​កោះ​តៃវ៉ាន់៖ កោះ​តៃវ៉ាន់​កំពុង​ធ្វើ​សមយុទ្ធ​យោធា​ ដើម្បី​បង្ហាញ​សមត្ថភាព​ទប់ទល់​ទៅនឹង​សម្ពាធ​របស់​ប្រទេស​ចិន​ ដើម្បី​ឲ្យ​ទទួលយក​ការគ្រប់គ្រង​នយោបាយ​របស់​ទីក្រុង​ប៉េកាំង​លើ​កោះ​ស្វ័យ​គ្រប់គ្រង​មួយ​នេះ ​បន្ទាប់ពី​សមយុទ្ធ​គំរាមកំហែង​ថ្មីៗ​របស់​ប្រទេស​ចិន​។​

​សមយុទ្ធ​កាលពី​ថ្ងៃ​ពុធ​នៅ​តំបន់​ភាគ​អាគ្នេយ៍​ទីក្រុង Hualien ធ្វើឡើង​រយៈពេល​ប៉ុន្មាន​ថ្ងៃ​បន្ទាប់ពី​ការបាញ់​មី​ស៊ី​ល​របស់​ចិន និង​ការ​លុកលុយ​ចូល​ទៅ​ក្នុង​ដែនសមុទ្រ និង​ដែនអាកាស​របស់​កោះ​តៃវ៉ាន់ ដោយ​នាវា និង​យន្តហោះ​មកពី​កងទ័ព​រំដោះ​ប្រជាជន ជា​យោធា​របស់​បក្ស​កុម្មុយនិស្ត​ដែល​កំពុង​កាន់​អំណាចរ​បស់​ប្រទេស​ចិន​។ អ្នកនាំពាក្យ​ក្រសួងការពារជាតិ​កោះ​តៃវ៉ាន់​លោក Sun Li-fang បាន​និយាយ​នៅ​មូលដ្ឋាន​ទ័ពអាកាស​ក្រុង Hualien ថា យើង​ថ្កោលទោស​យ៉ាង​ដាច់អហង្ការ​ ចំពោះ​ការ​បង្ក​ហេតុ​ខាង​យោធា​ជា​បន្តបន្ទាប់​របស់​ចិន​នៅ​ជុំវិញ​សមុទ្រ និង​ដែនអាកាស​របស់​កោះ​តៃវ៉ាន់ដែល​បាន​បំផ្លាញ​សន្តិភាព​ក្នុង​តំបន់​។​ លោក Sun និយាយ​ថា ប្រតិបត្តិការ​សឹក​របស់​ចិន​បានផ្តល់​ឱ្យ​យើង​ នូវ​ឱកាស​សម្រាប់​ការហ្វឹកហាត់​ត្រៀមប្រយុទ្ធ​។

អ្នកនាំពាក្យ​ក្រសួងការបរទេស​កោះ​តៃវ៉ាន់​លោក Joanne Ou បាន​និយាយ​ថា ប្រទេស​ចិន​កំពុង​ប្រើប្រាស់​ដំណើរ​ទស្សនកិច្ច​កាលពី​ពេល​ថ្មីៗ​នេះ​ របស់​សមាជិកសភា​អាមេរិករួម​ទាំង​ប្រធាន​សភា​លោកស្រី Nancy Pelosi ជា​លេស​សម្រាប់​បង្កើន​ការប៉ុនប៉ង​របស់​ខ្លួន​ ដើម្បី​បំភ័យ​កោះ​តៃវ៉ាន់​ឱ្យ​ទទួល​យក​នូវ​អ្វីដែល​ខ្លួន​ចាត់ទុកថា ​លក្ខខណ្ឌ​សម្រាប់​ការ​បង្រួបបង្រួម​ដោយ​សន្តិភាព​។​ ចិន​បានចាប់ផ្តើម​ការបង្ក​ហេតុ​ខាង​យោធា​ដោយ​ហេតុផល​ទាំងនេះ​។ នេះ​ជា​រឿង​មិន​សម​ហេតុផល និង​ជា​ទង្វើ​ព្រៃផ្សៃ​ដែល​បំផ្លាញ​ស្ថិរភាព​ក្នុង​តំបន់ និង​ប៉ះពាល់​ដល់​សកម្មភាព​ដឹក​ជញ្ជូន និង​ពាណិជ្ជកម្ម​ក្នុង​តំបន់​ឥណ្ឌូ​-​ប៉ាស៊ីហ្វិក​។​

​ប្រទេស​ចិន​បាន​ចាត់ទុក​កោះ​នេះ​ថាជា​ខេត្ត​បំបែក​ខ្លួន ​ដែល​នឹង​ត្រូវ​ដាក់បញ្ចូល​ឧបសម្ព័ន្ធ​ដោយ​ប្រើ​កម្លាំង​ប្រសិនបើ​ចាំបាច់ ហើយ​ចាត់​ទុក​ដំណើរ​ទស្សនកិច្ច​មកកាន់​កោះ​តៃវ៉ាន់​របស់​មន្ត្រី​បរទេស​ថា ជា​ការ​ទទួលស្គាល់​អធិបតេយ្យ​របស់​កោះ​នេះ​។ ទន្ទឹម​នឹង​ការគំរាមកំហែង​ផ្នែក​យោធា​របស់​ខ្លួន ប្រទេស​ចិន​បាន​ដាក់​បម្រាម​ទិដ្ឋាការ និង​ទណ្ឌកម្ម​ផ្សេងទៀត​កាលពី​ថ្ងៃ​អង្គា​រ​លើ​ឥស្សរជន​នយោបាយ​កោះ​តៃវ៉ាន់​៕

អត្ថបទ៖ ប៊ុនថន