ភ្នំពេញ៖ ឯកឧត្តម ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជា បានឲ្យដឹងថា នាពេលខាងមុខ នឹងដាក់ឱ្យដំណើរការប្រអប់តវ៉ា (Compliant Box) ក្នុងពន្ធនាគារ និងមណ្ឌលអប់រំកែប្រែ សម្រាប់ភាគីពាក់ព័ន្ធប្តឹងតវ៉ាចំពោះបញ្ហាស្ថានភាពសិទ្ធិមនុស្ស។
ថ្លែងប្រាប់ BTV News នៅថ្ងៃទី១៩ ខែសីហា ឆ្នាំ២០២២ ឯកឧត្តម ជិន ម៉ាលីន សមាជិក និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា បានឱ្យដឹងថា យោងតាមការព្រមព្រៀងរវាងស្ថាប័នគណៈកម្មាធិការសិទ្ធិមនុស្សកម្ពុជាជាមួយអគ្គនាយកដ្ឋានពន្ធនាគារ កាលពីកន្លងទៅ ស្ថាប័នទាំងពីរបានឯកភាពគ្នាបង្កើតប្រអប់តវ៉ា (Compliant Box) តាមបណ្តាពន្ធនាគារ និងមណ្ឌលអប់រំកែប្រែនៅទូទាំងរាជធានី-ខេត្ត។ ឯកឧត្តម បន្តថា មកទល់ពេលនេះ ដំណើរការប្រអប់តវ៉ាកំពុងស្ថិតក្នុងការជជែកគ្នាអំពីយន្តការរដ្ឋបាលនៃការដាក់ពាក្យប្តឹងតវ៉ាចូលក្នុងប្រអប់មួយនេះ ខណៈប្រអប់តវ៉ានឹងដំណើរការសាកល្បងជាគំរូក្នុងពន្ធនាគារ និងមណ្ឌលអប់រំកែប្រែមួយចំនួន។
ឯកឧត្តម ជិន ម៉ាលីន បញ្ជាក់ថា ប្រអប់តវ៉ានេះនឹងគ្រប់គ្រងដោយគណៈកម្មាធិការសិទ្ធិមនុស្សកម្ពុជា ហើយភាគីពាក់ព័ន្ធដែលអាចប្តឹងតវ៉ាចូលប្រអប់នេះ រួមមាន សាច់ញាតិ ជនជាប់ឃុំ ឬមន្រ្តី និងអនុរក្សពន្ធនាគារ ពាក់ព័ន្ធនឹងការរំលោភបំពានសិទ្ធិមនុស្សក្នុងពន្ធនាគារ។
ឯកឧត្តម ជិន ម៉ាលីន លើកឡើងថា ប្រអប់តវ៉ានេះនឹងផ្តល់អត្ថប្រយោជន៍សំដៅធានាបានតម្លាភាព និងប្រសិទ្ធភាពនៃការគ្រប់គ្រង ឬឈានទៅលុបបំបាត់អំពើបំពានផ្សេងៗដែលកើតមានក្នុងពន្ធនាគារ ដូចជាការប្រើប្រាស់អំពើហិង្សា និងការរំលោភបំពានសិទ្ធិអ្នកជាប់ឃុំជាដើម។
គួរបញ្ជាក់ថា យន្តការប្រអប់តវ៉ាថ្មីនេះគឺជាយន្តការមួយបន្ថែមពីលើសកម្មភាពការចុះត្រួតពិនិត្យ និងការតាមដានរបស់គណៈកម្មាធិការសិទ្ធិមនុស្សកម្ពុជា ដើម្បីអនុញ្ញាតឱ្យភាគីពាក់ព័ន្ធស្វែងរកកិច្ចការពារពីសិទ្ធិរបស់ខ្លួន រួមទាំងបង្ហាញជាលក្ខណៈបើកចំហរនូវភាពត្រឹមត្រូវ និងតម្លាភាពក្នុងពន្ធនាគារ និងមណ្ឌលអប់រំកែប្រែទាំងអស់នៅទូទាំងប្រទេស៕ អត្ថបទ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
