ភ្នំពេញ៖ អនុគណៈកម្មការចំពោះកិច្ចចាក់វ៉ាក់សាំងកូវីដ-១៩ នៃក្រសួងវប្បធម៌ និងវិចិត្រសិល្បៈ បានរៀបចំការចាក់វ៉ាក់សាំងបង្ការជំងឺកូវីដ-១៩ ប្រភេទស៊ីណូវ៉ាក់ (Sinovac) ជូនថ្នាក់ដឹកនាំ មន្ត្រីរាជការ ចាប់ពីថ្ងៃទី៣ រហូតដល់ថ្ងៃទី៨ ខែមេសា ឆ្នាំ២០២១ ចាប់ពីម៉ោង ៨ព្រឹកដល់ម៉ោង១២ និងពីម៉ោង១៤ ដល់ម៉ោង១៧ នៅទីសី្តការក្រសួង។
លោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានថ្លែងថា ការរៀបចំចាត់ចែងចាក់វ៉ាក់សាំងកូវីដ១៩ ជូនមន្រី្តរាជការនៃក្រសួងវប្បធម៌ និងវិចិត្រសិល្បៈនាពេលនេះ យោងទៅតាមអនុសាសន៍ដ៏ខ្ពង់ខ្ពស់ និងការយកចិត្តទុកដាក់របស់ប្រមុខរាជរដ្ឋាភិបាលសម្តេចតេជោ នៅក្នុងការរាតត្បាតរបស់មេរោគកូវីដ១៩ នៅក្នុងសហគមន៍។ ដូច្នេះតាមរយៈការខិតខំប្រឹងប្រែង ប្រទេសកម្ពុជាបានទទួលវ៉ាក់សាំងកូវីដ១៩ ជាជំនួយរបស់មិត្តចិន និងថ្មីៗនេះកម្ពុជាបានបញ្ជាទិញវ៉ាក់សាំងស៊ីណូវ៉ាក់ សម្រាប់ចាក់វ៉ាក់សាំងជូនថ្នាក់ដឹកនាំ មន្រី្តរាជការអាទិភាពតាមបណ្តាក្រសួងស្ថាប័ននានា។ ជាមួយគ្នានោះដែរ មន្ត្រីរាជការនៃក្រសួងវប្បធម៌បានមកទទួលការចាក់វ៉ាក់សាំងស៊ីណូវ៉ាក់ បានបង្ហាញចំណាប់អារម្មណ៍របស់ខ្លួនសប្បាយរីករាយ ក្រោយទទួលការចាក់វ៉ាក់សាំងកូវីដ-១៩ រួច និងសូមថ្លែងអំណរអរគុណដល់ប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានស្វះសែងរកវ៉ាក់សាំងកូវីដ-១៩ មកចាក់ជូនពួកគាត់ ដើម្បីការពារសុខុមាលភាព ទប់ស្កាត់ការចម្លងមេរោគកូវីដ-១៩។
ជាចុងក្រោយលោកជំទាវ បណ្ឌិតសភាចារ្យ ភឿង សកុណា បានបញ្ជាក់ថា គោលបំណងចម្បងគឺធ្វើយ៉ាងណាទប់ស្កាត់ការរាតត្បាតនៃមេរោគកូវីដ-១៩ នៅក្នុងពេលដ៏លំបាកនេះ ដើម្បីឲ្យប្រជាជនទទួលបាននូវការការពារ។ ប៉ុន្តែយើងទាំងអស់គ្នាត្រូវចងចាំថា វ៉ាក់សាំងកូវីដ-១៩ មិនមែនជាដំណោះស្រាយតែមួយគត់នោះទេ បើទោះបីជាបានចាក់វ៉ាក់សាំងរួចហើយក៏ដោយ យើងត្រូវតែណែនាំទៅមន្រី្តរាជការ សិល្បករ ឬក៏ប្រជាជនដែលបំរើការងារលើវិស័យវប្បធម៌ឲ្យរក្សានូវ៣កុំ ៣ការពារ គឺជាគោលការណ៍ធំណាស់ដែលបុគ្គលគ្រប់រូបត្រូវតែអនុវត្តន៍ បើជាបានចាក់វ៉ាក់សាំងរួចក៏ដោយ។ ឆ្លៀតក្នុងឱកាសនេះ ក្នុងនាមមន្ត្រីរាជការនៃក្រសួងវប្បធម៌ លោកជំទាវ បណ្ឌិតសភាចារ្យ សូមថ្លែងអំណរគុណដ៏ខ្ពង់ខ្ពស់បំផុតជូនចំពោះ សម្ដេចតេជោ នាយករដ្ឋមន្រី្ត ដែលលោកបានខិតខំយកចិត្តទុកដាក់ ក៏ដូចជាក្រសួងសុខាភិបាល ក្នុងរយៈពេលជាង ១ឆ្នាំកន្លងមកនេះ ពេទ្យអាវសរបស់យើងនេះជាអ្នកឈានមុខ បានលះបង់ពេលវេលា និងសុខភាពផ្ទាល់ខ្លួន និងគ្រោះថ្នាក់នានាក្នុងការជួយសង្គ្រោះប្រជាជន។
ដូច្នេះវីរភាពនេះពិតជាខ្ពង់ខ្ពស់បំផុត សម្រាប់មន្រី្តរាជការនៃក្រសួងវប្បធម៌ ដែលជាប្រជាជន និងសូមធ្វើការថ្លែងអំណរគុណ ដល់អ្នកដែលពាក់ព័ន្ធទាំងអស់កំពុងខិតខំប្រយុទ្ធតស៊ូ ហើយយើងសាមគ្គីគ្នា យើងនឹងយកឈ្នះបានជំងឺកូវីដ-១៩ ក៏សូមអំពាវនាវដល់មន្រី្តរាជការក្រសួងវប្បធម៌ និងតាមបណ្ដាក្រសួង មន្ទីរ ក៏ដូចជាបងប្អូនប្រជាពលរដ្ឋកម្ពុជាទាំងអស់ សូមនាំគ្នាទប់ស្កាត់មេរោគកូវីដ-១៩ ដែលអនុវត្តន៍ទៅតាមការណែនាំ របស់ក្រសួងសុខាភិបាលឲ្យបានពេញលេញ ដើម្បីសុវត្ថិភាពផ្ទាល់ខ្លួន សុខសន្តិភាព ហើយក៏ដើម្បីសុភមង្គលនៅក្នុងក្រុមគ្រួសារផងដែរ៕
អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
