ភ្នំពេញ៖ ក្នុងរយៈពេល ៣០ឆ្នាំ នៃ​ដំណើរការបោសសម្អាតមីនមនុស្សធម៌នៅកម្ពុជា បាន​ចូលរួម​ចំណែក​ជាច្រើន​ក្នុង​ការ​ផ្តល់​ដី​សុវត្ថិភាព កាត់​បន្ថយអត្រាគ្រោះថ្នាក់ ដោយ​សារមីន និង​ចូល​រួមចំណែក​ដល់​កិច្ច​គាំពារដល់​សន្តិភាព​នៅ​កម្ពុជា​ផងដែរ​។ នេះបើតាមប្រសាសន៍អនុប្រធានទី១អាជ្ញាធរមីន។

ឯកឧត្ដម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅថ្ងៃទី១៨ ខែសីហានេះ បានទទួល​ជួបពិភាក្សា​ការងារ​ជាមួយ លោក Andrew Well-Dang មន្រ្តីជាន់ខ្ពស់នៃវិទ្យាស្ថានសន្តិភាពសហរដ្ឋអាមេរិក ក្រោមប្រធាន​បទកេរ្តិ៍​ដំណែល​សង្រ្គាម សន្តិភាពនិងសន្តិសុខក្នុងតំបន់ និងការកសាងសន្តិភាព ដែលជាផលប្រយោជន៍​សម្រាប់ប្រជាជន​អាមេរិក និងកម្ពុជា។

នៅ​ក្នុង​ឱកាសនោះ លោក Andrew Well-Dang បាន​ថ្លែងបញ្ជាក់ថា វិទ្យាស្ថានសន្តិភាពសហរដ្ឋអាមេរិក បានដើរ​តួនាទី​យ៉ាង​សំខាន់​ក្នុងការផ្សព្វផ្សាយ អប់រំ ស្វែងរកសន្តិភាព និងដោះស្រាយបញ្ហាទំនាស់ផ្ទៃក្នុង​ប្រទេសនីមួយៗ​នៅលើ​ពិភពលោក និងក្នុងតំបន់។ក្រៅពីនេះលោកបានវាយតម្លៃខ្ពស់ចំពោះដំណើរការស្វែងរកសន្តិភាព និងការ​បញ្ចប់​សង្រ្គាម​រ៉ាំរ៉ៃរាប់ទសវត្សន៍នៅកម្ពុជា ហើយបានចាត់ទុកកម្ពុជា ជាប្រទេសមួយដែលមានបទពិសោធន៍ច្រើន និងអាច​ចែក​រំលែក​ទៅបណ្តាប្រទេសនានាជុំវិញពិភពលោក និងក្នុងតំបន់ ដែលកំពុងជួបប្រទះ និងធ្លាប់​ជួបផលវិបាក​ដូចកម្ពុជា។

ជាការឆ្លើយតប ឯកឧត្ដម ទេសរដ្ឋមន្រ្តី លី ធុជ បានលើកឡើងអំពីដំណើរការស្វែងសន្តិភាព និងការបញ្ចប់​សង្រ្គាម​ទាំង​ស្រុង​នៅកម្ពុជា ក្រោមនយោបាយ ឈ្នះ ឈ្នះ ដែលមានសម្តេចអគ្គមហាសេនាបតីតេជោ ហ៊ុន សែន នាយក​រដ្ឋមន្រ្តី ជាស្ថាបនិកសន្តិភាព និងមគ្គុទេ្ទសក៍ឯក ក្នុងការនាំមកនូវសន្តិភាពពេញលេញជូនជាតិមាតុភូមិ ព្រមទាំងបាន​បញ្ជូន​កងកម្លាំងរក្សាសន្តិភាពទៅបណ្តាប្រទេសនានា ដែលត្រូវការ និងធ្លាប់រងគ្រោះដូចកម្ពុជា។

លោកបន្តទៀតថា រយៈ​ពេល៣០ឆ្នាំ នៃដំណើរការបោសសម្អាតមីនមនុស្សធម៌នៅកម្ពុជា បានចូលរួមចំណែកជាច្រើន​ក្នុង​ការ​ផ្តល់​ដី​សុវត្ថិភាព កាត់អត្រាគ្រោះថ្នាក់ដោយសារមីន និងការអភិវឌ្ឍប្រទេសជាតិ ជាពិសេសការងារបោស​សម្អាតមីន បានរួមចំណែកដល់កិច្ចគាំពារដល់សន្តិភាពនៅកម្ពុជាផងដែរ។

គិតចាប់ពីឆ្នាំ១៩៩២ ដល់ឆ្នាំ២០២១ ផ្ទៃដីទំហំជាង ២ពាន់គីឡូម៉ែត្រក្រឡា ត្រូវបានបោសសម្អាតអស់មីន សម្រាប់​យក​ទៅ​​ប្រើប្រាស់ និង​បង្កបង្កើន​ផល ដោយប្រជាពលរដ្ឋទទួលផលមានជាង៧លាននាក់។ អត្ថបទ៖ ទូច សោភ័ណ