ភ្នំពេញ៖ ក្រសួងសាធារណការ និងដឹកជញ្ជូន បានដាក់ឱ្យប្រើប្រាស់ជាផ្លូវការ ប្រព័ន្ធផ្លាស់ប្តូរ​ទិន្នន័យ​អេឡិចត្រូនិកកំពង់ផែ​ (Port EDI) ​នៅកំពង់ផែស្វយ័តក្រុងព្រះសីហនុ និងកំពង់ផែស្វយ័ត​ភ្នំពេញ ​ដើម្បីសម្រួលផ្នែកឯកជន ពេលនាវាចេញ-ចូលនៅកម្ពុជា កាត់​បន្ថយភាព​ស្មុគស្មាញ កាត់បន្ថយការប្រើក្រដាស ​ពេលវេលាយូរក្នុងការស្នើសុំនាវាចេញចូល។

ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) ត្រូវបានដាក់ឱ្យប្រើប្រាស់​សាកល្បង​ជា​ផ្លូវការ​កាលពីថ្ងៃទី១៧ ខែសីហា ​ក្រោម​អធិបតីភាព​ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋ​មន្ត្រី​ក្រសួងសាធារណការ ​និងដឹកជញ្ជូន។

ឯកឧត្តមទេសរដ្ឋមន្ត្រី បានថ្លែងឱ្យដឹងថា Port EDI បង្ហាញឱ្យឃើញពីការយកចិត្តទុកដាក់​របស់​រាជរដ្ឋាភិបាល​ក្រសួង​​​​សាធារណការ និងស្ថាប័នពាក់ព័ន្ធ រួបរួម​គ្នាធ្វើឱ្យចេញនូវប្រព័ន្ធ Port EDI នេះ ដើម្បី​ជួយ​សម្រួល​ដល់ផ្នែកឯកជន ​ពេលនាវាចេញ-ចូលនៅកម្ពុជា ​កាត់បន្ថយភាព​ស្មុគស្មាញ កាត់​បន្ថយការប្រើក្រដាស ពេលវេលាយូរក្នុងការស្នើសុំ​នាវា​ចេញចូលមកកម្ពុជា។

ប្រព័ន្ធ Port EDI គឺជាការធ្វើទំនើបកម្មទ្រង់ទ្រាយធំលើការត្រួត​ពិនិត្យនាវាចរណ៍ចេញ-ចូល​នៅ​កម្ពុជា ​ដោយប្តូរការធ្វើការដោយដៃ ​មកធ្វើការលើប្រព័ន្ធ​អនឡាញវិញ ក្រោមជំនួយ​របស់​អង្គការចៃកា (JICA)។

ដោយមានជំនួយពី JICA ក្រសួងបានរៀបចំប្រព័ន្ធផ្លាស់ប្តូរ​ទិន្នន័យ​អេឡិចត្រូ​និកនៅកំពង់ផែ ដូច្នេះ​នៅពេលដែលកប៉ាល់មកដល់កម្ពុជាដំបូង ​ទម្រង់អនឡាញត្រូវបានប្រើប្រាស់ជំនួសវិញ។ មន្ត្រី​មានសមត្ថកិច្ចអាចពិនិត្យ​ឯកសារទាំងអស់ និងធ្វើការបានភ្លាមៗ​នៅពេលដែលកប៉ាល់មាន ។

បច្ចុប្បន្ននេះ ​កម្ពុជាមានកំពង់ផែអន្តរជាតិធំៗចំនួនពីរ ​គឺកំពង់ផែស្វយ័តភ្នំពេញ និងកំពង់ផែស្វយ័ត​ក្រុងព្រះសីហនុ។ កំពង់ផែទាំងនេះ ផ្តល់សេវាកម្មដឹកជញ្ជូនក្នុងស្រុក ​និង​ក្នុងស្រុក ដែលកំពង់ផែទាំងពីរនេះដំណើរការនីតិវិធីដឹកជញ្ជូនដោយក្រដាស។

ប្រព័ន្ធផ្លាស់ប្តូរទិន្នន័យអេឡិចត្រូនិកថ្មីនេះ​ កំពុងត្រូវបានអនុវត្តនៅកំពង់ផែ ខណៈពេលដែលការ​រំពឹង​ទុកនៃចំនួនកប៉ាល់​ និងទំនិញកើនឡើងយ៉ាងខ្លាំងឆ្លងកាត់កំពង់នាពេលអនាគត៕

អត្ថបទ៖វណ្ណៈ