សហរដ្ឋអាមេរិក៖ អាជ្ញាធរ​បាន​សរសេរ​នៅលើ​បណ្តាញ​សង្គម Tweeter ថា មនុស្ស​ច្រើន​នាក់​ត្រូវបាន​គេ​រាយការណ៍​ថា​បាន​ស្លាប់​ បន្ទាប់ពី​យន្តហោះ​ពីរ​គ្រឿង​បាន​បុក​គ្នា​ ខណៈ​ព្យាយាម​ចុះចត​ក្នុង​ទីក្រុង Watsonville រដ្ឋកាលីហ្វ័រ​ញ៉ា សហរដ្ឋអាមេរិក​។​

​យោងតាម​គណនី Twitter ផ្លូវការ​របស់​ទីក្រុងបាន​ឲ្យ​ដឹងថា ហេតុការណ៍​យន្តហោះ​បុក​គ្នា​នេះ​បាន​កើតឡើង​កាលពី​វេលា​ម៉ោង​ ២​ និង​ ៥៦​នាទី​រសៀលម៉ោង​ក្នុង​តំបន់នៅ​អាកាសយានដ្ឋាន​ទីក្រុង Watsonville ហើយ​ភ្នាក់ងារ​ជួយ​សង្គ្រោះបាន​ប្រញាប់ប្រញាល់​ទៅកាន់​កន្លែងកើតហេតុ​។ ​រដ្ឋបាល​អាកាសចរណ៍​សហព័ន្ធ (FAA) បាន​និយាយ​នៅក្នុង​សេចក្តីថ្លែងការណ៍​បឋម​ថា យន្តហោះ​ខ្នាតតូចម៉ាស៊ីន​មួយ Cessna 152 និង​យន្តហោះ​ម៉ាស៊ីន​ពីរ Cessna 340 បាន​បុក​គ្នា ខណៈ​អ្នកបើក​យន្តហោះ​កំពុងធ្វើដំណើរ​ទៅជិត​ដល់​អាកាសយានដ្ឋាន​ទីក្រុង Watsonville​។ ​យោងតាម​សេចក្តីថ្លែងការណ៍​បានឱ្យដឹងថា មនុស្ស​ម្នាក់​ស្ថិតនៅលើ​យន្តហោះ Cessna 152 និង​មនុស្ស 2នាក់​នៅលើ​យន្តហោះ Cessna 340។

​រដ្ឋបាល​អាកាសចរណ៍​សហព័ន្ធ (FAA) និង​ក្រុម​គណៈកម្មការ​សុវត្ថិភាព​ដឹកជញ្ជូន​ជាតិ​ នឹង​ទទួលខុសត្រូវ​ក្នុងការ​ស៊ើបអង្កេត​ឧប្បត្តិ​ហេតុនេះ ហើយនឹង​ផ្តល់ព័ត៌មាន​ថ្មីៗ​បន្ថែមទៀត ប៉ុន្តែ​ទីភ្នាក់ងារ​ទាំងពីរ​មិនទាន់​បានបង្ហាញ​ការកំណត់​អត្តសញ្ញាណ ​អ្នក​ដែល​ជាប់​ពាក់ព័ន្ធ​ក្នុង​គ្រោះថ្នាក់​យន្តហោះ​នេះ​នៅឡើយ៕

អត្ថបទ៖ ប៊ុនថន