសាងមណ្ឌលសំចតប៉ោយប៉ែត សម្រាប់​ទទួលទុកដាក់ជនរងគ្រោះ និងងាយរងគ្រោះ ដែលទទួលបានពីអាជ្ញាធរថៃ គិតមកដល់​ថ្ងៃទី៣០​ ខែកញ្ញា ឆ្នាំ២០២១ មណ្ឌលសំចតបានទទួលពលករចំណាកស្រុកសរុបចំនួនជាង ១៣៧ ០០០នាក់ ​និង​បាន​សម្ភាសន៍​កំណត់​អត្តសញ្ញាណ​រកឃើញ​ជនរងគ្រោះ និងងាយរងគ្រោះ​ចំនួន ៦៨៨នាក់ ខណៈមណ្ឌលសំចត់មួយនេះ ក្នុងមួយថ្ងៃៗ​ទទួលពលករខ្មែររងគ្រោះត្រូវ​បានអាជ្ញាធរថៃ​បញ្ជូនមកវិញ ​ដោយសារអំពើផ្សេង​ប្រមាណ ១០០នាក់ ។

ឯកឧត្តម តូច ចាន់នី បានបន្ថែមថា ក្នុងយៈពេលនេះក្រសួងបានរៀបចំ ​និងផ្សព្វផ្សាយលទ្ធផលការ​ធ្វើ​អង្កេតរហ័សថ្នាក់ជាតិលើកទី១​ ស្តីពីស្ថានភាពជនអនាថា បានប្រកាស់ដាក់ឲ្យប្រើប្រាស់សៀវភៅ ស្តីពី​ផែនការណ៍​យុទ្ធសាស្រ្ត​កម្លាំង​សេវាសង្គម​ ២០២២-២០៣១​ បាន​ទទួលជនរងគ្រោះ​មាតុភូមិនិវត្តន៍​ពីប្រទេសនានាចំនួន ​១ ៤២៤នាក់ និងបាន​ធ្វើមាតុភូមិនិវត្តន៍ដោយ​អំពើជួញដូរ​មនុស្សត្រឡប់​ទៅប្រទេសកំណើតវិញចំនួន ៣៤នាក់ ៕ អត្ថបទ៖បាន សុខរិទ្ធិ