​សៀមរាប៖ ដើម្បីដោះស្រាយបញ្ហាសំណង់ និងដីធ្លីខុសច្បាប់ នៅក្នុងតំបន់រមណីយដ្ឋានអង្គរ ក្រុមមន្ត្រីចំនួន​ជិត​៨០០នាក់ មកពីក្រសួងស្ថាប័នចំនួន៣ បានចាប់ផ្តើមចុះប្រមូលទិន្នន័យ កំណត់និយាមការ លើសំ ណង់​ខុសច្បាប់នៅ​ក្នុង​រមណីយ​ដ្ឋានអង្គរ និងតំបន់ផ្សេងទៀតដែលគ្រប់គ្រងដោយអាជ្ញាធរជាតិអប្សរា។ យុទ្ធនាការនេះ បានធ្វើឡើង នៅ​ថ្ងៃទី១៨ ខែសីហា ឆ្នាំ២០២២នេះ។

សេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ឯកសារស្ថិតិប្រជាពលរដ្ឋ ស្ថិត​ក្នុងតំបន់ការពារទី១ និងការពារទី២ នៃរមណីយដ្ឋានអង្គរដែលរៀបចំដោយអា ជ្ញាធរជាតិ​អប្សរា​នាឆ្នាំ២០០៤-២០០៥ នឹងត្រូវប្រើប្រាស់ជាឯកសារគោល ដើម្បីពិនិត្យការកាន់កាប់ដី និងសំណង់​ស្រប​ច្បាប់ ឬ​មិន​ស្របច្បាប់​ក្នុង​រមណី​យ​ដ្ឋានអង្គរ។

សេចក្តីប្រកាសដដែលបន្តថា យុទ្ធនាការនេះ មានគោលដៅ​ការពារ​តំបន់​រមណីយដ្ឋានអង្គរដែលបានចុះបញ្ជីក្នុងសម្បត្តិ​បេតិក​ភណ្ឌ​ពិភពលោកឆ្នាំ១៩៩២ មានទំហំ៤០១គីឡូម៉ែត្រការ៉េ ជាតំបន់ដែលចាត់ទុកជាសម្បត្តិសាធារណៈរបស់រដ្ឋ ត្រូវ​រក្សាការពារដាច់ខាត មិនអាច​កាត់​ឆ្វៀល​បានឡើយ។

កម្ពុជាក្នុងនាមរដ្ឋសមាជិក មានភារកិច្ចរក្សាការពារតំបន់រមណីយដ្ឋានអង្គរ ដែលជាមរតកកេរ្តិ៍ដូនតា ជាអត្តសញ្ញាណ និង​ដួង​ព្រលឹងរបស់ជាតិ ក៏ដូចជាតម្លៃជាសកល នៃសម្បត្តិបេតិកភណ្ឌពិភពលោក សម្រាប់មនុស្សជាតិទាំងមូល។

ក្រុម​មន្រ្ដី​ ដែលបានធ្វើយុទ្ធនាការនេះមានសរុបចំនួន ៧៧៩រូប ចែកចេញជា ៣២ក្រុម ក្នុងនោះ មន្ត្រីជំនាញរបស់ក្រសួង​រៀប​ចំ​ដែនដី នគរូបនីយកម្ម និងសំណង់ ចំនួន ៤៣៩រូប, មន្ដ្រីរបស់ក្រសួងវប្បធម៌ និងវិចិត្រសិល្បះចំនួន ២៣២រូប និង​មន្ត្រី​របស់រដ្ឋបាលខេត្តសៀមរាបចំនួន ១០៨រូប ដើម្បីចុះវាស់វែង កំណត់និយាមកាក្បាលដី និងអត្ត​សញ្ញាណ​អ្នក​កាន់​កាប់​ដី​និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់​អាជ្ញាធរ​ជាតិ​អប្សរា។

នាដើមឆ្នាំ២០២២ មាន​អ្នក​ឆ្លៀត​ឱកាស​សាងសង់​សំណង់​ខុស​ច្បាប់​រាប់​រយករណី បន្ថែមពីលើករណីសំណង់ខុសច្បាប់​ជា​ច្រើ​ន​ទៀត ដែលបានរំលោភបំពាន នាពេលកន្លងមក ក្នុងតំបន់ការពារនៃរមណីយដ្ឋានអង្គរ។ សំណង់ខុសច្បាប់​អស់​ទាំង​នេះ ត្រូវរុះរើចេញជាបន្ទាន់ដោយផ្ទាល់ខ្លួន។

ទន្ទឹម​នេះ រដ្ឋបាលខេត្តសៀមរាប និងអាជ្ញាធរជាតិអប្សរា បន្តចាត់វិធានការទប់ស្កាត់ការសាងសង់ រុះរើសំណង់ខុសច្បាប់ ហាមឃាត់ការទិញលក់ដីនិងផ្ទះគ្រប់ប្រភេទ និងមិនផ្តល់លិខិតគតិយុត្តិផ្សេងៗ នៅក្នុងតំបន់រមណីយដ្ឋានអង្គរ ជា​ដាច់​ខាត។

របាយការណ៍របស់ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានឲ្យដឹងថា ដោយ​សារ​កំណើន​នៃ​សំណង់​ខុស​ច្បាប់​នៅក្នុងរមណីយដ្ឋានអង្គរ មានការកើនឡើងខ្លាំងនោះ ចាប់តាំងពីឆ្នាំ២០១៧មក កម្ពុជាបានទទួលលិខិតព្រមាន និង​ស្នើសុំឲ្យបកស្រាយចំនួន២ដង ពីសំណាក់មជ្ឈមណ្ឌលបេតិកភ ណ្ឌពិភពលោក។ បច្ចុប្បន្នសំណង់​ខុសច្បាប់នៅក្នុង​រមណីយ​ដ្ឋានមានចំនួន៨៤៤៨ករណី។ ឧបនាយ ករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម ជា សុផារ៉ា បានហៅសំណ ង់​ខុស​ច្បាប់​ទាំងនោះថា ជាសំណង់ដ៏គួរឲ្យខ្មាសអៀន៕ អត្ថបទ៖ ឈិត សាវី